An Libro nin Job Makakatabang sa Saimo Pag Nag-aagi Ka nin Kasakitan

1-2. Taano ta marahay na basahon an libro nin Job?

NABASA mo na daw an libro nin Job dai pa sana nahahaloy? Dawa ngani an suanoy na librong ini isinurat mga 3,500 na taon na an nakaagi, sa parati ibinibilang ini na saro sa mga obra maestrang literatura sa kinaban. An mga tataramon na ginamit diyan madaling masabutan, magayon, asin nakakataros nin puso kaya sigun sa sarong reperensiya an kagsurat kaiyan “sarong henyo sa literatura.” Si Moises an nagsurat kan kahanga-hangang librong iyan, pero an Awtor talaga iyo an Diyos na Jehova.​—2 Tim. 3:16.

² Mahalagang parte kan Bibliya an libro nin Job. Taano? An sarong dahilan iyo na malinaw kaiyan na ihinahayag an dakulang isyu na napapaatubang sa gabos na intelihenteng linalang—an pagpakangbanal kan pangaran ni Jehova. Itinutukdo man kaiyan sa sato an manungod sa magagayon na kuwalidad ni Jehova, arog kan saiyang pagkamuot, kadunungan, hustisya, asin kapangyarihan. Halimbawa, 31 beses na sinambit si Jehova sa libro nin Job bilang an “Makakamhan sa Gabos.” Mas labi pa iyan kisa sa total na bilang kan pagsambit sa apod na iyan sa gabos na iba pang parte kan Kasuratan. Sinisimbag man sa libro nin Job an dakul na hapot sa buhay, kaiba na an hapot na haloy nang pinag-iisipan kan dakul: Taano ta tinutugutan nin Diyos an pagsakit?

3. Ano an nagkapira pang pakinabang na makukua ta sa pag-adal kan libro nin Job?

³ Kun paanong pag nasa tuktok kita nin bulod malinaw tang nahihiling an nasa palibot niyato, an libro nin Job nakakatabang man sa sato na hilingon an mga pagbalo sa buhay kauyon kan mas halangkaw o nakakalabing pagmansay ni Jehova. Hilingon ta kun paano makakatabang sa sato an libro nin Job pag nasa kasakitan kita. Maaaraman ta kun paano posibleng nakinabang an mga Israelita sa istorya manungod ki Job asin kun paano kita makikinabang diyan ngunyan. Aaramon ta man kun paano ta magagamit an salaysay na ini sa Bibliya para tabangan an iba.

TINUGUTAN NIN DIYOS NA MAGSAKIT SI JOB

4. Ano an dakulang pagkakalain ni Job saka kan mga Israelita sa Ehipto?

⁴ Kan panahon na nagsasakit an mga Israelita bilang mga uripon sa Ehipto, sarong lalaki na an pangaran Job an nakaistar sa daga nin Uz, na posibleng nasa sirangan kan Dagang Panuga asin sa norte kan Arabia. An nagkapira sa mga Israelita nagpuon nang magsamba sa mga idolo sa Ehipto. Alagad si Job bakong arog sa sainda, huling maimbod siyang naglingkod ki Jehova. (Jos. 24:14; Ezek. 20:8) Sinabi ni Jehova manungod ki Job: “Mayo siya nin kapareho sa daga.”a (Job 1:8) Mayamanon si Job asin iginagalang na marhay—siya an pinakaprominenteng tawo kaidto sa gabos na mga taga Sirangan. (Job 1:3) Siguradong angguton si Satanas na mahiling na an prominente asin maimpluwensiyang tawong ini maimbod na naglilingkod sa Diyos!

5. Taano ta tinugutan ni Jehova na magsakit si Job? (Job 1:​20-22; 2:​9, 10)

⁵ Hiningako ni Satanas na babayaan ni Job an tunay na pagsamba kun mapaatubang siya sa pagsakit. (Job 1:​7-11; 2:​2-5) Padangat na marhay ni Jehova si Job, pero an daing supog na paghihingako ni Satanas nagbangon nin dakul na mahahalagang isyu, kaya tinugutan ni Jehova si Satanas na purbaran na patunayan an hinihingako niya. (Job 1:​12-19; 2:​6-8) Kinua ni Satanas an mga ataman na hayop ni Job, ginadan an saiyang sampulong aki, asin pinaabutan siya nin makulugon na mga pigsa puon sa payo sagkod sa mga muro kan saiyang bitis. Alagad dai nagin mapanggana an maringison na mga pagpurbar na ini ni Satanas na rauton an integridad ni Job. (Basahon an Job 1:​20-22; 2:​9, 10.) Pag-abot nin panahon, ibinalik ni Jehova an marahay na salud ni Job, an saiyang kayamanan, asin reputasyon. Tinawan Niya man si Job nin sampulo pang aki. Milagroso man na pinalawig ni Jehova an buhay ni Job nin 140 pang taon, kaya nahiling niya pa an abot sa ikaapat na henerasyon kan saiyang mga gikan. (Job 42:​10-13, 16) Paano posibleng nakinabang sa salaysay na ini an mga lingkod ni Jehova kaidto, asin paano kita makikinabang diyan ngunyan?

6. Paano posibleng nakinabang an mga Israelita sa istorya manungod ki Job? (Hilingon man an ritrato.)

⁶ Kun paano posibleng nakinabang an mga Israelita. Masakit an nagin buhay kan mga Israelita sa Ehipto. Halimbawa, kan hoben pa si Josue asin Caleb dakul na taon sindang nagin mga uripon. Dangan huli sa salang nagibo kan iba, naglagaw-lagaw sinda sa kaawagan sa laog nin 40 taon. Kun aram kan mga Israelita an istorya manungod sa mga pagbalong napaatubang ki Job asin an nagin buhay niya pagkatapos kaiyan, siguradong makakatabang iyan sa sainda, pati man sa maarabot na mga henerasyon nin mga Israelita, na masabutan kun siisay talaga an pinakakawsa nin pagsakit. Mas masasabutan man ninda kun taano ta tinutugutan nin Diyos an pagsakit asin kun gurano kahalaga sa saiya an integridad asin kaimbudan nin mga tawo.

7-8. Paano makakatabang an libro nin Job sa mga napapaatubang sa kasakitan? Magsaysay nin sarong eksperyensiya.

⁷ Kun paano kita makikinabang. Nakakamundo, dakul na tawo ngunyan an nawaran na nin pagtubod sa Diyos huling dai ninda masabutan kun taano ta nangyayari sa marahay na mga tawo an maraot na mga bagay. Pag-isipan an eksperyensiya ni Hazelb na taga Rwanda. Kan siya aki pa, nagtutubod siya sa Diyos. Pero nagbago an mga bagay-bagay. Nagdiborsiyo an mga magurang niya, dangan nag-agom giraray an saiyang ina. Maraot an nagin pagtratar sa saiya kan padrasto niya. Kan tin-edyer siya, linupigan siya nin sarong lalaki. Nagduman si Hazel sa lugar kun sain siya nagsasamba, pero dai man siya diyan natawan kan karangahan na kaipuhan niya. Kan huri, naggibo si Hazel nin surat para sa Diyos. Diyan sinabi niya: “Diyos ko, nangadyi ako saimo, hininguwa ko man na gumibo nin marahay, pero maraot an ibinalos mo. Babayaan ko na ika, gigibuhon ko kun an ano man an makakapaugma sa sako.” Namumundo nanggad kita para sa mga arog ni Hazel na napaniwalang an Diyos an kawsa kan saindang pagsakit!

⁸ Pero nanudan niyato sa salaysay sa libro nin Job na bako an Diyos an kawsa nin pagsakit kundi si Satanas! Nanudan ta man na dai niyato dapat pag-isipon na inaani man sana kan mga nagsasakit kun ano an itinanom ninda. Sinasabi sa sato kan Kasuratan na “an panahon asin an dai linalauman na mga pangyayari” puwedeng makaapektar sa siisay man, ano man na oras. (Ecl. 9:11; Job 4:​1, 8) Asin nanudan niyato na paagi sa maimbod tang pagtagal sa mga pagbalo, natatawan ta si Jehova nin isisimbag sa mga pagtuya ni Satanas. Nakakatabang iyan na maidepensa an Saiyang reputasyon. (Job 2:3; Tal. 27:11) Dai niyato dapat pagbaliwalaon an mga nanudan ta—nakakatabang sa sato an mga ini na maaraman an katotoohan manungod sa kun taano ta nagsasakit kita saka an satong mga mahal sa buhay. Kan huri, nakipag-adal si Hazel sa mga Saksi ni Jehova asin nasabutan niya na bako an Diyos an nagkawsa kan mga pagsakit niya. Sinabi niya: “Namibi giraray ako sa Diyos nin udok sa puso. Sinabi ko ki Jehova na kan sabihon kong babayaan ko na siya, dai ko man talaga siya babayaan. Tutal, dai ko pa man siya midbid kaidto. Ngunyan nasasabutan ko nang namumutan ako ni Jehova. Maugma na ako saka kontento.” Nagpapasalamat nanggad kita na aram niyato kun taano ta tinutugutan nin Diyos an pagsakit! Pag-ulayan ta ngunyan kun paano an salaysay manungod ki Job makakatabang sa sato bilang indibidwal pag napapaatubang kita sa mga pagbalo.

KUN PAANO AN SALAYSAY MANUNGOD KI JOB NAKAKATABANG SA SATO NA MAKATAGAL

9. Iladawan an kamugtakan ni Job mantang nakatukaw siya sa abo. (Santiago 5:11)

⁹ Imahinara si Job na solo-solong nakalapiga sa abo, pano nin mga pigsa an saiyang hawak asin namimiripit sa kulog. Maniwangon siyang marhay asin nagbabarakbak an saiyang kublit na nag-iritom na dahil sa hilang. Si Job na haros mayo nang kusog, garo baga an nagigibo na sana iyo na karuson nin mga tipak nin pasang kuron an saiyang kublit asin iluwas an saiyang mga pag-agrangay. Alagad an ginigibo ni Job bako lang basta paghihinguwang magdanay na buhay, kundi nagtatagal siya. (Basahon an Santiago 5:11.) Ano an nakatabang ki Job na makatagal?

10. Paano niyato nasabi na naipapahayag ni Job ki Jehova nin daing pag-alangan an saiyang mga namamatian?

¹⁰ Ipinahayag ni Job ki Jehova an saiyang mga namamatian. (Job 10:​1, 2; 16:20) Halimbawa, mababasa ta sa kapitulo 3 an mapait na mga pag-agrangay ni Job manungod sa mga trahedyang nag-abot sa saiya, na hinuna niyang si Jehova an nagkawsa. Dangan sa sunod-sunod na pakipagdebate sa saiyang tulong kairiba, marigon na idinepensa ni Job an saiyang integridad, na sa parati ipinapanungod niya ki Jehova an saiyang simbag. Ipinaparisa kan mga tataramon ni Job na may panahon na inisip niyang mas matanos siya sa Diyos. (Job 10:​1-3; 32:​1, 2; 35:​1, 2) Pero inadmitir niya man na an mga sinabi niya para idepensa an saiyang integridad kun minsan ‘mga tataramon na dai niya na napag-isipan.’ (Job 6:​3, 26) Sa kapitulo 31, mababasa niyato na gusto ni Job na ipahayag siya nin Diyos na daing sala. (Job 31:35) Siyempre, sala sa parte ni Job na maghagad sa Diyos nin direktang simbag kun taano ta nagsasakit siya.

11. Ano an nagin reaksiyon ni Jehova sa mga sinabi ni Job manungod sa saiyang integridad?

¹¹ Kun iisip-isipon ta, marerealisar niyato na an desperadong paagi nin pagtaram ni Job ki Jehova nagpapahiling na makusog an debosyon niya sa Saiya asin na marigon an saiyang paglaom na sa paano man mimidbidon nin Diyos an saiyang integridad. Kan simbagon na ni Jehova si Job paagi sa sarong alipuros, dai Niya detalyadong ipinaliwanag an manungod sa mga dahilan kan pagsakit ni Job. Dai Niya man kinondenar an mga pag-agrangay ni Job o an mga pagdepensa ni Job na mayo siyang ginibong sala. Imbes, tinukduan ni Jehova si Job arog kan gigibuhon nin ama sa saiyang aki. Asin iyan an tamang pamamaagi. Bilang resulta, mapakumbabang inadmitir ni Job kun gurano talaga kadikit kan aram niya, asin pinagsulsulan niya an mga nasabi niyang dai napag-isipan. (Job 31:6; 40:​4, 5; 42:​1-6) Paano posibleng nakinabang sa salaysay na ini an mga lingkod ni Jehova kaidto, asin paano kita makikinabang diyan ngunyan?

12. Paano posibleng nakinabang an mga Israelita sa salaysay manungod ki Job?

¹² Kun paano posibleng nakinabang an mga Israelita. Makikinabang an mga Israelita kun inaplikar ninda an mga leksiyon na nanudan ninda sa salaysay manungod ki Job. Pag-isipan an halimbawa ni Moises. Kinaipuhan niyang tagalan an manlain-lain na kadipisilan, pangluluya nin buot, asin pagkadisganar mantang isinasaabaga niya an papel bilang lider kan nasyon nin Israel. Kabaliktaran kan rebelyosong mga Israelita na parating nagrereklamo laban ki Jehova, si Moises nagdulok ki Jehova para maghagad nin tabang sa inaagihan niyang mga kadipisilan. (Exo. 16:​6-8; Bil. 11:​10-14; 14:​1-4, 11; 16:​41, 49; 17:5) Kinaipuhan man ni Moises na magtagal kan itanos siya ni Jehova. Halimbawa, kan an mga Israelita nagkakampo sa Kades, posibleng durante kan ika-40 taon na paglagaw-lagaw ninda sa disyerto, nagtaram si Moises “nin pabigla-bigla paagi kan saiyang mga ngabil” asin dai niya natawan si Jehova kan pag-umaw na maninigo sa Saiya. (Sal. 106:​32, 33) Huli kaiyan, dai ni Jehova tinugutan si Moises na maglaog sa Dagang Panuga. (Deu. 32:​50-52) Siguradong nakulgan si Moises sa disiplinang ini; dawa arog kaiyan, mapakumbaba niyang inako iyan. An salaysay manungod ki Job makakatabang man sa masurunod na mga henerasyon nin mga Israelita na matagalan an mga pagbalong mapapaatubang sa sainda. Paagi sa paghurop-hurop sa salaysay na iyan, manunudan kan maimbod na mga Israelita na ipahayag ki Jehova an saindang mga namamatian asin kun paano ninda malilikayan na ipangatanusan an saindang sadiri sa atubangan niya. Manunudan man nindang mapakumbabang akuon an disiplina ni Jehova.

13. Paano an salaysay manungod ki Job makakatabang sa sato na makatagal? (Hebreo 10:36)

¹³ Kun paano kita makikinabang. Bilang mga Kristiyano, kaipuhan ta man nin pakatagal. (Basahon an Hebreo 10:36.) Halimbawa, may nagkapira sa sato na igwa nin hilang sa pisikal o sa emosyon, may dipisil na sitwasyon sa pamilya, nagadanan nin mahal sa buhay, o iba pang magabat na problema. Asin kun minsan, an mga sinasabi o ginigibo sa sato kan iba tibaad mas lalo pang makapadipisil na tagalan an sitwasyon ta. (Tal. 12:18) Dawa arog kaiyan, itinutukdo sa sato kan libro nin Job na puwede tang ipahayag ki Jehova an satong kauruiraruming mga namamatian, na nagtitiwalang dadangugon niya kita. (1 Juan 5:14) Dai niya kita kokondenaron kun an satong udok sa pusong mga pagngayo-ngayo kun minsan nagigin nang “mga tataramon [na dai] na napag-iisipan,” arog kan nangyari ki Job. Imbes, an Diyos tatawan kita kan kusog asin kan kadunungan na kaipuhan para makatagal. (2 Cron. 16:9; Sant. 1:5) Tibaad tawan niya man kita nin angay na pagtatanos, arog kan ginibo niya ki Job. Itinutukdo man sa sato kan libro nin Job kun paano magtagal kun tawan kita nin konseho o disiplina hali sa Tataramon ni Jehova, sa Saiyang organisasyon, o hali sa maygurang na mga amigo. (Heb. 12:​5-7) Kun paanong nakinabang si Job paagi sa mapakumbabang pag-ako sa pagtatanos sa saiya, makikinabang man kita kun tutugutan tang itanos kita. (2 Cor. 13:11) Kapaki-pakinabang nanggad na mga leksiyon iyan hali sa libro nin Job! Pag-ulayan ta ngunyan kun paano ta magagamit an salaysay manungod ki Job tanganing tabangan an iba.

GAMITON AN LIBRO NIN JOB PARA TABANGAN AN IBA

14. Anong paagi nin pangangatanusan an puwede tang gamiton sa ministeryo tanganing ipaliwanag kun taano ta igwa nin pagsakit?

¹⁴ May nakaulay ka na daw sa ministeryo na naghapot kun taano ta igwa nin pagsakit? Ano an isinimbag mo sa saiya? Siguro ipinahiling mo sa saiya an sinasabi kan Bibliya manungod sa nangyari kaidto sa hardin nin Eden. Tibaad pinunan mo iyan paagi sa pagpaliwanag na si Satanas, na sarong maraot na espiritu, sinabi sa inot na tawong mag-agom an kaputikan na nagin dahilan na magrebelde an mga ini sa Diyos. (Gen. 3:​1-6) Dangan tibaad sinambit mo na pagkatapos kan pagrebelde ni Adan asin Eva, an kinaban napano nin pagsakit asin kagadanan. (Roma 5:12) Panghuri, tibaad ipinaliwanag mo na tinugutan nin Diyos na maglihis an igong panahon tanganing pahimutikan an kaputikan ni Satanas asin tanganing ipalakop an maugmang bareta na sa maabot magigin perpekto giraray an mga tawo. (Kap. 21:​3, 4) Magayon na paagi ini nin pagsimbag sa hapot na iyan, asin puwede iyan na magkaigwa nin marahay na mga resulta.

15. Paano ta puwedeng gamiton an libro nin Job tanganing tabangan an saro na naghahapot kun taano ta igwa nin pagsakit? (Hilingon man an mga ritrato.)

¹⁵ Pag-isipan an saro pang paagi nin pangangatanusan hali sa libro nin Job na puwede mong gamiton. Puwede kang magpuon paagi sa pagtao nin komendasyon sa kaulay mo dahil sa paghapot niya kan mahalagang hapot na iyan. Dangan, sambiton na si Job, na sarong maimbod na lalaking nag-agi nin grabeng pagsakit, naghapot nin kaagid kaiyan. Inisip niya pa ngani na, sa paano man, an Diyos an kawsa kan saiyang pagsakit. (Job 7:​17-21) Tibaad magngalas an kaulay mo dahil haloy na palan na ihinahapot kan mga tawo an hapot niya. Sunod, puwede mong mataktikang ipaliwanag na bako an Diyos an kawsa kan pagsakit ni Job kundi an Diyablo. Ginibo iyan kan Diyablo sa paghihinguwang patunayan na an mga tawo naglilingkod sana sa Diyos huli sa makasadiring mga dahilan. Puwede mong idagdag na dawa ngani bako an Diyos an kawsa kan pagsakit ni Job, itinugot niya iyan, kaya ipinapahiling kaiyan na nagtitiwala an Diyos na kaya kan maimbod na mga tawo na patunayan na sala si Satanas. Panghuri, puwede mong sambiton na pag-abot nin panahon binendisyunan nin Diyos si Job sa pagdanay kaining maimbod. Sa siring, mararanga niyato an mga tawo paagi sa pag-asigurar sa sainda na bako hali ki Jehova an mga pagsakit na napapaatubang sa sainda.

16. Magsaysay nin eksperyensiya na ipinapahiling kun paano makakatabang an libro nin Job sa sarong nagsasakit.

¹⁶ Pag-isipan kun paano nakatabang ki Mario an libro nin Job. Sarong aldaw kan 2021, sarong sister an nagpapatotoo paagi sa telepono. Sa inot niyang pag-apod, nagbasa siya nin sarong teksto ki Mario asin ipinaliwanag na an Diyos dai lang nagdadangog sa satong mga pamibi kundi nag-aalok man siya sato nin magayon na puturo asin paglaom. Kan maghapot an sister kun ano an masasabi diyan ni Mario, sinabi niya na kan mag-apod an sister nagsusurat siya kaidto nin suicide note. Sinabi ni Mario, “Naniniwala ako sa Diyos, pero kaining aga lang iniisip ko kun baga nagmamakulog siya sako.” Sa ikaduwang pag-apod kan sister, pinag-ulayan ninda an manungod sa pagsakit ni Job. Nagdesisyon si Mario na kaipuhan niyang basahon an bilog na libro nin Job. Kaya pinadarahan siya kan sister nin link kan Bagong Kinaban na Traduksiyon kan Banal na Kasuratan. An resulta? Nag-ako si Mario nin pag-adal sa Bibliya asin gustong-gusto niyang makanuod nin urog pa manungod sa mamumuton na Diyos na nagpahiling nin interes sa saiya.

17. Taano ta nagpapasalamat ka na iiniba ni Jehova an libro nin Job sa Saiyang ipinasabong na Tataramon? (Job 34:12)

¹⁷ Malinaw, mapuwersa nanggad an Tataramon nin Diyos asin kaya kaiyan na tabangan an mga tawo, kaiba na an mga nagsasakit. (Heb. 4:12) Nagpapasalamat nanggad kita na iiniba ni Jehova an libro nin Job sa Saiyang ipinasabong na Tataramon! (Job 19:​23, 24) Inaasigurar sa sato kan libro nin Job na “sigurado nanggad na dai naggigibo nin maraot an Diyos.” (Basahon an Job 34:12.) Itinutukdo man sa sato kaiyan kun taano ta tinutugutan nin Diyos an pagsakit asin kun paano ta iyan matatagalan. Asin tinutukduan kita kaiyan kun paano rarangahon an mga nagsasakit. Sa sunod na artikulo, pag-uulayan ta kun paano makakatabang sa sato an libro nin Job pag nagtatao kita nin sadol.