Itao Niato Gabos an Onra ki Jehova Asin sa Saiyang Aki
Kun Paano Makikinabang nin Mas Lubos an Gabos na Maatender sa Memorial sa Abril 8
1 Sairisay ngonyan an tinatawan nin espesyal na onra? Idtong an mga nahaman labi-labing pinahahalagahan kan kinaban. Minsan siring, sa kadaklan na pangyayari, nalilingawan tolos an saindang mga gibo. Alagad kumusta man an mga gibo na tunay na kapakipakinabang sa gabos na tawo? An pinakanakalalabi kaini tatawan niato nin maingat na gayong atension mantang isineselebrar niato an Pamanggihan nin Kagurangnan pagkasolnop kan saldang sa Abril 8, 2001.
2 Siisay an angay sa pinakahalangkaw na onra? An Biblia minasimbag: “Maninigo ka, Jehova, . . . na mag-ako kan kamurawayan asin kan onra patin kan kapangyarihan, huli ta linalang mo an gabos na bagay.” (Kap. 4:11) Bilang an Kaglalang, si Jehova an Soberanong Namamahala sa uniberso. An saiyang pagigin angay na tawan nin onra nungkang matatapos!—1 Tim. 1:17.
3 Si Jesu-Cristo, an Aki nin Dios, naggibo nin mahalagang mga gibo na magtatao nin daing katapusan na mga bendisyon sa katawohan. Sangkap niang inarog an saiyang Ama. (Juan 5:19) An saiyang daing depektong pagkuyog asin fiel na paglilingkod pinangyari sia na magin “angay na mag-ako kan kapangyarihan asin kayamanan asin kadonongan asin kosog asin dangog asin kamurawayan patin pag-omaw.” (Kap. 5:12) Tinawan sia kan saiyang Ama nin onra paagi sa pagpatukaw sa saiya sa trono bilang Hade. (Sal. 2:6-8) Kun para sa sato, magkakaigwa kita nin oportunidad na tawan nin onra an Ama sagkod an Aki mantang satong isineselebrar an Pamanggihan nin Kagurangnan sa Abril 8, 2001.
4 Makamomondo, medyo kadikit sa kasaysayan nin tawo an nagtao nin onra na nanonongod ki Jehova asin sa saiyang Aki. Kun beses, dawa an suanoy na banwaan nin Dios, an mga Israelita, nagtao nin paramas sanang paglilingkod ki Jehova. Ini hayag na pagkadaing galang. (Mal. 1:6) An tamang paggalang naghahagad nin fiel na pagkuyog basado sa pagkamoot asin sa pag-apresyar sa gabos na ginibo para sa sato ni Jehova asin kan saiyang Aki. An pagtao nin siring na onra asin paggalang nangangahulogan na ipinaheheling niato an diosnon na pagkatakot asin reberensia, na rinerekonoser si Jehova asin si Jesus sa gabos niatong dalan. Hinihingoa kan Kristianong kongregasyon na tokdoan asin tabangan an iba na gibohon man iyan.
5 Sarong Espesyal na Okasyon na Ikapaheheling an Onra: An pagselebrar kan Memorial iyo an pinakamakahulogan na pagtiripon kan banwaan ni Jehova kada taon. Maninigong magin presente an gabos na may pagmawot na maglingkod asin magtaong onra ki Jehova. (Luc. 22:19) Inaantisipar niato na dugang pa sa 6 milyones na aktibong Saksi, madudugangan kan mga interesado an kabilangan nin mga maatender sagkod sa labing 14 milyones. Kanigoan karahay na oportunidad na tawan nin onra an satong langitnon na Ama! Minsan ngani an pagselebrar nakapokus ki Jesus, an onra asin paggalang na ipinaheling sa nahaman nia nagpapamuraway sa Ama, na nagsugo sa saiya.—Juan 5:23.
6 Ano an magigibo niato tangani na suportaran an espesyal na okasyon na ini? Matatabangan niato an bagohan na mga interesado na makinabang nin lubos. Sadolon sinda na umatender, asin kun kaipuhan, magtao nin maboot na tabang na makaabot sinda duman. Ipaliwanag an katuyohan kan diskurso. Ipamidbid sinda sa iba. An naheheling asin nadadangog ninda puedeng magpahiro sa sainda na hingoahon na makiiba sa sato sa pagtaong onra ki Jehova.
7 Dai pagmenuson an epekto kan programa. Ini an nagin reaksion nin sarong estudyante sa unibersidad: “Dakol na beses na akong nag-atender nin Komunyon sa sakong iglesia, alagad ini laen nanggad. Naheheling ko na ini nanggad an sinasabi kan Biblia, asin sa heling ko nasa saindo an katotoohan.” Nagpoon siang umatender nin regular sa mga pagtiripon asin dai nahaloy nabautismohan.
8 Tabangan an mga Bagohan na Umoswag: Tawan nin atension an mga bagohan na maatender sa Memorial, asin dalawon sinda tolos-tolos pagkatapos tangani na marepaso an nakagiginhawang mga bagay na nanodan asin namasdan ninda. Ipaaram sa sainda an iba pang pagtiripon, kun saen madudugangan ninda an saindang kaaraman sa Biblia. An pagrepaso sa kapitulo 17 kan librong Kaaraman, “Makanompong nin Katiwasayan sa Tahaw kan Banwaan nin Dios,” ipaheheling sa sainda an mahiwas an sakop na espirituwal na mga probisyon na itinatao kan kongregasyon, na pasil nindang makukua. Iareglo na dalanon ninda an bagong video na Our Whole Association of Brothers tangani na maheling ninda mismo an pagkasararo, kagayagayahan, asin kaigotan kan banwaan ni Jehova!
9 Importante na manodan kan mga interesado kun paano ninda personalmenteng ikapaheheling an onra asin paggalang ki Jehova. Ipaliwanag na an odok sa pusong pamibi nakapaoogma ki Jehova asin sarong dayaday na gikanan nin espirituwal na kaginhawahan. (1 Juan 5:14) Ginagamit an leksion 8 sagkod 12 sa brosyur na Kahagadan, sabihon kun ano an klase nin gawe-gawe na nagtataong onra ki Jehova. Paagi sa pagtokar kan sinasabi sa bagong brosyur na Mga Saksi ni Jehova, sa pahina 30-1, parigonon an boot kan mga bagohan na isip-isipon an manongod sa posibilidad na magtaong onra ki Jehova paagi sa personal na pakikikabtang sa gibohon na paghuhulit.
10 An pag-apresyar sa atang ni Jesus asin sa satong pribilehio na maglingkod bilang saiyang mga disipulo nagtataong onra sa Ama asin nagtataong bendisyon sa iba. Nanuga si Jesus: “Kun an siisay man boot na maglingkod sa sako, tatawan sia nin onra kan Ama.”—Juan 12:26.