Padagos na Paniguan an Saimong Espirituwal na Pangangaipo

1. Linalang kita ni Jehova na igwa nin anong panginot na mga pangangaipo? (Mateo 5:3)

LINALANG kita ni Jehova na may partikular na panginot na mga pangangaipo. Halimbawa, para padagos na mabuhay, kaipuhan ta nin kakanon, bado, asin istaran. Kun mayo kita kan arin man sa mga ini dawa sa halipot lang na panahon, magigin dipisilon an buhay o puwede ta pa ngani iyan na ikagadan. Apuwera sa paglalang sa sato na may pisikal na mga pangangaipo, linalang man kita ni Jehova na igwa nin espirituwal na pangangaipo. (Basahon an Mateo 5:3.) Kun gusto niyatong magin tunay na maugma, kaipuhan na aram ta kun ano an pangangaipong iyan dangan padagos na paniguan iyan.

2. Iilustrar kun ano an buot sabihon kan “nakakamating kaipuhan [mo] nin espirituwal na mga bagay.”

² Ano an buot sabihon kan “nakakamating kaipuhan [ta] nin espirituwal na mga bagay”? Sa orihinal na lengguwahe, an ekspresyon na iyan nagtatao kan ideya nin pagigin parapakilimos nin espiritu, na sarong nakakapaisip na ilustrasyon. Imahinara an sarong parapakilimos na nakasulot nin maati asin ralabot na bado asin nakatukaw sa kanto nin sarong kalye sa siyudad. Nangruruluya na siya huling mayo siyang kinakakan, rinarayuan kan iba dahil sa saiyang itsura, asin pag aldaw bantad sa nakakapasong init kan saldang dangan pag banggi man nagtatarakig sa grabeng lipot. Aram niyang marhay na kaipuhan niya nin tabang kun gusto niyang magrahay an sitwasyon niya sa buhay. Sa kaagid na paagi, an saro na nakakamating kaipuhan niya nin espirituwal na mga bagay—sarong parapakilimos nin espiritu—kaipuhan man nin tabang para magrahay an saiyang sitwasyon. Kaya gustong-gusto niyang aprobetsaran an abundang espirituwal na mga probisyon na itinatao ni Jehova sa mga namumuot sa Saiya.

3. Ano an pag-uulayan ta sa artikulong ini?

³ Sa artikulong ini, inot tang pag-uulayan an mga manunudan ta sa babaying taga Fenicia na nakimahirak ki Jesus na tabangan siya. Idinuduon kan salaysay na ini an tulong kuwalidad na dapat na kultibaron kan mga nakakamating kaipuhan ninda nin espirituwal na mga bagay. Dangan pag-uulayan ta an halimbawang itinao ni apostol Pedro asin Pablo pati man ni Hading David, na gabos tawong espirituwal.

SARONG HALIMBAWA NIN KAPAKUMBABAAN, PAGIGIN PURSIGIDO, ASIN PAGTUBOD

4. Ano an dahilan kaya nagdulok ki Jesus an sarong babaying taga Fenicia?

⁴ Sa sarong pagkakataon, nagdulok ki Jesus an sarong babaying taga Fenicia. An saiyang aking babayi “nagsasakit nin grabe dahil sa demonyong nagsanib sa saiya.” (Mat. 15:​21-28) Nagluhod an babayi asin nakimahirak ki Jesus na tabangan siya. An babaying ini na taga Fenicia nagpahiling nin marahayon na mga kuwalidad kan magdulok siya ki Jesus. Pag-ulayan ta an nagkapira sa mga ini.

5. Anong mga kuwalidad an ipinahiling kan babayi, asin ano an sinabi saka ginibo ni Jesus? (Hilingon man an ritrato.)

⁵ Nagpahiling nin tunay na kapakumbabaan an babaying taga Fenicia. Taano ta nasabi niyato iyan? Huling dai nagkulog an buot niya kan maggamit si Jesus nin sarong ilustrasyon na garo baga iinaagid siya sa sarong sadit na ido, na kaiba sa mga hayop (pet) na inaataman kan mga Hentil sa saindang harong. Kun ika, ano an magigin reaksiyon mo sa sinabi saka ginibo ni Jesus? Maiinsulto ka daw asin dai na mahagad nin tabang sa saiya? Bakong arog kaiyan an nagin reaksiyon kan babaying taga Fenicia. Nagpahiling siya bako lang nin kapakumbabaan kundi pati man nin pagigin pursigido. Hiling-hiling ini sa kun paano siya padagos na nakimahirak ki Jesus para sa tabang. Ano an nakapahiro sa saiya na gibuhon iyan? An saiyang pagtubod ki Jesus. Sa katunayan, napahirong marhay si Jesus kan pagtubod kan babaying ini kaya naggibo siya nin sarong makangangalas na bagay. Dawa ngani kakasabi niya pa lang na isinugo siya para tabangan an “nawawarang mga karnero sana kan nasyon nin Israel,” pinalayas ni Jesus an maating espiritu na nagsanib sa aki kan babaying Hentil na ini.

6. Ano an manunudan ta sa salaysay manungod sa babaying taga Fenicia?

⁶ Para mapaniguan an satong espirituwal na pangangaipo, dapat na kultibaron ta man an kapakumbabaan, pagigin pursigido, asin makusog na pagtubod. Kun kita mapakumbaba, pursigido kitang makikimahirak sa Diyos para sa tabang. Dapat man kitang magkaigwa nin makusog na pagtubod ki Cristo Jesus asin magtiwala sa mga ginagamit niya para giyahan an saiyang mga disipulo. (Mat. 24:​45-47) Nauugma si Jehova asin an saiyang Aki na paniguan an espirituwal na pangangaipo kan mga nagpapahiling kan mga kuwalidad na ini. (Ikumparar an Santiago 1:​5-7.) Siyasaton ta ngunyan kun paano kita tinatawan ni Jehova nin espirituwal na kakanon, bado, asin istaran. Aaramon niyato kun ano an kaipuhan tang gibuhon tanganing magkaigwa kan mga pangangaipong ini paagi sa pagsiyasat sa halimbawang itinao ni apostol Pedro asin Pablo pati man ni Hading David.

AROG NI PEDRO—PADAGOS NA MAGKAKAN NIN ESPIRITUWAL NA KAKANON

7. Anong pagbuot an itinao ki Pedro, alagad ano an kinaipuhan niya man na gibuhon? Ipaliwanag. (Hebreo 5:14–6:1)

⁷ Pag-isipan an halimbawa ni apostol Pedro. Saro siya sa inot na mga Judio na nakamidbid na si Jesus an Mesiyas—an saro na ginagamit kaidto ni Jehova para pakakanon an Saiyang banwaan nin “mga tataramon nin buhay na daing katapusan.” (Juan 6:​66-68) Bago magsakat sa langit an binuhay liwat na si Jesus, tinawan niya si Pedro kan pagbuot na: “Pakakana an sakuyang saradit na karnero.” (Juan 21:17) Maimbod na sinunod ni Pedro an pagbuot na iyan, asin ginamit pa ngani siya ni Jehova na gibuhon an duwang surat na nagin parte kan Bibliya. Alagad kinaipuhan man ni Pedro na pakakanon an sadiri niya nin espirituwal na kakanon. Halimbawa, pinag-adalan niya an ipinasabong na mga surat na ginibo kaidto ni apostol Pablo. Inadmitir ni Pedro na an nagkapira sa mga bagay na isinurat ni Pablo “masakit masabutan.” (2 Ped. 3:​15, 16) Pero malinaw na nagin pursigido si Pedro, huling nagtutubod siya na tatabangan siya ni Jehova na tunawon, o masabutan saka iaplikar, an “matagas na kakanon” na ipinasabong ki Pablo na iiba sa saiyang mga surat.​—Basahon an Hebreo 5:14–6:1.

8. Ano an nagin reaksiyon ni Pedro sa bagong liwanag na ihinayag paagi kan representante nin Diyos?

⁸ Pinatunayan ni Pedro na may pagtubod siya ki Jehova paagi sa pagsunod sa instruksiyon na itinao sa saiya. Halimbawa, kan yaon siya sa duungan na siyudad nin Jope, nakahiling si Pedro nin bisyon na diyan sinabi sa saiya kan representante nin Diyos na bunuon asin kakanon an mga hayop na maati uyon sa Katugunan ni Moises. Para sa mga Judio, nakakabigla nanggad an instruksiyon na iyan. Kan inot, nagsimbag si Pedro: “Dai ko lamang gigibuhon iyan, Kagurangnan, ta dai pa ako kasuarin man nagkakan nin ano man na maati saka bakong malinig.” Dangan sinabi sa saiya kan representante: “Dai mo na pag-apudon na maati an mga bagay na lininig na nin Diyos.” (Gibo 10:​9-15) Nakua ni Pedro an punto. Paano ta naaraman iyan? Dai nahaloy pakahiling niya kan bisyon, nag-abot an mga lalaking isinugo kan Hentil na si Cornelio asin inimbitaran si Pedro na mag-iba sa sainda para makipag-ulay sa kagurangnan ninda. Kun kaidto, nungkang mauyon si Pedro na maglaog sa harong nin sarong Hentil. Para kaya sa mga Judio, maati an mga Hentil. (Gibo 10:​28, 29) Alagad inako tulos ni Pedro an bagong liwanag na ihinayag sa saiya ni Jehova. (Tal. 4:18) Hinulitan niya si Cornelio saka an mga kairiba kaini sa harong asin nahiling niya pa ngani sindang nag-ako kan katotoohan, nin banal na espiritu, dangan nabawtismuhan.​—Gibo 10:​44-48.

9. Ano an duwang paagi na diyan nakikinabang kita sa paghihinguwang ganahan sa pagkakan nin matagas na espirituwal na mga kakanon?

⁹ Arog ni Pedro, dapat na regular kitang mag-inom nin gatas, o panginot na mga katotoohan, na nasa Tataramon nin Diyos. Dapat man kitang maghinguwang ganahan sa pagkakan nin matagas na espirituwal na mga kakanon—mga katotoohan na tibaad mas dipisil na masabutan. Kaipuhan tang magtagama nin panahon asin magin andam na maghinguwa para magkaigwa nin mas hararom na pakasabot sa Tataramon nin Diyos, asin sulit nanggad iyan. Taano? Nakikinabang kita sa kisiyera duwang paagi: Inot, may mga nanunudan kita manungod ki Jehova na makakapararom kan pagkamuot asin paggalang ta sa saiya; asin ikaduwa, nagigin mas motibado kitang sabihon sa iba an manungod sa makangangalas niyatong Ama sa langit. (Roma 11:33; Kap. 4:11) May manunudan pa kita sa halimbawa ni Pedro: Pag nakakaresibi kita nin mga pagliliwat sa satong pakasabot sa Tataramon nin Diyos, kaipuhan tang i-adjust tulos an satong kaisipan asin paggawi kauyon kaiyan. Kun gigibuhon ta iyan, saka sana kita magdadanay na basog sa espirituwal asin kapaki-pakinabang ki Jehova.

AROG NI PABLO—PADAGOS NA ISULOT AN ESPIRITUWAL NA BADO

10. Sigun sa Colosas 3:​8-10, ano an kaipuhan niyatong gibuhon tanganing mapaugma si Jehova?

¹⁰ Para mapaugma an Diyos, dapat tang aprobetsaran an saro pa sa mga probisyon ni Jehova: an espirituwal na bado. Ano an buot sabihon kaiyan? Isinurat ni apostol Pablo na dapat tang “hubaon . . . an lumang personalidad” dangan isulot an “bagong personalidad.” (Basahon an Colosas 3:​8-10.) Puwedeng magin masakit an pagsulot ta kan bagong personalidad asin mangaipo nin dakul na panahon saka paghihinguwa. Pag-isipan an halimbawa ni Pablo. Puon sa amay na edad, pinagmaigutan niyang makamtan an pag-uyon nin Diyos. (Gal. 1:14; Fil. 3:​4, 5) Alagad mayo siya kan tamang kaaraman manungod sa katuyuhan nin Diyos kaya bakong marahay an kamugtakan niya sa espirituwal. An kawaran niya nin kaaraman manungod sa mga katukduan ni Cristo, na sinabayan pa nin kapalangkawan, nagin dahilan na magin siyang “aroganteng tawo” na nakasulot nin negatibong mga kuwalidad.​—1 Tim. 1:13.

11. Anong kaluyahan an pinagmaigutan ni Pablo na labanan? Ipaliwanag.

¹¹ Bago nagin Kristiyano si Pablo, arangguton siya. Sigun sa sarong salaysay sa Mga Gibo, may pagkakataon kaidto na “grabe [an pagkaanggot ni Pablo] sa mga disipulo [ni Jesus] asin nagmamawot na garadanon an mga ini.” (Gibo 9:1) Kan magin Kristiyano na siya, siguradong pinagmaigutan ni Pablo na hubaon an aspektong ini kan saiyang lumang personalidad. (Efe. 4:​22, 31) Pero kan mag-argumento sinda kaidto ni Bernabe, “nagkainitan” sinda. (Gibo 15:​37-39) Dai nakontrol ni Pablo an kaanggutan niya, pero dai siya nadisganar. Padagos niyang ‘pigbugbog an saiyang hawak’—an buot sabihon, linabanan an saiyang mga kaluyahan—para danay siyang uyunan ni Jehova.​—1 Cor. 9:27.

12. Ano an nakatabang ki Pablo na mahuba, o mahali, an saiyang negatibong mga ugali?

¹² Nagibo ni Pablong hubaon, o halion, an saiyang negatibong mga ugali dangan isulot an bagong personalidad huling dai siya nagsarig sa sadiri niyang kusog. (Fil. 4:13) Arog ni Pedro, nagsarig man si Pablo sa “kusog na itinatao nin Diyos.” (1 Ped. 4:11) Pero may mga pagkakataon pa man giraray na nakakagibo nin sala si Pablo kaya nadidisganar siya. Alagad pag nakakamati siya kaiyan, iniisip niya an marahay na mga ginibo sa saiya kan saiyang Ama sa langit, asin napapakusog kaiyan an saiyang determinasyon na padagos na gumibo nin mga pagbabago.​—Roma 7:​21-25.

13. Paano ta maaarog si Pablo?

¹³ Maaarog ta si Pablo paagi sa pag-ako na gurano man kita kahaloy nang naglilingkod ki Jehova, kaipuhan tang padagos na hinguwahon na hubaon an lumang personalidad asin isulot an bagong personalidad—an espirituwal na bado na itinatao nin Diyos. Kun mangyari man na magibo ta giraray an sarong kaluyahan—halimbawa, dai ta nakontrol an kaanggutan ta o nakapagtaram nin bakong mabuot sa iba—dai ta isipon na nungka ta nang mapapaugma si Jehova. Imbes, magpadagos lang kita sa paghihinguwang baguhon an paagi ta nin pag-iisip asin paggawi. (Roma 12:​1, 2; Efe. 4:24) Alagad mantang ginigibo ta iyan, dapat tang isaisip an sarong mahalagang katotoohan: Bakong arog sa literal na mga bado na pig-a-adjust tanganing magkahusto sa sato, dapat na an personalidad niyato an i-adjust tanganing magkahusto sa espirituwal na bado na itinatao ni Jehova. Rasonable sanang baguhon ta an satong personalidad tanganing masunod ta an mga kahagadan nin Diyos.

AROG NI DAVID—PADAGOS NA MAGPAILI SA ESPIRITUWAL NA ISTARAN

14-15. Ipaliwanag kun paano tinatawan ni Jehova nin espirituwal na istaran an saiyang mga lingkod. (Salmo 27:5) (Hilingon man an ritrato.)

¹⁴ Para magin tunay na maugma, bako lang espirituwal na kakanon saka bado an kaipuhan ta. Kaipuhan ta man nin espirituwal na istaran. Ano iyan, asin paano ta masisigurado na danay kitang nagpapaili diyan?

¹⁵ May sinambit si Hading David manungod sa espirituwal na taguan o istaran na itinatao ni Jehova. (Basahon an Salmo 27:5.) Pinoprotektaran ni Jehova an mga lingkod niya sa siisay man asin sa ano man na puwedeng magkawsa nin nagdadanay na danyos sa saindang pagtubod sa Saiya. Paano kita pinoprotektaran ni Jehova sa mga peligro sa luwas kan satong espirituwal na istaran? Nanunuga siya na mayo nin ano man na armas laban sa sato an magigin mapanggana. (Sal. 34:7; Isa. 54:17) Dawa ngani makapangyarihan si Satanas saka an mga alipores niya, dai ninda kita magigibuhan nin ano man na nagdadanay na danyos. Dawa kun gadanon ninda kita, bubuhayon liwat kita ni Jehova. (1 Cor. 15:​55-57; Kap. 21:​3, 4) Tinatabangan man kita ni Jehova na makayanan an mga namamatian tang pagkapurisaw na puwedeng magkawsa nin nagdadanay na danyos sa sato. (Tal. 12:25; Mat. 6:​27-29) Asin tinatawan kita kan satong mamumuton na Ama nin pamilya sa espirituwal—an mga tugang—na nagtatabang sa sato asin nin mga elder na nagpapastor sa sato. (Isa. 32:​1, 2) Pag nagtitiripon kita, sa parati naipapagirumdom sa sato an espesipikong mga paagi na maaaprobetsaran ta an proteksiyon na itinatao ni Jehova.​—Heb. 10:​24, 25.

16. Sa anong mga paagi prinotektaran ni Jehova si David?

¹⁶ Kaidtong nagsusunod si David ki Jehova, prinotektaran Niya siya sa kasakitan na minaabot sa mga tuyong naggigibo nin kasalan. (Ikumparar an Talinhaga 5:​1, 2.) Pero kan binaliwala ni David an mga pamantayan nin Diyos, dai Niya siya prinotektaran sa mga konsekwensiya kaiyan. (2 Sam. 12:​9, 10) Kumusta man kan mga panahon na nakaeksperyensiya si David nin mga kasakitan na bako man siya an dahilan? Sinabi ni David ki Jehova sa pamibi an gabos na ikinakapurisaw niya, asin pinakalma Niya si David paagi sa pag-asigurar na namumutan Niya siyang marhay asin na aatamanon Niya siya.​—Sal. 23:​1-6.

17. Paano ta maaarog si David?

¹⁷ Maaarog ta si David paagi sa pagpamibi ki Jehova na giyahan kita pag nagdedesisyon. Nasasabutan ta man na puwede kitang mapaatubang sa mga kadipisilan sa pana-panahon, bakong dahil dai kita prinotektaran ni Jehova, kundi dahil sa bakong madunong na mga desisyon niyato. (Gal. 6:​7, 8) Asin pag napapaatubang kita sa mga kasakitan na bako man kita an dahilan, sinasabi ta ki Jehova sa pamibi an gabos na nasa puso niyato, na nagtitiwalang babantayan niya an satong puso asin kaisipan.​—Fil. 4:​6, 7.

PADAGOS NA PANIGUAN AN SAIMONG ESPIRITUWAL NA PANGANGAIPO

18. Anong kadipisilan an napapaatubang sa sato, asin paano ta padagos na mapapaniguan an satong espirituwal na pangangaipo? (Hilingon man an mga ritrato.)

¹⁸ An satong teksto para sa taon 2026 nagsasabi: “Maugma an mga nakakamating kaipuhan ninda nin espirituwal na mga bagay.” Totoong-totoo iyan lalo na ngunyan. Taano? Huling napapalibutan kita nin bakong maugmang mga tawo na habong akuon na may siring sindang pangangaipo. Dakul man an nagsasadiring paniguan an pangangaipong iyan paagi sa palsong relihiyon o sa pilosopiya nin tawo. Dapat tang likayan na maimpluwensiyahan ninda. Paano? Paagi sa pagkakan nin masustansiyang espirituwal na mga kakanon na itinatao ni Jehova, pagsulot kan bagong personalidad, asin pagpaili sa espirituwal na istaran na itinatao ni Jehova.