Siisay an Maligtas sa mga Sibilyan?—Ano an Sinasabi kan Bibliya?

Sa report kan United Nations:

• Puon Oktubre 7 sagkod Oktubre 23, 2023, labing 6,400 na an mga nagadan asin 15,200 na an mga nalugadan huli sa giyera kan Gaza asin Israel, asin kadaklan sa mga iyan mga sibilyan. Dugang pa, ribo-ribo an mga napiritan na maghali sa saindang mga harong.

• Kan Setyembre 24, 2023, huli sa giyera kan Russia asin Ukraine, 9,701 na mga sibilyan na an nagadan asin 17,748 na an mga nalugadan sa Ukraine.

Anong paglaom an itinatao kan Bibliya sa mga tawo na nagsasakit huli sa giyera?

May paglaom pa

Ihinula kan Bibliya na ‘papapunduhon nin Diyos an mga giyera sa bilog na daga.’ (Salmo 46:9) Sasalidahan niya nin sarong langitnon na gobyerno, o kahadian, an gabos na gobyerno nin tawo. (Daniel 2:44) An Kahadian nin Diyos madara nin kaginhawahan sa mga tawo.

Mangnuhon kun ano an gigibuhon ni Jesu-Cristo, an Hadi kan Kahadian nin Diyos:

• “Ililigtas niya an dukha na naghahagad nin tabang, siring man an hamak asin an siisay man na mayo nin paratabang. Mahihirak siya sa hamak asin sa dukha, asin an buhay kan mga dukha ililigtas niya. Sa pang-aapi asin sa kadahasan ililigtas niya sinda.”—Salmo 72:12-14.

Paagi sa saiyang Kahadian, lubos na hahalion nin Diyos an grabeng pagsakit asin pagdusa na dara kan giyera asin kadahasan.

• “Papahidon niya an lambang luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog. An mga dating bagay nakalihis na.”—Kapahayagan 21:4.

Dai na mahahaloy, madali nang gumibo nin dakulang mga pagbabago sa daga an Kahadian nin Diyos. Ihinula kan Bibliya an “mga giyera asin mga bareta manungod sa mga giyera” na nahihiling tang nangyayari ngunyan. (Mateo 24:6) Ipinaparisa kaini asin kan iba pang mga pangyayari na nabubuhay na kita sa “huring mga aldaw” kan pamamahala nin tawo.—2 Timoteo 3:1.