“Ipaheling Nindo na Kamo Mapagpasalamat”
1 Kan paomayan ni Jesus an sampulong daoton, saro sana sa sainda an nagbalik tanganing magpasalamat. Si Jesus naghapot: “An sampulo nagkarilinigan, bakong iyo? Kun siring, haen na an siyam?” (Luc. 17:11-19) Mahalaga nanggad na magin mapag-apresyar kita asin ipaheling niato na kita mapagpasalamat sa lambang marahay na balaog asin sangkap na regalo na itinatao sa sato kan satong matinao saka mamomoton na langitnon na Ama, si Jehova Dios!—Col. 3:15; Sant. 1:17.
2 Ano an nagkapirang bagay na maninigo kitang magin mapagpasalamat? Inaapresyar niato an pantubos, an kadarudakulaing regalo nin Dios sa katawohan. (Juan 3:16) Mapagpasalamat man kita ki Jehova huli ta dinagka nia kita sa saiya. (Juan 6:44) An satong pagkasararo bilang mga Kristiano iyo an saro pang dahelan na magin mapagpasalamat. (Sal. 133:1-3) Daing duda na makakaisip kamo nin dakol na iba pang regalo hale ki Jehova. Dai niato noarin man gugustohon na magin arog kan daing utang na boot na mga Israelita na liningawan an mga gibo ni Jehova para sa sainda!—Sal. 106:12, 13.
3 Ipaheling an Pagigin Mapagpasalamat: Minsan ngani tibaad inapresyar kan gabos na sampulong daoton an ginibo ni Jesus para sa sainda, saro sana an nagpaheling na sia mapagpasalamat. (Luc. 17:15) Kaagid kaiyan, ipinapaheling niato an satong pag-apresyar paagi sa maigot na pakikikabtang sa ministeryo. Kun talagang mapagpasalamat kita sa gabos na ginigibo kan satong mamomoton na langitnon na Ama, mapapahiro an satong puso na arogon an saiyang pagkamoot asin pagigin buka an palad paagi sa pagsabi sa iba manongod sa saiya. (Luc. 6:45) Dangan, mantang isinasaysay niato sa iba an ‘makangangalas na mga gibo ni Jehova asin an saiyang mga paghorophorop sa sato,’ matalubo an satong pagkamoot asin pag-apresyar ki Jehova.—Sal. 40:5.
4 Itadom sa Iba an Pag-apresyar: Maninigo kitang magin listo na tabangan an satong mga aki asin inaadalan sa Biblia na mapatalubo an pag-apresyar. Dakol an oportunidad kan mga magurang na gibohon ini, arog baga kun ikinakaogma an mga linalang ni Jehova mantang kaiba an saindang mga aki. (Roma 1:20) Kun nagkokondukta nin pag-adal sa Biblia, puede niatong hapoton an satong inaadalan sa Biblia, “Ano an sinasabi kaini sa sato manongod sa kun anong klaseng persona si Jehova?” Mantang nagtatalubo an pag-apresyar kan inaadalan sa Biblia, matalubo man an saiyang pagkamoot sa Dios asin an saiyang determinasyon na paogmahon Sia.
5 Sa huring mga aldaw na ini, dakol an daing pag-apresyar asin daing utang na boot. (2 Tim. 3:1, 2) Siertong nagpapaogma nanggad ki Jehova na maheling an saiyang dusay na mga lingkod na nagpapaheling nin pagigin mapagpasalamat paagi sa saindang maigot na pakikikabtang sa ministeryo!—Sant. 1:22-25.