‘Itao an Kalag Nindo’ sa Saindong mga Inaadalan sa Biblia
1. Ano an kaipuhan tanganing matabangan an sarong inaadalan sa Biblia?
1 Tanganing matabangan an sarong inaadalan sa Biblia na magdusay, bako sanang pagkondukta sa saiya nin regular na pag-adal sa Biblia an kaipuhan. An relasyon ni apostol Pablo sa saiyang mga tinotokdoan iinagid nia sa nagpapasusong ina na pinapadangat an saiyang mga aki. Naoogma man kita na itao an ‘satong kalag’ tanganing matabangan an satong mga inaadalan sa Biblia na tumalubo sa espirituwal.—1 Tes. 2:7-9.
2. Taano ta maninigo kitang magpaheling nin personal na interes, asin paano puedeng gibohon iyan?
2 Magpaheling nin Personal na Interes: Mantang inaaplikar nin sarong inaadalan sa Biblia an nanonodan nia, an saiyang konsensia mapahiro sa saiya na putolon an dayupot na pakikiasosyar sa mga dai nagsusunod sa mga prinsipyo kan Biblia. (1 Ped. 4:4) Tibaad isikwal sia kan saiyang pamilya. (Mat. 10:34-36) Makakatabang kita na mapanigoan an pakamate na may kulang paagi sa pagpaheling nin mamomoton na personal na interes. An sarong eksperyensiadong misyonero nagrekomendar: “Dai maghidaling humale pagkatapos kan pag-adal sa Biblia. Kun angay, magdanay asin makipag-olay-olay nguna.” Magin alisto na magtao nin praktikal na tabang sa inaadalan nindo. Halimbawa, puede daw nindo siang apodan sa telepono o dalawon kun sia may helang? Puede daw kamong tumukaw sa kataed kan inaadalan nindo sa Biblia durante kan mga pagtiripon asin tumabang sa pag-asikaso sa mga aki, kun angay?
3. Paano niato matatabangan an satong inaadalan sa Biblia na mag-ako nin pagparigon sa boot hale sa kongregasyon?
3 Tabang Hale sa Kongregasyon: Kun kamo nasa ministeryo na harani sa harong kan saindong inaadalan sa Biblia, taano ta dai magdalaw nin madali sana tanganing ipamidbid an kairiba nindo sa paglilingkod? Kun angay, sa panapanahon imbitaran an laen-laen na parahayag, kaiba an kamagurangan, tanganing ibanan kamo sa saindong pag-adal. Siring man, pagkatapos tolos na maestablisar an pag-adal, dagkahon an saindong inaadalan sa Biblia na mag-atender sa mga pagtiripon sa Kingdom Hall. Makakatabang ini sa saiya na ikaogma an nakakapakosog na pakikiasosyar sa mga miembro kan kongregasyon na tibaad magin espirituwal na pamilya nia.—Mar. 10:29, 30; Heb. 10:24, 25.
4. Paano puedeng balosan an satong kahigosan?
4 Labi-labi an kagayagayahan nin sarong magurang na daing kapagalan na nagtatabang sa saiyang mga aki sa espirituwal na paagi kun sinda naninindogan sa kampi ni Jehova asin naglalakaw sa katotoohan. (3 Juan 4) Makakaeksperyensia man kita nin kagayagayahan mantang itinatao niato an satong kalag tanganing matabangan an satong mga inaadalan sa Biblia.