“Rumani Kamo sa Dios, Asin Sia Marani sa Saindo”

Bago Asin Pakatapos—Kun Paano Binago kan Biblia an Tawong Ini

MUSIKA an buhay ni Rolf-Michael. Kinababangkagan nia an droga. Kan hoben pa sa Alemania, grabe siang mag-inom nin inomon na de alkohol asin daing pakundangan sa paggamit nin LSD, cocaina, hashish, asin iba pang kemikal na bagay na nakaaapekto sa isip.

Mantang nag-iismagul nin droga sa sarong nasyon sa Aprika, inarestar si Rolf-Michael asin nabilanggo nin 13 bulan. An pagkabilanggong iyan an nagtao sa saiya nin panahon na mag-isip manongod sa tunay na katuyohan nin buhay.

Desesperadong hinanap ni Rolf-Michael asin kan saiyang agom, si Ursula, an kahulogan nin buhay asin an katotoohan. Sa ibong kan nakadedesganar na mga eksperyensia mapadapit sa mga iglesiang Kristiano daa, may makosog sindang pagmawot na mamidbid an Dios. Alagad igwa sinda nin mga hapot asin mayo sindang nakukuang nakakokontentong simbag hale sa manlaenlaen na relihiosong grupo. Apuera kaini, an mga relihion na ini dai nakatatao nin mapuersang motibasyon tanganing bagohon an saindang buhay.

Sa kahurihurihi namidbid ni Rolf-Michael asin Ursula an mga Saksi ni Jehova. Pagkatapos na maponan an pag-adal sa Biblia, napahirong marhay an boot ni Rolf-Michael kan konsehong: “Rumani kamo sa Dios, asin sia marani sa saindo.” (Santiago 4:8) Determinado siang ‘haleon an daan na personalidad na komporme sa dati niang paggawe asin magsolog kan bagong personalidad, na linalang segun sa kabotan nin Dios sa tunay na katanosan asin kaimbodan.’​—Efeso 4:22-24.

Paano ikakasolog ni Rolf-Michael an bagong personalidad? Ipinaheling sa saiya sa Biblia na “paagi sa tamang kaaraman” an personalidad nin sarong indibiduwal puedeng ‘mabago segun sa ladawan kan Saro na naglalang kaiyan,’ na iyo si Jehova Dios.​—Colosas 3:9-11.

Mantang nagkukua sia nin tamang kaaraman, naghingoa si Rolf-Michael na ioyon an saiyang buhay sa mga prinsipyo sa Tataramon nin Dios. (Juan 17:3) Depisil na makabutas sa droga, alagad nasabotan ni Rolf-Michael an halaga kan pagdolok ki Jehova sa pamibi asin pakaeksperyensia kan saiyang tabang. (1 Juan 5:​14, 15) Orog pang nakatabang an dayupot na pakikiasosyar sa mga Saksi na ni Jehova, na nagmamaigot na gibohon an kabotan nin Dios.

Nakatabang man ki Rolf-Michael an kaaraman na an kinaban maagi sana asin an mga naggigibo kan kabotan nin Dios magdadanay sagkod lamang. Pinangyari kaini na pilion nia, bakong an panmadalian na pagkamoot sa kinaban, kundi an daing sagkod na bendisyon nin dayupot na relasyon sa mamomoton na Dios, si Jehova. (1 Juan 2:15-17) Napahirong marhay an boot ni Rolf-Michael kan mga tataramon sa Talinhaga 27:11: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” May pag-apresyar na sinabi nia: “Ipinaheheling kan bersikulong ini an rarom kan pagkamoot ni Jehova, huling tinatawan nia nin oportunidad an mga tawo na pagayagayahon an saiyang puso.”

Arog ni Rolf-Michael, kan saiyang agom, asin kan saindang tolong aki, ginatos na ribo an nakinabang sa pagsunod sa mga prinsipyo sa Biblia. Manonompongan an siring na mga indibiduwal sa mga kongregasyon kan Mga Saksi ni Jehova sa bilog na kinaban. Makamomondo, sa nagkapirang nasyon an mga Saksi putik na sinasahotan nin pagigin peligrosong sekta na nanlalaglag nin mga pamilya. Pinatutunayan kan eksperyensia ni Rolf-Michael an kabaliktaran kaiyan.​—Hebreo 4:12.

Sinasabi ni Rolf-Michael na an Mateo 6:​33, na nagsasadol sato na ipaorog an espirituwal na mga okupasyon, iyo an “kompas” kan saiyang pamilya, na nagtotokdo sa sainda sa tamang direksion. Sia asin an saiyang pamilya nagpapasalamat na marhay ki Jehova sa maogmang buhay pampamilya na nakakamtan ninda bilang mga Kristiano. Kapareho ninda an saboot kan salmista na nag-awit: “Ano an ibabayad ko ki Jehova para sa gabos na pakinabang na itinao nia sa sako?”​—Salmo 116:12.

[Blurb sa pahina 9]

Tinatawan nin Dios nin oportunidad an mga tawo na pagayagayahon an saiyang puso

[Kahon sa pahina 9]

Mga Prinsipyo sa Biblia na Epektibo

Kabilang sa mga prinsipyo sa Biblia na nakamotibar sa dakol na bayaan an nakagagadan na adiksion an minasunod:

“O kamong mga namomoot ki Jehova, ikaongis nindo an maraot.” (Salmo 97:10) Pakatapos makombensir kan karatan kan nakagagadan na mga gibo asin mapatalubo an tunay na pagkaongis dian, nanonompongan nin saro na mas pasil nang gibohon an nasosonoan nin Dios.

“Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.” (Talinhaga 13:20) Tanganing makasayuma sa droga asin sa iba pang nakakaadiktong kemikal na mga bagay, kaipuhan na maingat na pilion kan saro an saiyang mga kaibaiba. An pagkultibar kan pakikikatood sa mga Kristiano na masuportar sa saiyang desisyon totoong kapakipakinabang.

“Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:​6, 7) An siring na katoninongan nin puso asin isip dai makakamtan paagi sa ano pa man na bagay. Asin an mapagngayongayong pagsarig sa Dios makatatabang sa saro na atubangon an mga problema sa buhay na dai minagamit nin nakakaadiktong mga droga.