Pakamate nin Seguridad Ngonyan—Pagkaigwa nin Seguridad Sagkod Lamang

TAANO ta sa parate masakit makua an seguridad asin, kun makua, temporaryo sana? Posible kaya na an pakamate niato nin seguridad nakabasar sa imahinasyon​​—sa kun ano an linalaoman niatong makamtan imbes na kun ano an kayang makamtan? An siring na salang paniniwala puedeng apodon na pamumuhay sa sarong kinaban nin imahinasyon.

An imahinasyon nagtotogot na lingawan an totoong buhay kaiba an kadaihan nin seguridad kaiyan asin imahinaron an sarong magayon, may seguridad na kamugtakan, na dai iniintindi an ano man na tibaad makaraot kan pangatorogan. Pero sa parate an mga problema sa tunay na kinaban biglang iniistorbo an kinaban nin pangatorogan na ini asin daing herak na hinahale an pakamate nin marahay na kamugtakan, na pinupukaw an nangangatorogan sa realidad nin buhay.

Estudyaran ta an sarong langtad kun saen an mga tawo naghahanap nin seguridad​​—an geograpikong lokasyon. Halimbawa, an dakulang siudad tibaad garo baga nagtatao nin paglaom, na pinoponan nin mga ideya nin kasiraman, darakulang sueldo, asin maluhong mga istaran. Iyo, garo baga iyan nag-aalok nin haloy nang hinahalat na seguridad. Alagad realistiko daw an ideyang ini?

Lokasyon—Dakulang Siudad o Dakulang mga Pangarap?

Sa nagpoprogreso pa sanang mga nasyon, an pan-akit kan dakulang siudad pinalalakop nin anunsio na puedeng makatentar sa nagkakainteres na imahinasyon. An mga organisasyon na yaon sa likod kan siring na anunsio dai man talaga interesado sa saindong seguridad kundi, imbes, sa saindang benta. Dinidisimular ninda an mga problema sa tunay na kinaban paagi kan mga paheling nin pag-asenso na naglaladawan nin seguridad. Sa siring, an seguridad nagigin konektado sa saindang iinaanunsiong produkto asin sa dakulang siudad.

Estudyare an masunod na halimbawa. An mga opisyal sa sarong siudad sa Solnopan na Aprika nagbugtak nin mga paskilan na buhay na buhay na ipinaheheling na an paninigarilyo sa katunayan mayong pagkakaiba sa pagsolo sa pinagalan na kuarta. Iyan kabtang kan kampanya tanganing patanidan an mga namamanwaan tumang sa paninigarilyo. An mga paraprodusir asin paratinda nin sigarilyo nagbugtak man nin paskilan na may tusong disenyo na ipinaheheling an mga parasigarilyo na yaon sa nakaaakit sa matang mga eksena nin kaogmahan asin pag-asenso. Dugang pa, pinasulot kan sarong kompanya nin sigarilyo an nagkapira sa mga empleyado kaiyan nin luhosong mga uniporme asin maarteng kupya sa beisbol tanganing magdistribwir nin mga sigarilyo sa mga hoben sa tinampo, na ineenkaminar an kada saro na “probaran iyan.” Dakol sa mga hoben na ini an hale sa mga baryo asin, huling inosente sa mga paagi kan tusong mga anunsio, nadaya kan pangagdang ini. Sinda nagin adiktong mga parasigarilyo. An hoben na mga taga baryo nagpasiring sa dakulang siudad sa paghanap nin seguridad tanganing masuportaran an saindang mga pamilya o umasenso sa pinansial. Imbes, sinosolo ninda an kadaklan kan kuarta na puede kutana nindang nagamit sa mas marahay na mga katuyohan.

An mga anunsio na naglaladawan sa asensadong buhay sa dakulang siudad bako man pirmeng hale sa mga negosyante. Puedeng hale man iyan sa mga tawong nagbalyo sa dakulang siudad asin nasusupog na magbalik sa saindang ginikanan na baryo. Huling habo nindang paluwason na sinda mga bigo, ipinaghahambog ninda an soboot nakuang kayamanan asin mga nagibo ninda sa siudad. Minsan siring, an maingat na pagsiyasat sa saindang hinihingakong kamugtakan naghahayag na an saindang presenteng estilo nin pamumuhay bako man talagang pag-asenso kun ikokomparar sa dati nindang buhay sa baryo; sinda nasasakitan sa pinansial arog kan kadaklan na nag-iistar sa siudad.

Sa darakulang siudad nangorognang nabibiktima kan mga daing konsensia an mga bagong abot na naghahanap nin seguridad. Taano? Sa pankagabsan, mayo pa sinda nin dayupot na mga katood asin harayo sindang marhay sa saindang mga kapamilya. Kaya mayong masadol sa sainda na puedeng makatabang sa sainda na makalikay sa natatagong mga peligro sa materyalistikong pamumuhay sa siudad.

Si Josue dai man natentaran na magsigarilyo. Apuera kaini, narealisar nia na dai nia kaya an buhay sa siudad. Sa kaso nia, sa pinakamarahay na kamugtakan, an puede sana talagang ialok kan siudad sa saiya iyo an dakula, dai naotob na mga pangarap. Narekonoser nia na mayo sia nin tunay na seguridad sa siudad; talagang bako siang para dian. Nadaog sia kan pakamate nin kadaihan nin halaga, pagigin mas hababa, asin pagkabigo, asin sa kahurihurihi nagpakumbaba sia asin nagbalik sa baryo.

Dati na siang natatakot na sia pag-oolog-ologon. Imbes, maogma siang inako kan saiyang pamilya asin tunay na mga katood. Sa tabang kan mainit na pakikiiba kan saiyang pamilya, an pamilyar na mga kamugtakan sa palibot kan baryo, asin pagkamoot kan saiyang mga katood sa Kristianong kongregasyon, dai nahaloy nakamate sia nin orog nanggad na seguridad kisa sa dakulang siudad, kun saen an mga pangarap nin dakol nagigin pangum-um. Sa pagngalas nia, an mahigos na pagtatrabaho kaiba kan saiyang ama sa oma totoong nagtao sa saiya asin sa pamilya nia nin mas dakulang entrada kisa nagaganar kutana nia sa siudad.

Kuarta—Ano an Totoong Problema?

Ikatatao daw sa saindo nin kuarta an pakamate nin seguridad? Si Liz na taga Canada nagsasabi: “Kan hoben pa ako, an paghona ko an kuarta nagtatao nin katalingkasan sa kahaditan.” Namoot sia sa sarong lalaki na asensado sa pinansial. Dai nahaloy sinda nagpakasal. Nakamate na daw sia nin seguridad? Si Liz nagpapadagos: “Kan ako nag-agom, igwa kaming magayon na harong asin duwang kotse, asin an samong kamugtakan sa pinansial nagtotogot na makamtan mi an haros ano man na materyal na bagay, pagbiahe, asin pag-aling-aling. Makangangalas nanggad, naghahadit pa man giraray ako sa kuarta.” Ipinaliwanag nia kun taano: “Dakulang marhay an mawawara sa samo. Minalataw na mantang mas dakol an yaon sa saimo, mas dikit an namamatean mong seguridad. An kuarta dai nagtao nin katalingkasan sa kahaditan.”

Kun sa paghona nindo mayo kamo nin igong kuarta tanganing magkaigwa nin seguridad, ihapot sa sadiri, ‘Ano an totoong problema? Iyan daw talagang kakulangan nin kuarta, o kakulangan nin madonong na pagkapot nin kuarta?’ Pinepensar an nakaagi nia, si Liz nagsasabi: “Narealisar ko ngonyan na an ginigikanan kan mga problema sa sakong pamilya kan ako aki pa iyo an bakong tamang pagkapot nin kuarta. Namamakal kami paagi sa pag-utang, asin kun siring pirme kaming may utang na nagpapagabat sa samo. Ini nagtatao nin kahaditan.”

Minsan siring, si Liz asin an saiyang agom ngonyan nakamamate na nin orog nanggad na seguridad, minsan sinda mayong gayo nin kuarta. Kan nanodan ninda an katotoohan sa Tataramon ni Dios, pinondo ninda an pagdangog sa nakaaakit na mga paghihingako manongod sa kuarta asin nagpoon na magdangog sa kadonongan nin Dios, kaiba an mga tataramon na ini: “Kun dapit sa naghihinanyog sa sako, sia mag-eerok na may katiwasayan asin dai mariribok nin takot sa kalamidad.” (Talinhaga 1:33) Gusto ninda na magkaigwa nin orog na kahulogan an saindang buhay kisa ikatatao nin dakulang kuarta sa bangko. Ngonyan, bilang mga misyonero sa sarong harayong daga, si Liz asin an saiyang agom nagtotokdo sa mga tawong mayaman sagkod dukha na dai na mahahaloy papangyayarihon ni Jehova Dios an tunay na seguridad sa bilog na daga. An gibohon na ini nagtatao nin hararom na satispaksion asin karigonan na naggigikan sa marahayon na katuyohan asin nakalalabing marhay na mga prinsipyo sa buhay, bakong sa pinansial na pakinabang.

Girumdomon an pundamental na katotoohan na ini: An pagigin mayaman sa Dios mas mahalagang marhay kisa pagkaigwa nin materyal na kayamanan. Sa bilog na Sagradong Kasuratan, an idinodoon iyo an, bakong an pagkaigwa nin materyal na kayamanan, kundi an pagkaigwa nin marahay na kamugtakan sa atubangan ni Jehova, na mapagdadanay niato paagi sa padagos na paggibo kan kabotan nin Dios na may pagtubod. Inenkaminar kita ni Jesu-Cristo na magin “mayaman sa Dios” asin magtipon nin “kayamanan sa kalangitan.”​—Lucas 12:​21, 33.

Posisyon—Masaen Ka?

Kun natetentaran kang maniwala na an pagkamit nin halangkaw na posisyon sa sosyedad iyo an paagi tanganing magkaigwa nin seguridad, ihapot sa sadiri: ‘Siisay na nasa posisyon an totoong nagkakamit nin tunay na seguridad? Gurano kalangkaw na posisyon an dapat na maabot ko tanganing makua iyan?’ An sarong mapangganang karera tibaad magtao sa saindo nin falsong pakamate nin seguridad, na masagkod sa pagkadesganar o, mas maraot pa, sa kapahapahamak na pagbagsak.

Ipinaheheling kan aktuwal na mga eksperyensia na an marahay na ngaran sa Dios nagtatao nin orog nanggad na seguridad kisa marahay na ngaran sa tawo. Si Jehova sana an makatatao sa tawo nin regalo na buhay na daing sagkod. Kalabot dian an pagsurat kan satong ngaran, bakong sa sarong direktoryo na nakalaag an mga midbid sa sosyedad, kundi sa libro nin buhay nin Dios.​—Exodo 32:32; Kapahayagan 3:5.

Kun hahaleon nindo an mapagmawot na boot, paano nindo eebalwaron an saindong kamugtakan sa presente, asin ano an onesto nindong puedeng laoman sa ngapit? Mayo nin siisay man na yaon na saiya an gabos na bagay. Siring kan sinabi nin sarong madonong na Kristiano, “Kinaipuhan kong manodan na an buhay nungkang ini ASIN iyan kundi ini O iyan.” Ontok nguna nin kadikit asin basahon an kahon na “Iinestorya sa Benin.”

Ngonyan simbagon an mga hapot na ini: Ano an importanteng padudumanan, o pasohan, sa sakong buhay? Ano an pinakadirektang ruta tanganing makaabot dian? Posible daw na yaon ako sa sarong halawig, daing kasegurohan na likaw na dalan asin an talagang gusto ko asin an realistikong paagi na posible puedeng makua paagi sa bakong gayong komplikadong ruta?

Pakatao nin hatol dapit sa limitadong halaga nin materyal na mga bagay kun ikokomparar sa halaga nin espirituwal na mga bagay, sinabi ni Jesus na papagdanayon na “simple,” o “nakapokus” an mata. (Mateo 6:22; nota sa ibaba) Lininaw nia na an pangenot na mga bagay sa buhay iyo an espirituwal na mga prinsipyo sa buhay asin pasohan na nakasentro sa ngaran nin Dios asin sa Kahadean nia. (Mateo 6:​9, 10) An iba pang mga bagay bako nang gayong mahalaga o garo man sana mayo sa pokus.

An dakol na kamera ngonyan automatikong nagpopokus sa mga bagay na harayo sagkod harani. May tendensia daw kamong magin arog kaiyan? An haros gabos daw na bagay na hineheling nindo “nasa pokus”​—an boot sabihon, importante, kawiliwili asin, kun may pagmawot na boot, puedeng makua? Kun ini dawa ngani parsial na totoo, an importanteng bagay para sa mga Kristiano, an Kahadean, pasil sanang mawara sa kadakol na iba pang mga bagay, na kada saro inaagaw an saindong atension. An mapuersang konseho ni Jesus: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”—Mateo 6:33.

May Seguridad Ngonyan Asin Sagkod Lamang

Kita gabos puedeng nangangarap nin mas marahay na mga bagay para sa sadiri ta asin sa satong mga namomotan. Minsan siring, dahelan sa bagay na kita bakong sangkap, nabubuhay sa sarong bakong sangkap na kinaban, asin limitado an lawig nin buhay, napipiritan kitang limitaran an mga bagay na puedeng laoman niatong makua sa realistikong paagi. An sarong parasurat sa Biblia nagpaliwanag kaidtong rinibong taon na an nakaagi: “Nagbalik ako tanganing maheling sa sirong nin aldaw na mayo sa mabagsik an paorumbasan, ni sa makokosog an ralaban, ni sa madonong man an kakanon, ni sa mga may pakasabot man an kayamanan, ni duman man sa mga may kaaraman an biyaya; huli ta an panahon asin pagkanorongod nangyayari sa sainda gabos.”​—Eclesiastes 9:11.

Kun beses nababangkag kitang marhay sa pan-aroaldaw na nakasusumong rutina sa buhay kaya nalilingawan na niato na helingon an mas importanteng mga bagay manongod sa kun siisay kita asin ano talaga an kaipuhan niato tanganing magkaigwa nin tunay na seguridad. Estudyare an suanoy na mga tataramon na ini nin kadonongan: “Kun namomoot ka sa kuarta, nungka na ika makokontento; kun minamawot mong yumaman, nungka mong makukua an gabos na gusto mo. Iyan daing serbi. An tawong nagtatrabaho tibaad igwa o mayo nin igong makakakan, alagad minsan paano nakakatorog sia nin nanok sa banggi. Minsan siring, an tawong mayaman may kadakol kaya dai sia makatorog sa paghadit.” (Eclesiastes 5:​10, 12, Today’s English Version) Iyo, saen nakadepende an saindong seguridad?

Kun an kamugtakan nindo medyo kapareho kan bakong realistikong pangarap ni Josue, puede daw nindong sanglian an saindong mga plano? An tunay na mga namomoot sa saimo magigin mapagsuportar, arog kan pamilya asin mga katood ni Josue sa Kristianong kongregasyon. Tibaad makua nindo an orog na seguridad sa simpleng mga kamugtakan sa palibot kaiba kan mga namomoot sa saindo kisa sa siudad na kaiba kan mga tibaad nagmamaigot na aprobetsaran kamo.

Kun kamo may kaya, arog ni Liz asin kan saiyang agom, puede daw nindong areglaron an saindong estilo nin pamumuhay tanganing makagamit nin dugang pang panahon asin kosog sa pagtabang sa mga tawo, baga man mayaman o dukha, na makanood manongod sa Kahadean, an paagi tanganing makua an tunay na seguridad?

Kun kamo naghihingoang magkaigwa nin halangkaw na kamugtakan sa sosyedad, o lumangkaw an puesto sa trabaho, tibaad gusto nindong sadiosan na horophoropon kun ano an nagmomotibar sa saindo. Totoo, an mga kagianan na nakakamtan nindo tibaad nakakadugang sa kasiraman sa buhay. Pero, napagdadanay daw nindo an pokus sa Kahadean​​—an tunay na paagi na makua an permanenteng seguridad? Girumdomon an mga tataramon ni Jesus: “Igwang orog na kaogmahan sa pagtao kisa pag-ako.” (Gibo 20:35) Kun nakikikabtang kamo sa manlaenlaen na aktibidad sa Kristianong kongregasyon, maeeksperyensiahan nindo an nakakokontentong seguridad.

An mga lubos na nagtitiwala ki Jehova asin sa saiyang Kahadean nagtatalubo sa sarong nakaoogmang seguridad ngonyan asin nag-aantisipar sa lubos na seguridad sa ngapit. An salmista nagsabi: “Danay kong ibinubugtak si Jehova sa atubangan ko. Huli ta sia yaon sa sakong too, dai ako matatanyog. Kun siring naggagayagaya nanggad an sakong puso, asin an sakong kamurawayan magigin magayagaya. Siring man, an sako mismong laman mag-eerok sa katiwasayan.”​—Salmo 16:​8, 9.

[Kahon/Ritrato sa pahina 6]

Iinestorya sa Benin

An estoryang ini rinibong beses nang isinaysay sa dakol na baryasyon. Kasuarin pa sana, isinaysay kan sarong may edad nang taga baryo sa Benin, Solnopan na Aprika, an minasunod na bersion sa nagkapirang aki pa.

An parasira nag-uli sakay sa saiyang bangka asin sinabat nin sarong dayong eksperto sa negosyo na nagseserbi sa nagpoprogreso pa sanang nasyon na ini. Hinapot kan eksperto an parasira kun taano ta amay siang marhay na nag-uli. Sia nagsimbag na puede pa kutana siang maghaloy kundi igo na an nadakop nia para sa pangangaipo kan pamilya nia.

“Asin ngonyan, ano baga an ginigibo mo sa gabos na panahon mo?” an hapot kan eksperto.

An parasira nagsimbag: “Bueno, may panahon ako sa paninira. Nakikikawat ako sa sakong mga aki. Gabos kami nagdidiskanso kun mainit na an aldaw. Sa banggi, sarabay kaming namamanggi. Pagkatapos, nakikiiba ako sa sakong mga katood tanganing magdangog nin musika, asin iba pa.”

An eksperto biglang nagsabi: “Uya, ako may titulo sa unibersidad asin pinag-adalan an mga bagay na ini. Gusto takang tabangan. Maninigo na mas dakol na oras an gamiton mo sa paninira. Maganar ka nin mas dakula asin dai mahahaloy makakabakal ka nin mas dakulang baroto kisa sa bangkang ini. Sa pagkaigwa nin mas dakulang baroto, maganar ka pa nin mas dakula asin dai mahahaloy makakaya mo nang magkaigwa nin dakol na bapor na ginagamit sa paninira.”

“Asin ano pa?” an hapot kan parasira.

“Dangan, imbes na ipapabakal mo an saimong sira sa namamakyaw, puede ka nang makipagnegosyar nin direkta sa pabrika o dawa magpundar nin sadiri mong planta sa pagproseso nin sira. Puede mo nang bayaan an saimong baryo asin magbalyo ka sa Cotonou, o Paris, o Nueva York asin duman na an base mo sa pagpadalagan kaiyan. Puede mo nganing pag-isipan na ilaag an saimong negosyo sa bakalan nin aksiones asin magganar nin milyones.”

“Gurano kaya kalawig an gabos na iyan?” an hapot kan parasira.

“Tibaad 15 sagkod 20 taon,” an simbag kan eksperto.

“Asin ano pa?” an sabi pa kan parasira.

“Mapoon nang magin interesante an buhay,” an paliwanag kan eksperto. “Dangan puede ka nang magretiro. Puede mo nang bayaan an gabos na kasibotan na iyan asin magbalyo sa sarong harayong baryo.”

“Asin dangan ano na?” an hapot kan parasira.

“Dangan may panahon ka nang manira, makikawat sa saimong mga aki, magdiskanso kun mainit na an aldaw, mamanggi kaiba kan pamilya, asin makiibaiba sa mga katood para sa pagdangog nin musika.”

[Mga ritrato sa pahina 7]

An pag-asenso daw nagtatao nin seguridad?

[Mga ritrato sa pahina 8]

An saindong mga kapwa Kristiano talagang interesado sa saindong seguridad