Pagigin Vegan—Ano an Sinasabi kan Bibliya?

Sa bilog na kinaban, kadakul an nagkakainteres sa veganismo.

• “An veganismo sarong pilosopiya asin istilo nin pamumuhay kun sain pinagmamaigutan kan mga tawo—sagkod sa posible asin praktikal—na likayan an gabos na klase nin pag-abuso asin pagmaltrato sa mga hayop para magin kakanon, gamiton sa pagbado o sa iba pang katuyuhan.”—The Vegan Society.

Apuwera sa pagmakulog sa mga hayop, may mga tawo na gustong magin vegan ta iniisip ninda an kapalibutan, an saindang salud, o dahil sa paniniwala kan saindang relihiyon.

• “Kumpara sa kadaklan na paagi nin pagdiyeta, an veganismo mas maikokonektar ta sa pilosopiya, sa paninindugan kun ano an tama o sala, asin sa sarong aksiyon na magigibo kan saro para sa ikakarahay kan kinaban.”—Britannica Academic.

An veganismo daw an makakatao nin mas marahay na puturo sa satong planeta? Ano an sinasabi kan Bibliya?

An pagmansay kan satong Kaglalang sa mga tawo asin sa mga hayop

Ipinapahiling kan Bibliya na para sa satong Kaglalang, an Diyos na Jehova,a an mga tawo nakakalabi sa mga hayop asin tinawan niya sinda nin awtoridad na pamahalaan an mga iyan. (Genesis 1:27, 28) Nag-abot an panahon na tinugutan na kan Diyos an mga tawo na magin kakanon an mga hayop. (Genesis 9:3) Pero, dai niya kinukunsinti an pagmaltrato sa mga hayop.—Talinhaga 12:10.

Sinasabi kan Bibliya na personal na desisyon an pagkakan o dai pagkakan nin karne nin hayop.b Dai man nakadepende sa desisyon ta diyan kun baga magigin mas marahay kitang tawo sa paghiling nin Diyos. (1 Corinto 8:8) Mayo sato an dapat manghusgar sa iba sa kun ano an pinipili nindang kakanon.—Roma 14:3.

An paagi para magkaigwa nin mas marahay na puturo

Sinasabi kan Bibliya na an pinipili tang istilo nin pamumuhay dai makakaresolber sa mga problema kan kinaban. Dakul na problema an resulta kan palakaw sa pulitika, sa komunidad, asin sa ekonomiya kan kinaban na ini, na imposible nang mabago. Sinasabi kan Bibliya:

• “An tiko dai na kayang tanuson.”—Eclesiastes 1:15.

Sosolusyunan kan satong Kaglalang an mga problemang inaagihan ta ngunyan. Ilinaladawan kan Bibliya sa simbolikong paagi kun ano an gigibuhon niya.

• “Asin nahiling ko an sarong bagong langit asin an sarong bagong daga; huli ta an dating langit asin an dating daga napara na, asin an dagat mayo na.”—Kapahayagan 21:1.

Sasalidahan kan Diyos an mga gobyerno nin tawo, o “an dating langit,” nin “sarong bagong langit,” an saiyang Kahadian, na sarong langitnon na gobyerno. Hahalion kan saiyang Kahadian “an dating daga,” an mga maraot, asin papamahalaan kaiyan an “sarong bagong daga,” o an mga andam na magpasakop sa saiyang awtoridad.

Sa irarom kan pamamahala kan Kahadian nin Diyos sana maeeksperyensiyahan kan mga tawo na maugmang mamuhay nin matuninong sa magayunon na kapalibutan kaiba an mga hayop.—Isaias 11:6-9.