PADAGOS NA MAGBANTAY!

Nakakabigla na mga Pambabadil sa Bilog na Kinaban—Ano an Sinasabi kan Bibliya?

UPDATE: Abril 27, 2023

Padagos pa man giraray an nangyayaring pambabadil sa iba-ibang lugar sa kinaban. Uni an pira sa mga insidenteng iyan na nangyari pa sana.

“Sa US, nairekord an pinakahalangkaw na bilang nin mga mass killing, na mga sarong insidente kada semana.”—Abril 21, 2023, The Guardian.
“Sampulong miyembro kan sarong pamilya, 7 an babayi saka sarong 13 anyos na lalaki, an nagadan sa mass shooting sa sarong harong sa South Africa.”—Abril 21, 2023, AP News.
“Sarong lalaki an nambadil sa Germany na ikinagadan nin anom katawo bago niya badilon an sadiri niya sa sarong lugar nin pagsamba kan Mga Saksi ni Jehova sa Hamburg.”—Marso 10, 2023, Reuters.

An Bibliya nagtatao nin karangahan sa mga naapektaran kan mga trahedyang arog kaiyan. Para mahiling an sarong eksperyensiya, hilingon an video na DeJanerio Brown: Runot an Puso Pero Dai Nawaran nin Paglaom.

Tinatabangan man kita kan Bibliya na masabutan kun taano ta nangyayari an arog kaiyan na mga trahedya. Para sa dagdag na impormasyon, hilingon an video na Taano ta Tinutugutan nin Diyos an Pagsakit?

Kan Hulyo 2022, may nangyaring nakakabiglang mga pambabadil sa bilog na kinaban:

“An paggadan sa pinakapopular na pulitiko sa Japan [an dating Prime Minister Shinzo Abe] nagkawsa nin grabeng pagkahadit sa saindang nasyon asin pagkabigla sa mga tawo sa bilog na kinaban, lalo na ta sa Japan hababa an kaso nin mga madahas na krimen asin igwa nin istriktong mga ley sa paggamit nin badil.”—Hulyo 10, 2022, The Japan Times.
“Grabe an pagkabigla sa Denmark kan gadanon nin sarong gunman an tulong tawo sa sarong shopping mall sa Copenhagen.”—Hulyo 4, 2022, Reuters.
“South Africa: 15 an gadan kan may mga lalaking magparapambadil sa sarong bar sa banwaan nin Soweto.”—Hulyo 10, 2022, The Guardian.
“Labing 220 an tinamaan saka nagadan sa U.S. sa nangyaring pambabadil kan Hulyo 4 na sarong holiday weekend.”—Hulyo 5, 2022, CBS News.

Igwa daw nin paglaom na matatapos pa an arog kaiyan na mga kadahasan? Ano an sinasabi kan Bibliya?

Katapusan kan Kadahasan

Ilinaladawan kan Bibliya an satong panahon bilang an “huring mga aldaw,” kun sain an mga tawo magigin madahas, brutal, asin maringis. (2 Timoteo 3:1, 3) Dahil sa arog kaiyan na mga kadahasan, an mga tawo nabubuhay sa takot. (Lucas 21:11) Pero, nangangako an Bibliya na maabot an panahon na matatapos an kadahasan asin an mga tawo “maistar . . . sa sarong matuninong na permanenteng lugar, sa ligtas na mga istaran asin sa trangkilong mga irukan.” (Isaias 32:18) Paano matatapos an kadahasan?

Paparaon nin Diyos an mga maraot asin rarauton an gabos na armas.

“Kun manungod sa mga maraot, tatakrason sinda sa daga.”—Talinhaga 2:22.
“Pinapapundo [nin Diyos] an mga giyera sa bilog na daga. Binabari niya an pana asin pinuputol-putol an garod; sinusulo niya an mga karetang panggiyera.”—Salmo 46:9.

Hahalion nin Diyos an gabos na dahilan nin kadahasan paagi sa pagtukdo sa mga tawo na mamuhay nin matuninong.

“Dai sinda mandadanyar o mangraraot sa bilog kong banal na bukid, huling an daga mapapano nanggad kan kaaraman manungod ki Jehova kun paanong tinatakluban nin tubig an dagat.”—Isaias 11:9.
Dawa ngunyan, an Diyos nagtutukdo sa mga tawo sa bilog na kinaban na dai maggibo nin kadahasan asin dai maggamit nin mga armas; tinutukduan niya sinda na ‘pulpugon an saindang mga espada tanganing magin mga tarom nin arado asin an saindang mga garod tanganing magin mga pantakras na kagot.’—Mikas 4:3.

Para mas maaraman pa an manungod sa pangako kan Bibliya na sarong kinaban na mayo na nin takot, basahon an artikulong “Freedom From Fear—Is It Possible?”

Para mas maaraman pa an manungod sa permanenteng solusyon sa kadahasan, basahon an artikulong “Kapayapaan sa Lupa sa Wakas!”