“Dai Ka Matakot”
1. Anong mga kadepisilan na kapareho kan naeksperyensiahan ni Jeremias an tibaad personal na mapaatubang sa sato?
1 Kan si Jeremias isugo bilang propeta, sia nagsaboot na dai nia iyan kaya. Alagad ta inasegurar giraray sia ni Jehova, “dai ka matakot,” asin may kabootan na pinakosog sia na gibohon an saiyang asignasyon. (Jer. 1:6-10) Sa panahon niato, an pagkamasusupgon o kawaran nin kompiansa tibaad makaapektar sa satong pakikikabtang sa ministeryo. An pagkatakot sa kun ano an magigin reaksion o pagmansay nin mga tawo sa sato puedeng magin dahelan na kun beses dai kita magpatotoo. Paano niato mapapangganahan an siring na pagkatakot, asin anong personal na mga bendisyon an ibubunga kaiyan?
2. Paano makakatabang sa sato an pag-andam tanganing mainaan an satong takot sa ministeryo?
2 Patienot na Mag-andam: Makakatabang nin dakula an igong pag-andam tanganing mainaan an satong takot. Halimbawa, kun patienot niatong rinerepaso an dapit sa potensial na mga pampapondo sa orolay, magigin andam kitang simbagon an parateng mga pagkontra. (Tal. 15:28) Taano ta dai mag-ensayo durante kan Pampamilyang Pagsamba tanganing mag-andam para sa laen-laen na kadepisilan sa eskuelahan asin sa ministeryo?—1 Ped. 3:15.
3. Paano an pagtitiwala ki Jehova makakatabang sa sato na mapangganahan an takot?
3 Magtiwala ki Jehova: An seguradong pangontra sa takot iyo an pagsarig sa satong Dios. Ginagarantiyahan ni Jehova na tatabangan nia kita. (Isa. 41:10-13) Igwa daw nin maorog pang seguridad kisa kaiyan? Dugang pa, sinisierto sa sato ni Jesus na dawa may mangyaring dai linalaoman na mga situwasyon, an banal na espiritu nin Dios matabang sa sato na magpatotoo sa marahayon na paagi. (Mar. 13:11) Kun siring, regular na hagadon ki Jehova an saiyang banal na espiritu.—Luc. 11:13.
4. Anong mga bendisyon an ibinubunga kan pagmamaigot sa ministeryo sa ibong nin mga kadepisilan?
4 Mga Bendisyon: Mantang nagmamaigot kita sa ministeryo sa ibong nin mga kadepisilan, napapakosog kita na mapangganang atubangon an mga pagbalo sa ngapit. Napapatalubo niato an kosog nin boot asin pagkapusoan—mga karakteristiko kan mga pano kan banal na espiritu. (Gibo 4:31) Apuera kaini, mantang napapangganahan niato sa tabang ni Jehova an personal na pagkatakot, pinapakosog niato an satong pagtubod asin an satong pagtitiwala sa pagliligtas nia. (Isa. 33:2) Naeeksperyensiahan man niato an kagayagayahan asin satispaksion sa pakaaram na napapaogma niato an satong langitnon na Ama. (1 Ped. 4:13, 14) Kun siring, dai kita matakot na pusoan na ipahayag an mensahe kan Kahadean, na pirmeng may kompiansa sa pagsuportar ni Jehova!