HAPOT KAN MGA HOBEN
Dai Ko Nasunod an Patakaran kan mga Magurang Ko—Ano Ngunyan an Gigibuhon Ko?
Haros gabos na pamilya igwa nin mga patakaran sa harong, tibaad manungod sa curfew, paggamit nin gadget, paggawi, asin iba pa.
Paano kun igwa ka nin dai nasunod na patakaran? Dai mo na mababago pa kun ano an nangyari, pero may magigibo ka tanganing dai na mas maglala an sitwasyon. Maaaraman mo iyan sa artikulong ini.
An dai dapat gibuhon
Kun dai aram kan mga magurang mo na igwa ka nin dai nasunod na patakaran, tibaad matentaran ka na itago an nagibo mo.
Kun aram ninda na igwa ka nin dai nasunod na patakaran, tibaad matentaran ka na magrason o basulon an iba.
Mayo sa mga iyan an tamang gibuhon. Taano? Huling an pagtago sa ginibo mo o an paggibo nin mga dahilan tanda nin pagigin immature. Ipinapahiling mo lang kaiyan sa mga magurang mo na kaipuhan mo pang umuswag.
“Nungkang nagin solusyon an pagputik. Maabot an panahon, maluwas man an totoo asin mas malala an magigin padusa mo kisa sa kun sinabi mo na tulos an totoo puon pa sana.”—Diana.
An mas marahay na paagi
Admitiron an ginibo mo. Sinasabi kan Bibliya: “An saro na nagtatahob kan saiyang mga paglapas dai magigin mapanggana.” (Talinhaga 28:13) Aram kan mga magurang mo na bako kang perpekto. An hapot, sasabihon mo daw sainda an totoo?
“Mas mapahiling pa saimo nin pagkahirak an mga magurang mo kun sasabihon mo sa sainda an totoo. Pag nagtuga ka, mas pagtitiwalaan ka ninda.”—Olivia.
Maghagad nin tawad. Sinasabi kan Bibliya: “Magsulot kamo nin kapakumbabaan.” (1 Pedro 5:5) Kaipuhan nin kapakumbabaan tanganing magsabi nin “sorry” asin dai na magpararason pa.
“An mga tawong mahilig magpararason luway-luway na nagigin bagol na an konsiyensiya. Sa kahuri-hurihi, dai na sinda makokonsiyensiya pag naggigibo sinda nin sala.”—Heather.
Akuon an mga konsekwensiya. Sinasabi kan Bibliya: “Magdangog kamo sa disiplina.” (Talinhaga 8:33) Dai na magreklamo, asin akuon kun anong mga padusa an itinao sa saimo.
“Pag nagreklamo ka sa mga padusa saimo, mas malala lang an sitwasyon mo. Maghanap nin paagi tanganing maako mo an mga padusa na itinao saimo asin dai na magpokus sa mga salang nagibo mo.”—Jason.
Pagmaigutan na maibalik an tiwala. Sinasabi kan Bibliya: “Halion an luma nindong personalidad na kauyon kan dati nindong dalan nin paggawi.” (Efeso 4:22) Padagos na gumibo nin madunong na mga desisyon tanganing magtiwala giraray saimo an mga magurang mo.
“Kun pirmi kang magibo nin madunong na mga desisyon asin papatunayan mo sa saimong mga magurang na dai mo na uutruhon an ginibo mo, maibabalik mo an tiwala ninda saimo.”—Karen.
TIP: Gumibo nin urog pang paghihinguwa na mapatunayan na mapagkakatiwalaan ka. Halimbawa, pag naghali ka saindo, magsabi ka sa mga magurang mo kun pauli ka na—dawa dai ka man mali-late. Garo mo man sana sinasabi na ‘gusto kong maibalik an tiwala nindo sako.’