“Tataramon na Itinaram sa Tamang Kapanahonan”
1 Saro daw na angat para saindo an paghiras sa iba kan mensahe nin buhay? Iniisip daw nindo na dapat na kamo may sabihon na hararom tangani na matudok an isip kan mga naghihinanyog sa saindo? Kan sugoon ni Jesus an saiyang mga disipulo, sia nagsabi sainda: “Sa pagduman nindo, maghulit kamo, na nagsasabi, ‘An kahadean kan kalangitan naghaharani na.’” (Mat. 10:7) Bakong komplikado an mensahe asin madaling ihiras. Bako man na laen ngonyan.
2 Sa parate pira sanang tataramon an kaipuhan tangani na makapoon nin pag-orolay. Kan manuparan ni Felipe an kapon na Etiope, hinapot nia ini: “Ano nasasabotan mo talaga an binabasa mo?” (Gibo 8:30) Kanigoan kapakipakinabang na pag-orolay an ibinunga kan “tataramon na itinaram sa tamang kapanahonan”!—Tal. 25:11.
3 Puede man kamong gumamit nin kaagid na pagdolok sa saindong ministeryo. Paano? Paagi sa pagigin mapagmasid asin pagpili nin mga tataramon na angay sa mga sirkunstansia. Maghapot asin maghinanyog sa simbag.
4 Nagkapirang Pundamental na Hapot: Tangani na makapoon nin pag-orolay, puede nindong probaran an arin man sa mga hapot na ini:
◼ “Ginagamit daw nindo an Pamibi kan Kagurangnan (o, Ama Niamo) sa pagsamba nindo?” (Mat. 6:9, 10) Sambiton an sarong kabtang, dangan magsabi: “May mga naghahapot, ‘Ano an ngaran nin Dios na sinabi ni Jesus na dapat santipikaron (o, pakangbanalon)?’ An iba naghahapot, ‘Ano an Kahadean na sinabi ni Jesus na maninigo niatong ipamibi?’ Nanompongan na daw nindo an nakakokontentong simbag sa mga hapot na ini?”
◼ “Napag-isip-isip na daw nindo: ‘Ano an kahulogan nin buhay?’” Ipaheling na iyan konektado sa kaaraman dapit sa Dios.—Ecl. 12:13; Juan 17:3.
◼ “Naniniwala daw kamo na hahaleon pa an kagadanan?” Gamiton an Isaias 25:8 asin Kapahayagan 21:4 tangani na makatao nin mapagtitiwalaan na simbag.
◼ “Igwa daw nin simpleng solusyon sa grabeng kariribokan sa kinaban?” Ipaheling na an Dios nagtotokdo na ‘kamotan an saimong kapwa.’—Mat. 22:39.
◼ “Lalaglagon daw nin kosmikong grabeng kapahamakan an satong daga sa maabot na panahon?” Ihiras an panuga sa Biblia na an daga magdadanay sagkod lamang.—Sal. 104:5.
5 Iatubang an maogmang bareta sa simple, direktang paagi asin may maboot na pagdolok. Bebendisyonan ni Jehova an saindong mga paghihingoa na ihiras sa iba an dawa sarong “tataramon” kan katotoohan.