Gibuhon na Arugan an mga Propeta—Si Oseas
1. Ano an posibleng naihapot na nindo sa saindong sadiri?
1 ‘Anong mga sakripisyo an handa kong gibuhon para ki Jehova?’ Posibleng naihapot na nindo iyan sa saindong sadiri kan pighurop-hurop nindo an saiyang abundang kabuutan asin pagkahirak. (Sal. 103:2-4; 116:12) Gikan sa buot na ginibo ni Oseas an ipinagbuot sa saiya ni Jehova, dawa ngani nangaipo iyan nin personal na pagsasakripisyo. Paano ta maaarog si Oseas?
2. Paano ta maaarog an magayon na halimbawa ni Oseas sa pagigin determinado sa paghuhulit?
2 Maghulit sa Masakit na Panahon: An mensahe ni Oseas panginot nang para sa sampulong tribong kahadian nin Israel, kun sain dikit pang mapara an tunay na pagsamba. Ginibo ni Hading Jeroboam II kun ano an maraot sa paghiling ni Jehova asin ipinagpadagos niya an pagsamba sa ugbon na baka na pinunan ni Jeroboam I. (2 Ha. 14:23, 24) Sa pamamahala kan nagsurunod na hadi, nagpararuro sa espirituwal an sampulong tribong kahadian sagkod na sa katapos-tapusi malaglag iyan kan 740 B.C.E. Alagad, sa ibong kan lakop na palsong pagsamba, si Oseas maimbod na naglingkod bilang propeta nin kisiyera 59 taon. Arog man daw kita kaiyan kadeterminado na maghulit dawa maglihis an mga taon, sa ibong nin kawaran nin interes o pagtumang?—2 Tim. 4:2.
3. Paano ilinadawan kan buhay ni Oseas an pagkahirak ni Jehova?
3 Magpokus sa Pagkahirak ni Jehova: Sinabi ni Jehova ki Oseas na mag-agom nin ‘sarong babaying parapasambay.’ (Os. 1:2) Nagkaaki siya nin lalaki sa saiyang agom na si Gomer, pero minalataw na kan huri nagkaaki pa ini nin duwa na bako siya an ama. An pagigin handa ni Oseas na patawadon an saiyang agom naglaladawan sa dakulang pagkahirak ni Jehova sa masumbikal na Israel kan sinda magsulsol. (Os. 3:1; Roma 9:22-26) Handa daw niyatong isakripisyo an personal na kagustuhan tanganing maipaaram sa gabos na klase nin tawo an pagkahirak ni Jehova?—1 Cor. 9:19-23.
4. Anong mga sakripisyo an puwede tang gibuhon para ki Jehova?
4 May mga lingkod ni Jehova na isinakripisyo an saindang magayon na trabaho para makatao nin mas dakul na panahon sa ministeryo. An iba nagdanay na daing agom o daing aki tanganing inuton an intereses kan Kahadian. Kun hinuhurop-hurop an buhay ni Oseas, tibaad maisip ta, ‘Dai ko kayang gibuhon an ginibo niya.’ Pero, miyentras na nagtatalubo an satong pagpapahalaga sa dai na kutana maninigong kabuutan ni Jehova asin nagsasarig sa saiyang banal na espiritu para sa kusog, puwede niya kitang gamiton sa mga paaging dai ta lamang naiisip na posible, arog kan ki Oseas.—Mat. 19:26; Fil. 2:13.