Mga Hapot Hale sa mga Parabasa

Haen si Daniel kan an tolong Hebreo binalo sa atubangan kan dakulaon na imahen na ipinatindog ni Nabucodonosor sa kaplanodohan nin Dura?

Mayong sinasabi an Biblia, kaya mayong tawo ngonyan an makakapagsabi kan kinamumugtakan ni Daniel durante kan pagbalong iyan.

An nagkapira nagsuherir na an ranggo ni Daniel bilang opisyal o an saiyang kamugtakan sa pabor ni Nabucodonosor mas halangkaw kisa kan ki Sadrac, Mesac, asin Abednego patin na si Daniel kun siring dai obligadong dumuman sa kaplanodohan nin Dura. Talagang ipinaririsa kan Daniel 2:49 na sa halipot na panahon nagkaigwa sia nin katongdan na mas halangkaw kisa kan sa tolo niang kaibaiba. Alagad dai niato mapatutunayan na pinalibre sia kaini sa pakipagtipon sa iba sa atubangan kan imahen.

Nagpoprobar na ipaliwanag an pagigin mayo duman ni Daniel, an iba nagsabi na tibaad mayo sia dahel sa sarong opisyal na asignasyon o na sia may helang asin sa siring dai kayang umatender. Minsan siring, dai iyan sinasabi kan Biblia. Sa ano man na kamugtakan, an iginawe ni Daniel dai makikritika, ta kun iyo, an mauring opisyales na Babilonyo daing duda na gagamiton iyan tanganing akusaran sia. (Daniel 3:8) Bago sagkod pakatapos kan pangyayaring ini, pinatunayan ni Daniel na sia nagdanay na may integridad, maimbod sa Dios ano man na angat an mapaatubang sa saiya. (Daniel 1:8; 5:17; 6:​4, 10, 11) Kaya dawa dai sinasabi kan Biblia kun taano ta si Daniel bakong presente sa kaplanodohan nin Dura, kompiado kita na dai nia ikinompromiso an pagigin fiel ki Jehova Dios.​—Ezequiel 14:14; Hebreo 11:33.