HAPOT KAN MGA HOBEN

Dapat Daw Akong Magpabawtismo?—Part 1: An Kahulugan kan Bawtismo

Kada taon, dakul na hoben na pinadakula bilang mga Saksi ni Jehova an nababawtismuhan. Pinag-iisipan mo daw na gibuhon an lakdang na iyan? Kun iyo, kaipuhan mo ngunang masabutan an kahulugan kan pagdusay asin bawtismo.

Ano an bawtismo?

Sa Bibliya, nanunungod an bawtismo sa biyong paglubog sa tubig—bako lang basta pagwirik—asin nagsisimbolisar iyan sa sarong mahalagang marhay na bagay.

Paagi sa paglubog sa tubig sa panahon kan bawtismo, ipinapahiling mo sa publiko na dai ka na mamumuhay para gibuhon kun ano sana an nakakapaugma sa saimo.
Paagi sa paghawas sa saimo sa tubig, ipinapahiling mong pinunan mo nang mamuhay sa paaging nakakapaugma sa Diyos.

Paagi sa pagpabawtismo, ipinapahiling mo sa publiko na si Jehova an may awtoridad na magtao nin pamantayan sa kun ano an tama saka sala, asin opisyal mo nang ipinapaaram an saimong panuga na gikan sa buot mong gigibuhon kun ano an gusto niyang gibuhon mo.

Pag-isipan: Taano ta gusto mong ipahiling sa publiko na mawot mong magsunod ki Jehova sa bilog mong buhay? Hilingon an 1 Juan 4:19 asin Kapahayagan 4:11.

Ano an pagdusay?

Bago ka magpabawtismo, dapat mo ngunang idusay an saimong sadiri ki Jehova sa pribado. Paano?

Paagi sa sarong personal na pamibi, sasabihon mo ki Jehova na nanunuga kang paglilingkudan mo siya sagkod pa man asin na gigibuhon mo kun ano an gusto niya sa ano man na sitwasyon asin ano man an pilion na gibuhon kan iba.

An pagpabawtismo iyo an pagpahayag mo sa publiko kan pagdusay na iyan na ginibo mo sa pribado. Paagi kaiyan, ipinapahiling mo sa iba na sadiri ka na ni Jehova kaya dai ka na mamumuhay para sa sadiri mo.—Mateo 16:24.

Pag-isipan: Taano ta nagigin mas marahay an saimong buhay pag sadiri ka na ni Jehova? Hilingon an Isaias 48:17, 18 asin Hebreo 11:6.

Taano ta mahalaga an bawtismo?

Sinabi ni Jesus na kahagadan an pagpabawtismo para sa mga gustong magin disipulo niya. (Mateo 28:19, 20) Kaya, an bawtismo kahagadan pa man giraray para sa mga Kristiyano. Sa katunayan, sinasabi kan Bibliya na kaipuhan iyan tanganing maligtas.—1 Pedro 3:21.

Pero, dapat na an saimong pagkamuot saka apresasyon ki Jehova an magpahiro sa saimo na magpabawtismo. An sabuot mo dapat na arog kan sa salmista, na nagsurat: “Ano an ibabalos ko ki Jehova para sa gabos na karahayan na ginibo niya sa sakuya? . . . Maapod ako sa pangaran ni Jehova. Uutubon ko an sakong mga promesa ki Jehova.”—Salmo 116:12-14.

Pag-isipan: Anong marahay na mga bagay an ginibo ni Jehova para sa saimo, asin paano mo siya mababalusan? Hilingon an Deuteronomio 10:12, 13 asin Roma 12:1.

Mga salang paghuna asin an totoo

SALANG PAGHUNA — An binabawtismuhan mga tawong maygurang kaya mga adulto lang an puwede diyan.

AN TOTOO — An pagigin maygurang nakadepende bako sa edad kundi sa pagkamuot nin saro ki Jehova asin sa pagigin handa niyang magsunod sa saiya. Halimbawa, nagpahiling na nin siring na pagkamaygurang si Jose, Samuel, asin Josias dawa kan aki o hoben pa sinda. Arog man kaiyan an ginigibo kan dakul na hoben ngunyan.

An sinasabi kan Bibliya: “Namimidbid paagi sa saiyang mga gibo dawa an sarong aki, kun baga dalisay asin tama an saiyang paggawi.”—Talinhaga 20:11.

SALANG PAGHUNA — Kun mapabawtismo na an mga amigo mo, dapat ka na man na magpabawtismo.

AN TOTOO — Personal na desisyon an pagdusay asin pagpabawtismo asin ginigibo mo iyan huling iyan talaga an gusto mo. Bako iyan sarong ritwal o kaugalian pag-abot nin sarong partikular na edad na dapat mong gibuhon huli sana ta ginibo na iyan kan iba o dahil ta iniisip mong iyan an inaasahan sa saimo kan iba.

An sinasabi kan Bibliya: “Gikan sa buot na mapresentar kan saindang sadiri an [banwaan nin Diyos].”—Salmo 110:3.

SALANG PAGHUNA — Kun bako kang bawtisado, dai ka maninimbag sa mga ginigibo mo.

AN TOTOO — Maninimbag ka ki Jehova sa mga ginigibo mo, bako pag nabawtismuhan ka na, kundi pag aram mo na kun ano an tama saka sala sa paghiling niya.

An sinasabi kan Bibliya: “Kun aram nin saro kun paano gibuhon an tama pero dai niya iyan ginigibo, nagkakasala siya.”—Santiago 4:17.

TIP: Kun sa hiling mo dai mo kaya an paninimbagan nin sarong dusay asin bawtisadong Kristiyano, taano ta dai mo siyasaton an saimong sadiri para maaraman kun taano ta arog kaiyan an namamatian mo asin kun ano an makakatabang sa saimo na malabanan iyan? Magigibo mo iyan paagi sa pagbasa kan Kabanata 37 kan librong Ang mga Tanong ng mga Kabataan—Mga Sagot na Lumulutas, Tomo 2.