Binago kan Panuga na Paraisong Daga an Buhay Ko!

AN BUHAY KO KAIDTO:

Namundag ako sa Riga, an kabisera kan Latvia. An ina mi an nagpadakula samo kan tugang kong babayi. Maski ngani Katoliko si Mama, nagsisimba lang kami pag may relihiyosong mga kapiyestahan. Naniniwala ako sa sarong makapangyarihan, pero kan hoben pa ako, nalingling ako sa dakul na iba pang bagay.

Kan nagdadakula ako, nahiling kan ina ko na may abilidad ako na kalason an mga bagay dangan bilugon giraray iyan. Huling kadakul na bagay sa harong na puwedeng kalason, pirmi siyang nahahadit na bayaan akong solo duman. Kaya tinawan niya ako nin kawatan na metal construction kit, na may mga piyesang gustuhon kong bilugon dangan kalason. An interes kong iyan bagay sa saro ko pang kinawiwilihan—an pagmomotorsiklo. Ipinalista ako kan ina ko sa sarong karera nin motorsiklo na inaapod Zelta Mopēds (The Golden Moped). Nagpuon akong makipagkarera gamit an saradit na motorsiklong de-pedal, o moped, asin kan huri, darakulang motorsiklo na.

Nakanuod tulos ako asin dai nahaloy nagin mapangganang marhay sa marikas asin peligrosong isport na ini. Tulong beses akong nag-champion sa nagkapirang karera nin motorsiklo sa Latvia, asin duwang beses sa Baltic States Championship.

KUN PAANO BINAGO KAN BIBLIYA AN BUHAY KO:

Sa kasagsagan kan karera ko, may nakaulay na mga Saksi ni Jehova an nobya kong si Evija (na nagin agom ko). Nakakua siya nin nagkapirang literatura ninda na may kupon para sa gustong mag-adal sa Bibliya. Sinuratan niya an kupon asin ipinadara iyan. Dai nahaloy, duwang Saksi an nagbisita sa saiya, asin nagpuon siyang makipag-adal sa Bibliya sa sainda. Sa hiling ko marahay man iyan, pero kaidto, bako akong gayo interesado sa espirituwal na mga bagay.

Paghaloy-haloy, inagda ako kan mga Saksi na umiba asin magdangog sa pag-adal sa Bibliya kaiba ni Evija. Inako ko an alok asin nagustuhan ko an nadangog ko. An nangurugnang nakapahiro sa puso ko iyo an panuga kan Bibliya na paraisong daga. Halimbawa, ipinabasa sa sako an Salmo 37:10, 11, na nagsasabi: ‘Dai mahahaloy puon ngunyan mapapara an maraot; asin mapagkakalagkalag mo diyan sa namumugtakan niya, asin dai na matunga. Alagad an mga mahuyo [magmamana] kan daga, asin magkakararanga nin labi-labi sa katuninungan.’ Talagang nagustuhan ko an pangakong iyan.

Padagos na nagtalubo an interes ko sa espirituwal. Narealisar ko na kadakul kan kaputikan sa relihiyon. Sa kabaliktaran, napahanga ako sa mga itinutukdo kan Bibliya huling nakakaginhawa an pagigin lohikal asin klaro kaiyan.

Sa padagos kong pag-adal kan Bibliya, naaraman ko kun gurano kadakula an pagpapahalaga ni Jehova sa buhay asin kun gurano iyan kahalaga sa saiya. (Salmo 36:9) Nagkaigwa iyan nin epekto sa pakikipagkarera ko—habo ko nang isapeligro an buhay ko. Imbes, gusto kong gamiton an buhay ko para pamurawayon si Jehova. Kaya bako nang importante sa sako an kabantugan, kaumawan, asin kaugmahan sa pakikipagkarera sa motorsiklo.

Kan 1996, nag-atender ako sa internasyonal na kumbensiyon kan Mga Saksi ni Jehova sa Tallinn, Estonia, harani sa istadyum kun sain ako parating nakikipagkarera kaidto sa motorsiklo. Sa kumbensiyon, nahiling ko an mga tawo hali sa dakul na nasyon na nagtitiripon na may pagkauruyon asin katuninungan. Halimbawa, kan nawara an sadit na bag nin sarong babaying Saksi, naisip ko na dai na niya idto mahihiling. Pero, dai nahaloy, nakua iyan nin sarong Saksi asin ibinalik iyan na mayong nawara. Nagngalas nanggad ako! Nasasabutan ko na ngunyan na talagang namumuhay an mga Saksi suno sa halangkaw na mga pamantayan kan Bibliya. Padagos kaming nag-uswag ni Evija sa pag-adal sa Bibliya, asin kan 1997 nabawtismuhan kami bilang mga Saksi ni Jehova.

KUN PAANO AKO NAKINABANG:

Nagadan an nagkapira kong amigo huli sa agresibo asin peligrosong pamumuhay gamit an motorsiklo. Sa pag-adal kan Bibliya, nasabutan ko na may paninimbagan ako sa Kagtao nin buhay, si Jehova. An pakasabot na iyan an nagligtas gayod sa buhay ko.

Sa laog nin apat na taon, nagkapribilehiyo kami ni Evija na maglingkod bilang bilog na panahon na ministro sa sangang opisina kan Mga Saksi ni Jehova sa Riga. Magaya-gaya kami ngunyan na pinapadakula an aki ming babayi na si Alise, asin tinatabangan siya na magdakulang namumutan si Jehova. Sarong aldaw kada semana, pribilehiyo ko man na maglingkod sa opisina nin pagtradusir para hirahayon an mga awto asin iba pang bagay na naraot. Talagang nauugma ako na gamiton sa marahay na paagi an abilidad na nanudan ko kan aki pa ako! Iyo, pigkakalas ko pa man giraray an mga bagay dangan binibilog iyan.

Huli sa nanudan ko sa Bibliya, pinapahalagahan kong marhay an pribilehiyo na magpatotoo dapit sa solamenteng tunay na Diyos kaiba kan pamilya ko. Tunay nanggad na binago kan panuga na paraisong daga an buhay ko!