Kingdom News Num. 38—Ididistribwir sa Enero!
1. Ano an mga ihinahapot nin mga tawo manungod sa mga gadan, asin paano iyan sisimbagon sa Enero?
1 An kagadanan sarong kaiwal kan gabos na tawo, ano man an saindang paniniwala. (1 Cor. 15:26) Dakul an naghahapot kun hain an mga gadan asin kun baga mahihiling ta pa sinda. Kaya, an mga kongregasyon sa bilog na kinaban makikikabtang sa sarong bulan na pagdistribwir kan Kingdom News Num. 38, na may titulong “Puwede Daw Talagang Mabuhay an mga Gadan?” An espesyal na kampanyang ini mapuon sa Enero 1, 2014 sa Pilipinas. Pagkatapos kan kampanya, gagamiton iyan sa ministeryo bilang tract.
2. Ano an disenyo kan Kingdom News Num. 38?
2 Kun Ano an Disenyo Kaiyan: An Kingdom News Num. 38 dinisenyo na tinitiklop nin pahalaba tanganing mahiling sa atubangan an nakakapukaw nin interes na titulo pati na an mga tataramon na “Masabi ka daw nin . . . iyo? dai? siguro?” Pag binuklat kan nagbabasa an Kingdom News, mahihiling niya kun ano an sinasabi kan Bibliya bilang simbag sa titulong hapot asin kun ano an mga pakinabang niya sa mga panuga kan Bibliya. Mahihiling man niya an mga dahilan kun taano ta puwede siyang maniwala sa Bibliya. Igwa nin interesanteng hapot sa likod kan Kingdom News na mapag-iisipan niya asin dinadagka siyang kumua nin dagdag pang kaaraman.
3. Paano ididistribwir an Kingdom News Num. 38?
3 Kun Paano Iyan Ididistribwir: An kampanyang ini kapareho kan pagdistribwir kan mga imbitasyon sa Memoryal asin pandistritong kumbensiyon. An mga elder an matao nin instruksiyon kun paano kokobrehan an teritoryo kan kongregasyon, sigun sa surat na naresibi ninda na may petsang Abril 1, 2013. An mga kongregasyon na sadit an teritoryo puwedeng mag-alok nin tabang sa kataraid na kongregasyon na mas dakula an teritoryo. Sa pagkua nin suplay nindo nin Kingdom News Num. 38, tandaan na kumua sana nguna kan gagamiton nindo para sa sarong semana. Durante kan kampanya, puwedeng manao kaiyan sa pagpapatotoo sa publiko kun natapos na an pagharong-harong sa gabos na teritoryo. Kun naipasakamot na an gabos na kopya bago matapos an bulan, gamiton an alok na literatura sa bulan na iyan. Sa inot na Sabado, makonsentrar kita sa espesyal na kampanya imbes na sa pagpuon nin pag-adal sa Bibliya. Sa katapusan kan semana, maninigo ta man na ialok an mga magasin kun angay sa kamugtakan. Nagpaplano na daw kamo na lubos na makikabtang sa espesyal na kampanyang ini?