Krisis sa Kakanon sa Bilog na Kinaban Huli sa Giyera Asin Climate Change—Ano an Sinasabi kan Bibliya?

Huli sa giyera sa Ukraine, na sinabayan pa kan epekto kan climate change, naglalala an problema sa suplay nin kakanon sa bilog na kinaban. Apektado kaining marhay an mga nagpoprogresong nasyon kun sain dakul an nasasakitan na magkaigwa nin igong kakanon.

“An produksiyon saka igong suplay nin kakanon apektado talaga huli sa giyera, climate change, presyo kan enerhiya saka iba pa.”—Antonio Guterres, UN secretary-general, Hulyo 17, 2023.
“May prediksiyon an mga eksperto na huli sa pag-atras kan Russia sa kasunduan sa pag-export nin mga grano (grain), mas maglalala an krisis sa kakanon sa bilog na kinaban asin malangkaw pa an implasyon sa kakanon sa mga nasyon na hababa an income, lalo na sa North Africa asin sa Middle East.”—Atalayar.com, Hulyo 23, 2023.

Aramon kun ano an sinasabi kan Bibliya manungod sa krisis sa kakanon asin sa mga mangyayari sa maabot.

Nakahula sa Bibliya na magkakaigwa nin krisis sa kakanon

Ihinula ni Jesus: “An nasyon makikilaban sa nasyon asin an kahadian makikilaban sa kahadian, asin magkakaigwa nin . . . kakulangan nin kakanon.”—Mateo 24:7.
Ilinaladawan kan Bibliya sa libro nin Kapahayagan an apat na simbolikong parakabayo. An saro sa mga parakabayo nagrerepresentar sa giyera. Sinusundan siya nin saro pa na nagrerepresentar sa tiggutom, sarong peryodo nin panahon na an suplay nin kakanon magigin limitado asin halangkawon an presyo. “Nahiling ko an sarong kabayong itom. An nangangabayo may kapot na sarong timbangan. Nakadangog ako nin garo tingog . . . na nagsabi, ‘Sarong takad na trigo sana an mababakal kan sarong aldaw na tandan; tolong takad na sebada sana an mababakal kan sarong aldaw na tandan.’”—Kapahayagan 6:5, 6, An Marahay na Bareta Biblia.

An mga propesiyang ini kan Bibliya manungod sa krisis sa kakanon nauutob na ngunyan sa panahon na inaapod kan Bibliya na “huring mga aldaw.” (2 Timoteo 3:1) Para sa dagdag na impormasyon manungod sa “huring mga aldaw” asin sa apat na parakabayo kan Kapahayagan, hilingon an video na An Kinaban Nagbago Puon kan 1914 asin basahon an artikulong “An Apat na Parakabayo—Siisay Sinda?”

Kun paano makakatabang an Bibliya

An Bibliya igwa nin praktikal na sadol na makakatabang sa sato na makayanan an masakit na mga kamugtakan, kaiba na an paglangkaw kan presyo nin kakanon o pati ngani an kakulangan nin kakanon. Hilingon an pirang halimbawa sa artikulong “Paano Ka Makakapag-adjust Kapag Nabawasan ang Iyong Kita?”
An Bibliya nagtatao man sato nin paglaom na magrarahay an mga kamugtakan. Nangangako iyan na maabot an panahon na “magkakaigwa nin abundang tipasi sa ibabaw kan daga” asin an gabos magkakaigwa nin abundang kakanon. (Salmo 72:16) Para sa dagdag na impormasyon manungod sa paglaom sa maabot na panahon asin kun taano ta makakapagtiwala ka diyan, basahon an artikulong “Makakaasa Ka sa Isang Magandang Kinabukasan.”