Si Jehova an Satong “Dakulang Kaugmahan”

1-2. (a) Sa anong sitwasyon napapaatubang an dakul ngunyan? (b) Ano an pag-uulayan ta sa artikulong ini?

AN DAKUL na tawo sa kinaban ngunyan ginigibo an gabos para makamtan an kaugmahan. Alagad, dai pa man giraray ninda makamtan an nagdadanay na kaugmahan. Dakul an napapangibabawan nin kamunduan asin nin pakamating daing saysay an buhay. An mga lingkod ni Jehova bakong libredo sa mga pagmating ini. Huling nabubuhay kita sa “huring mga aldaw,” inaasahan niyato na mapapaatubang kita sa masakit na mga sitwasyon na makakapahadit saka makakapamundong marhay sa sato.—2 Tim. 3:1.

² Sa artikulong ini, pag-uulayan ta kun ano an mga puwedeng makahali kan satong kaugmahan asin kun paano ta maibabalik an satong kaugmahan kun maiwara ta iyan. Pero aramon ta nguna an Gikanan nin tunay na kaugmahan asin kagaya-gayahan.

AN GIKANAN NIN TUNAY NA KAUGMAHAN ASIN KAGAYA-GAYAHAN

3. Ano an itinutukdo sa sato kan mga linalang manungod ki Jehova? (Hilingon man an mga ritrato.)

³ Si Jehova pirming maugma. Asin gusto niya na magin maugma kita. Kaya bakong makangangalas na mababanaag ta sa saiyang mga linalang an saiyang kaugmahan—halimbawa kaiyan an satong magayon na planeta, dakulon na manlain-lain na kulor sa palibot ta, makangirit na mga hiro kan mga hayop, asin an kadakul na masisiram na kakanon. Tunay nanggad na namumutan kita nin Diyos asin gusto niyang ikaugma ta an buhay!

Ugbon na elepante: Image © Romi Gamit/Shutterstock; siwong mga penguin: Vladimir Seliverstov/500px via Getty Images; ugbon na mga kanding: Rita Kochmarjova/stock.adobe.com; duwang lumod (dolphin): georgeclerk/E+ via Getty Images

4. (a) Paano si Jehova nagdadanay na maugma sa ibong kan nahihiling niyang pagsakit sa kinaban? (b) Ano an regalo ni Jehova sa sato? (Salmo 16:11)

⁴ Dawa ngani si Jehova an “maugmang Diyos,” aram niya nanggad an kakulugan asin kasakitan na naeeksperyensiyahan kan mga tawo sa kinaban. (1 Tim. 1:11) Pero dai niya tinugutan na mabawasan kan realidad na iyan an saiyang kaugmahan. Aram niya na an gabos na pagsakit temporaryo sana, asin siya mismo an nagtalaan kun nuarin matatapos iyan. Asin mapasensiya niyang hinahalat an aldaw na hahalion niya na an gabos na pagmundo asin pagsakit sagkod lamang. Mantang dai pa iyan nangyayari, nasasabutan ni Jehova an inaagihan ta asin gusto niyang tabangan kita. Paano niya kita tinatabangan? An sarong paagi iyo an pagtao niya sa sato kan regalong kaugmahan. (Basahon an Salmo 16:11.) Mangnuha kun paano niya tinawan kan regalong iyan an saiyang Aki, si Jesus.

5-6. Taano ta maugma si Jesus?

⁵ Sa gabos na linalang ni Jehova, si Jesus an pinakamaugma. Taano? Pag-isipan an duwang dahilan. (1) “Siya an ladawan kan Diyos na dai nahihiling” asin perpekto niyang naipapahiling an personalidad kan saiyang Ama sa gabos na aspekto. (Col. 1:15; hilingon an study note na “maligaya” sa 1 Timoteo 6:15.) (2) Si Jesus an pinakahaloy na nakaibanan kan saiyang Ama, an Gikanan nin kaugmahan.

⁶ Pirming maugma si Jesus sa paggibo kan ano man na ipinapagibo sa saiya kan saiyang Ama. (Tal. 8:30, 31; Juan 8:29) Huli kan saiyang kaimbudan, nakamtan niya an pabor asin pag-uyon ni Jehova.—Mat. 3:17.

7. Paano ta makakamtan an tunay na kaugmahan?

⁷ Arog ni Jesus, makakamtan man niyato an tunay na kaugmahan paagi sa pagrani ki Jehova, an Gikanan nin kaugmahan. Mantang mas dakul na panahon an ginagamit ta para makanuod manungod ki Jehova asin arugon siya, magigin mas maugma man kita. Makakamati man kita nin kaugmahan sa paggibo kan kabutan nin Diyos asin sa pakaaram na inuuyunan niya kita.a (Sal. 33:12) Pero paano kun nawawaran kita nin kaugmahan paminsan-minsan o tibaad pirmi pa ngani? Nangangahulugan daw iyan na mayo na sa sato an pag-uyon nin Diyos? Dai nanggad! Bako kitang perpekto asin may mga pagkakataon na nakakamati kita nin kakulugan, kamunduan, asin depresyon. Nasasabutan iyan ni Jehova. (Sal. 103:14) Pag-ulayan ta an mga puwedeng makahali kan satong kaugmahan asin kun paano ta maibabalik an satong kaugmahan.

DAI PAGTUGUTAN AN ANO MAN NA MAKAHALI KAN SAIMONG KAUGMAHAN

8. Paano puwedeng makaapektar sa sato an mga problema sa buhay?

⁸ Nakakahali nin Kaugmahan Num. 1: Mga problema sa buhay. Nagsasakit ka daw huli sa persekusyon, kalamidad, pagtios, hilang, o sa mga epekto nin paggurang? Puwedeng madali sanang mahali an satong kaugmahan pag napapaatubang sa arog kaiyan na mga problema, lalo na sa mga sitwasyon na haros mayo kitang ano man na magigibo o dai ta kontrolado. Kaya totoo an sinasabi kan Bibliya na “an kulog sa puso nakakapalupaypay sa espiritu.” (Tal. 15:13) Si Babis, sarong elder na nagadan an kasaro-sarui niyang tugang saka an gabos niyang magurang sa laog sana nin apat na taon, nagsabi: “Pagmati ko nagsosolo ako saka mayo nang makakatabang sako. May mga pagkakataon na nakakamati man ako nin grabeng pagkapurisaw huling gustong-gusto ko man kuta kaidtong makaibanan an mga magurang saka an tugang ko bago sinda nagadan pero dahil sa kadakul kong kaipuhan na asikasuhon, dai ko iyan nagibo.” An mga problema sa buhay puwede nanggad na makaubos kan satong kusog asin magin dahilan na pangluyahan kitang marhay nin buot.

9. Ano an makakatabang na maibalik ta an satong kaugmahan? (Jeremias 29:4-7, 10)

⁹ Ano an makakatabang na maibalik ta an satong kaugmahan? Maibabalik ta an satong kaugmahan paagi sa pagigin realistiko asin mapagpasalamat. Ipinapalakop kan kinaban an kaisipan na para magin maugma, dapat na perpekto daa an satong buhay—mayong ano man na problema. Pero bako iyan totoo. Halimbawa, ininstruksiyunan ni Jehova an mga Judiong idinistiyero sa Babilonya na akuon an bago nindang kamugtakan—na mga bihag na sinda sa ibang nasyon—asin na gibuhon an saindang pinakamakakaya na ikaugma an buhay sa ibong kan masakit na mga kamugtakan ninda diyan. (Basahon an Jeremias 29:4-7, 10.) An leksiyon? Hinguwahon na akuon an saimong kamugtakan, asin magin mapagpasalamat huli sa marahay na mga bagay sa buhay mo. Tandaan na dai ka papabayaan ni Jehova, tatabangan ka niya. (Sal. 63:7; 146:5) An sister na si Effie, na naparalisado huli sa sarong aksidente, nagsabi: “Nag-ako ako nin dakul na tabang asin suporta hali ki Jehova, sa sakong pamilya, saka sa kongregasyon. Kaya kun basta na sana akong nagsuko sa buhay, garo man sana bako akong mapagpasalamat sa sainda. Gusto kong ipahiling an sakong pasasalamat ki Jehova asin sa mga tugang huli sa dakulaon na naitabang ninda sa sako.”

10. Taano ta puwede kitang magin maugma dawa pag napapaatubang sa mga problema?

¹⁰ Dawa pag bakong marahay an kamugtakan ta o pag may nangyayaring marauton sa sato o sa pamilya ta, puwede pa man giraray kitang magin maugma.b (Sal. 126:5) Taano? Huling an satong kaugmahan dai nakadepende sa satong kamugtakan. Si Maria, sarong payunir, nagsabi: “An pagdanay na maugma mantang napapaatubang sa mga problema dai man nangangahulugan na pinupugulan mo an saimong mga namamatian. Imbes, nangangahulugan iyan na dai mo nalilingawan an mga panuga ni Jehova. Tatabangan kita kan satong Ama na magdanay na maugma.” Tandaan, gurano man kasakit kan saimong kamugtakan ngunyan, an gabos tang problema temporaryo sana—siring sa mga gira sa baybayon. Dai mahahaloy, mapapara iyan kan mga alon asin mayo nin matatadang ano man na senyales na dati yaon iyan.

11. Paano ka napapakusog kan halimbawa ni apostol Pablo?

¹¹ Paano kun nagpupuon na kitang mag-isip na an satong mga problema patunay na dai na kita inuuyunan ni Jehova? Tibaad makatabang kun iisip-isipon ta an manungod sa iba pang maimbod na mga lingkod ni Jehova na napaatubang sa masakiton na mga sitwasyon. Pag-isipan an halimbawa ni apostol Pablo. Si Jesus mismo an nagpili saiya na darahon an katotoohan pasiring “sa mga nasyon pati man sa mga hadi saka sa mga aki ni Israel.” (Gibo 9:15) Dakulang pribilehiyo nanggad iyan! Pero, dai man si Pablo nagkaigwa nin buhay na mayo nin ano man na problema. (2 Cor. 11:23-27) An mga problema daw ni Pablo na garo baga dai matapos-tapos patunay na dai na siya inuuyunan ni Jehova? Siyempre bako! Sa kabaliktaran, an saiyang pakatagal patunay na binebendisyunan siya ni Jehova. (Roma 5:3-5) Ngunyan, pag-isipan an saimong sitwasyon. Maimbod kang nagtatagal sa ibong kan gabos na problema na napapaatubang saimo. Kaya makakasigurado ka man na inuuyunan ka ni Jehova.

12. Paano puwedeng makahali sa satong kaugmahan an nasudyang mga linalauman?

¹² Nakakahali nin Kaugmahan Num. 2: Nasudyang mga linalauman. (Tal. 13:12) Huli sa satong pagkamuot asin pasasalamat ki Jehova, napapahiro kitang gumibo nin mga pasuhan sa paglilingkod niyato sa saiya. Pero, kun an mga pasuhan ta bakong realistiko sa satong kamugtakan, tibaad madisganar kita. (Tal. 17:22) Si Holly, sarong payunir, nagsabi: “Gusto ko kaidtong magklase sa School for Kingdom Evangelizers, maglingkod sa ibang nasyon, o magboluntaryo sa proyekto nin pagtugdok sa Ramapo. Pero huling nagbago an kamugtakan ko, dai ko na magigibo an mga pasuhan na iyan. Dahil diyan, nadisganar ako. Nakakapangluya sa buot pag may mga gusto kang gibuhon pero dai mo iyan magibo.” Dakul an nakakamati man nin arog kaiyan.

13. Kun nalilimitaran kan satong kamugtakan an mga kaya tang gibuhon, anong realistikong mga pasuhan an puwede tang abuton?

¹³ Ano an makakatabang na maibalik ta an satong kaugmahan? Tandaan na si Jehova bakong mapaghanap. An linalauman niya sa sato bakong sobra-sobra; ni ibinabasar niya man an satong halaga sa kun ano an nagigibo ta sa paglilingkod sa saiya. Gusto ni Jehova na magpahiling kita nin kababaan nin buot asin kaimbudan. (Mik. 6:8; 1 Cor. 4:2) Mas mahalaga sa saiya kun ano kita sa laog kisa sa kun ano an mga ginigibo ta. Kaya, rasonable daw kun mas labi an linalauman ta sa satong sadiri kisa sa linalauman sa sato ni Jehova?c Bako nanggad! Kaya kun nalilimitaran kan saimong kamugtakan an mga kaya mong gibuhon sa paglilingkod ki Jehova, hinguwahon na magpokus sa kun ano an mga kaya mong magibo. Puwede mo daw magin pasuhan na tumabang sa pagsasanay sa mga hoben, o pakusugon an mga may edad na o an iba pang mga tugang paagi sa pagdalaw sa sainda, pag-apod sa telepono, o dawa pag-text? Bebendisyunan ka ni Jehova nin kaugmahan mantang hinihinguwa mong abuton an arog kaiyan na makahulugan asin realistikong mga pasuhan! Asin isaisip man na dai na mahahaloy, magkakaigwa kita nin dakulon na oportunidad sa bagong kinaban ni Jehova na paglingkudan siya sa mga paaging dai ta lamang ngani maiimahinar! Si Holly, na sinambit kasubago, nagsabi kan huri: “Minapundo ako tapos iniisip-isip ko, ‘Magkakaigwa ako nin buhay na daing katapusan sa maabot.’ Sa tabang ni Jehova, magigibo kong mautob sa bagong kinaban an nagkapira sa mga pasuhan ko.”

14. Ano pa an puwedeng makahali kan satong kaugmahan?

¹⁴ Nakakahali nin Kaugmahan Num. 3: Sobrang pagpanigo sa sadiri. Ginagamit kan iba an social media para ipalakop an kaisipan na an tunay na kaugmahan asin pagkakontento nakakamtan paagi sa pagpaugma sa sadiri. Dinadagka an mga tawo na gibuhon na panginot sa saindang buhay an libangan, pag-shopping, asin pagpasyar sa ibang mga lugar. Bako man sala na ikaugma an mga bagay na iyan huling linalang kita ni Jehova sa paaging maaapresyar ta an magagayon na bagay. Pero, narealisar kan dakul na an mga bagay na iniisip nindang makakatao sainda nin kaugmahan iyo an nakakahali kaiyan. Si Eva, sarong payunir, nagsabi: “Pag an buhay mo nakasentro sa pagpaugma sa sadiri, mayo nin ano man na makakapakontento sa saimo.” An sobrang pagpanigo sa sadiri nakakaubos nin emosyonal asin pisikal na kusog saka minaresulta lang sa pagkadiskontento.

15. Ano an manunudan ta ki Hading Solomon?

¹⁵ Makakanuod kita sa eksperyensiya ni Hading Solomon kun manungod sa nakakamundong resulta kan sobrang pagpanigo sa sadiri. Pinurbaran niyang makamtan an kaugmahan paagi sa pagpanigo sa mga pagmawot niya, arog baga kan masisiram na kakanon, magagayon na musika, asin gabos na marahay na bagay na nababakal nin kuwarta kan panahon niya. Pero pagkadiskontento an nagin resulta kaiyan sa saiya. Sinabi niya: “Dai nakokontento an mata sa paghiling sana; ni nakokontento an talinga sa pagdangog sana.” (Ecl. 1:8; 2:1-11) An mga kaisipan kan kinaban manungod sa kun ano an nagtatao nin tunay na kaugmahan arog sa pekeng kuwarta. Garo baga may halaga an mga iyan, pero dai man kaiyan maitatao kun ano an iinaalok kaiyan sa sato.

16. Paano an pagtao sa iba makakatabang sa sato na maibalik an satong kaugmahan? (Hilingon man an mga ritrato.)

¹⁶ Ano an makakatabang na maibalik ta an satong kaugmahan? Itinukdo sa sato ni Jesus na “igwang urog na kaugmahan sa pagtao kisa sa pag-ako.” (Gibo 20:35) Sarong elder na an pangaran Alekos an nagsabi: “Hinihinguwa kong magpokus sa paggibo nin simpleng mga bagay para sa iba. Mantang mas nagtatao ako, mas nagigibo ko man na dai magparapokus sa sadiri ko, kaya nagigin maugma ako.” Ano an mga puwede mong gibuhon para sa iba? Kun may mahiling kang pinangluluyahan nin buot, hinguwahon na pakusugon siya. Tibaad dai mo man maresolberan an saiyang mga problema, pero puwede mo siyang maranga paagi sa pagdangog sa saiya nin may empatiya, pagigin mapagmalasakit, asin pagpagirumdom sa saiya na ipasa ki Jehova an saiyang pasan. (Sal. 55:22; 68:19) Puwede mo man siyang asiguraron na dai siya binayaan ni Jehova. (Sal. 37:28; Isa. 59:1) Puwede ka pa nganing mag-alok nin praktikal na mga bagay, arog kan pagluto para saiya nin kakanon o dawa ngani pag-iba sana saiya na maglakaw-lakaw. Agdahon siya na ibanan ka sa ministeryo huling makakapagian iyan sa pagmati niya. Tugutan si Jehova na gamiton ka para pakusugon an iba. An pagpokus sa iba imbes na sa satong sadiri matao sato nin tunay na kaugmahan!—Tal. 11:25.

17. Paano konektado ki Jehova an satong kaugmahan? (Salmo 43:4)

¹⁷ Puwede kitang magin tunay na maugma kun padagos kitang marani sa satong Ama sa langit. Inaasigurar sa sato kan Bibliya na si Jehova iyo an satuyang “dakulang kaugmahan.” (Basahon an Salmo 43:4.) Kaya ano man an inaagihan ta sa buhay, dai kita mahahadit o matatakot. Kaya lugod na magdanay kitang nakapokus ki Jehova, an dai nanggad nasusudyang Gikanan kan satong kaugmahan!—Sal. 144:15.