Tabangan an Saimong mga Aki Pag Nakahiling Sinda nin Marauton na Bareta

Pirming igwa nin makagirabong bareta sa TV, cellphone, tablet, saka kompyuter. Sa parati may kaiba iyan na detalyadong video.

Asin nahihiling iyan kan mga aki.

Paano mo matatabangan an mga aki mo na dai gayong maapektaran nin marauton na mga bareta?

• Ano an epekto sa mga aki kan bareta?

• Paano mo matatabangan an mga aki mo na dai gayong mahadit sa mga bareta?

• Paano kun aktuwal na nahiling kan aki mo an sarong marauton na pangyayari?

Ano an epekto sa mga aki kan bareta?

• Dakul na aki an nahahadit kan marauton na mga pangyayari na nahihiling ninda sa bareta. May mga aki na garo okey lang sainda an marauton na mga baretang nahihiling ninda, pero idto palan apektado na sindang marhay.a Tibaad mas mahadit pa sinda kun nahihiling nindang nahahadit man an mga magurang ninda.

• Tibaad iba an masabutan kan mga aki sa nahihiling ninda sa mga bareta. Halimbawa, tibaad isipon kan ibang mga aki na mangyayari sa pamilya ninda an nahiling ninda. Pag pauruutrong pighihiling kan mga aki an sarong video manungod sa sarong marauton na pangyayari, tibaad hunaon ninda na pauruutrong man na nangyayari iyan.

• Tibaad masakitan an mga aki na masabutan kun gurano talaga kagrabe an bareta. Tibaad dai ninda aram na an mga news agency sarong negosyo na nakakaganar pag dakul na tawo an naghihiling kan bareta ninda. Kaya posibleng paluwason nindang mas grabe an sarong bareta kisa sa kun ano talaga an totoo para makua an atensiyon kan mga tawo.

Paano mo matatabangan an mga aki mo na dai gayong mahadit sa mga bareta?

• Limitaran an paghiling nin marauton na mga bareta. Dai iyan nangangahulugan na dai na dapat maaraman kan saimong mga aki an mga nangyayari sa kinaban. Pero bako man marahay na pauruutro sindang makahiling o makadangog nin marauton na mga bareta.

  “Kun minsan pigpaparaurulayan mi an sarong bareta, an dai mi aram apektado na palan na marhay an mga aki mi na nakakadangog samo.”—Maria.

  Prinsipyo sa Bibliya: “An kahaditan sarong magabat na pasan.”—Talinhaga 12:25, Contemporary English Version.

• Mapasensiyang magdangog, magtaram nin may empatiya. Kun nasasakitan an aki mo na mag-istorya manungod sa pangyayari, ipadrowing iyan saiya. Ipakipag-ulay an mga ikinakahadit niya gamit an mga terminong nasasabutan niya, pero likayan na pag-ulayan an mga dai kinakaipuhan na detalye.

  “Nagrarahay an pagmati kan aki ming babayi pag pigdadangog mi siya. Dai nakakatabang pag sinasabi mi saiya, ‘Arog na kaiyan an buhay ngunyan, matuod na lang kita.’ ”—Sarahi.

  Prinsipyo sa Bibliya: “Magin alisto sa pagdangog, maluway sa pagtaram.”—Santiago 1:19.

• Tabangan an aki mo na masabutan kun gurano talaga kagrabe an bareta. Halimbawa, tibaad paluwason kan sarong bareta manungod sa kidnapping na mas parating nangyayari iyan kisa sa aktuwal. Sabihon sa mga aki mo an mga ginigibo mo para magin ligtas sinda. Saka ipasabot sainda na kaya ngani ipinaluwas an marauton na baretang iyan dahil bihira lang iyan mangyari.

  “Tabangan an mga aki mo na dai gayong mahadit. Sa parati nagpupuon sa iniisip an mga namamatian ta, kaya kun tatabangan ta an mga aki ta na magpokus sa positibo, maggigian an pagmati ninda.”— Lourdes.

  Prinsipyo sa Bibliya: “An puso kan madunong nagtatao nin pakasabot sa saiyang nguso, asin nagdadagdag nin pangungumbinsir sa saiyang pananaram.”—Talinhaga 16:23, NWT.