Tabangan an Iba na Magin mga Katood nin Dios
1 Ngonyan, an mga tawo hale sa gabos na nasyon tinotokdoan manongod sa mga dalan ni Jehova. (Isa. 2:2, 3) Minsan siring, tanganing an mga iyan ‘mamunga na may pakatagal,’ dapat nindang kamotan si Jehova. (Luc. 8:15; Mar. 12:30) Kun mayo nin siring na pagkamoot, dai sinda magkakaigwa kan kosog na labanan an nakakaraot na mga impluwensia o kan kosog nin boot na gibohon an tama. An sarong paagi na matabangan an iba na pataluboon an marahay na relasyon ki Jehova iyo an pagpakosog sa sainda na apresyaron an saiyang mga kualidad. Pakosogon nindo an saindang boot na pag-isipan na marhay an impormasyon sa librong Rumani ki Jehova.
2 An Saindong Halimbawa: An saindong personal na gawe-gawe puedeng magkaigwa nin mapuersang epekto sa puso kan mga inaadalan sa Biblia. Kun naheheling ninda na iniingatan nindo an saindong pakikikatood ki Jehova asin naheheling ninda kun paano naaapektaran kaiyan an saindong buhay, tibaad mamotibar sinda mismo na pataluboon an siring na personal na relasyon. (Luc. 6:40) Tunay nanggad, an satong halimbawa parateng mas dakula an impluwensia sa iba kisa sa satong sinasabi.
3 An pangenot na paagi na matotokdoan nin mga magurang an saindang mga aki na kamotan si Jehova iyo an saindang halimbawa. (Deut. 6:4-9) An sarong mag-agom na nagmamawot na mapadakula sa katotoohan an saindang mga aki naghagad nin sadol sa mapangganang mga magurang. “An gabos na kinaolay ko nagsabi na pangenot an halimbawa nin mga magurang,” an sabi kan agom na lalaki. Sa siring, paagi sa bilog na pamumuhay ninda, an mga magurang makakatao sa saindang mga aki nin buhay na halimbawa kun ano an kahulogan nin pagigin “katood ni Jehova.”—Sant. 2:23.
4 Odok sa Pusong Pamibi: Matatabangan man nindo an iba na pataluboon an pakikikatood ki Jehova paagi sa pagtotokdo sa sainda na mamibi gikan sa puso. Puede nindong darahon an atension ninda sa modelong pamibi ni Jesus, saka sa dakol na odok na pamibi na nakarekord sa Kasuratan. (Mat. 6:9, 10) Paagi sa saindo mismong mga pamibi, matotokdoan nindong mamibi an saindong mga aki asin inaadalan sa Biblia. Kun nadadangog ninda an saindong odok sa pusong mga kapahayagan, naaaraman ninda an mga saboot nindo dapit ki Jehova. Parigonon nindo an saindang boot na ‘magmaigot sa pamimibi’ kun napapaatubang sinda sa mga pagbalo. (Roma 12:12) Mantang naeeksperyensiahan ninda an tabang ni Jehova sa mga panahon nin pangangaipo, sinda magtitiwala asin mamomoot sa saiya bilang tunay na katood.—Salmo 34:8; Fil. 4:6, 7.