Pakikinabang sa Pagkuyog sa Banal na Instruksion
1 Mientras na orog niatong pinagmamasdan an karungawan nin sumbikalan na katawohan, orog niatong nasasabotan kun gurano kapakipakinabang na magin makinuyog sa banal na instruksion. An pilosopiya kan kinaban na gibohon-mo-an-gusto-mo nagtao sa dakol na nagsusuportar dian nin dai kinakaipuhan na pagsakit. Minsan siring, si Jesu-Cristo nagtao kan arogan para sa mga Kristiano. Ipinaheheling kan Biblia na sia perming makinuyog sa saiyang Ama, asin huli sa kaimbodan na ini sia tinawan nin dakulang balos.—Juan 8:29; Heb. 5:8; Fil. 2:7-11.
2 An “Pakikinabang sa Pagkuyog sa Banal na Instruksion” iyo an tema kan programa sa espesyal na aldaw nin asamblea na mapoon sa Marso. An praktikal na mga suhestion asin napapanahon na hatol itatao tanganing matabangan kita sa laen-laen na kabtang nin Kristianong pamumuhay. Halimbawa: Paano matatabangan nin mga magurang an saindang mga aki na mangapot nin marigon sa katotoohan asin isapuso iyan? Paano madudugangan kan lambang miembro nin pamilya an saiyang kagayagayahan sa paglilingkod ki Jehova? Ano an magigibo kan lambang miembro kan kongregasyon na magtatao nin pakinabang sa saiya bilang indibiduwal asin sa organisasyon sa kabilogan? Ini nagkapira sa mga bagay na pag-oolayan sa programa kan bagong espesyal na aldaw nin asamblea.
3 Itatao an atension sa halaga nin pagsunod sa banal na instruksion kun napapaatubang sa mga pagbalo sa Kristianong pagkuyog may koneksion sa mga among asin kun nakikipag-olay sa haralangkaw na kapangyarihan. Mantang kita napalilibotan nin tampalasan na sosyedad, an mga Kristiano dapat na mag-ingat na papagdanayon an Makakasuratan na punto-de-vista manongod sa mga kapangyarihan na iyan asin likayan an salang mga kaisipan na lakop sa kinaban ngonyan.
4 May kadikit na pagliliwat sa iskedyul kan programa. Sa 1989, an sumaryo kan Torrengbantayan ibubugtak sa programa baga man iyan gibohon sa Sabado o Domingo. Ini nangangahulogan na an mga kongregasyon na sa Sabado an espesyal na aldaw nin asamblea dai mag-iiskedyul nin Pag-adal sa Torrengbantayan o pagtiripon-publiko sa masunod na aldaw. Imbes, an kamagurangan makapag-oorganisar nin dakulang pangrupong paghuhulit.
5 Nadangog an may pag-apresyar na mga komento sa kun gurano nagin kapakipakinabang an enot na espesyal na aldaw nin asamblea. Dakol an nadagka asin napakosog kan marahayon na espirituwal na pagtotokdo manongod sa personal na pag-adal sa Biblia asin kan impormasyon manongod sa pag-oswag kan organisasyon.
6 Daing duwa-duwa na an programa sa espesyal na aldaw nin asamblea para sa 1989 magtatao man sato nin dakulang pakinabang mantang hinihingoa niatong arogon an satong Arogan, si Jesu-Cristo. Dai pagpalihison an arin man na kabtang kaiyan. Kita logod gabos padagos na makinabang sa pagkuyog sa banal na instruksion.—Heb. 10:23-25.