Nuarin Daw Matatapos an mga Giyera?—Ano an Sinasabi kan Bibliya?

“Ngunyan na an panahon na bawasan an tensiyon asin peligro. Ngunyan na an panahon na magpahiling nanggad nin pagpupugol,” an sabi kan United Nations Secretary-General na si Antonio Guterres manungod sa direktang pag-atake kan Iran sa Israel kan Sabado, Abril 13, 2024.

An giyera sa Middle East saro lang na halimbawa kan kun ano an nangyayari sa bilog na kinaban.

“An kinaban napapaatubang ngunyan sa pinakadakul na bilang nin bayolenteng mga giyera na mas dakul pa kisa sa naeksperyensiyahan kaiyan puon kan Giyera Mundiyal II asin 2 bilyon katawo—saro sa apat na tawo—[an] apektado.”—United Nations Security Council, Enero 26, 2023.

Kaiba sa mga lugar na imbuwelto sa bayolenteng mga giyera an Israel, Gaza, Syria, Azerbaijan, Ukraine, Sudan, Ethiopia, Niger, Myanmar, asin Haiti.a

Nuarin daw matatapos an mga giyera? Maitatao daw kan mga lider sa kinaban an katuninungan? Ano an sinasabi kan Bibliya?

Sarong kinaban na dakul an giyera

An dakul na giyerang nangyayari ngunyan sa kinaban nagpaparisa na dai na mahahaloy matatapos na an gabos na giyera. An mga giyerang ini kautuban kan propesiya sa Bibliya manungod sa peryodo nin panahon na kinabubuhayan niyato. Inaapod iyan kan Bibliya na “pagtatapos kan sistema nin mga bagay.”—Mateo 24:3.

• “Makakadangog kamo nin ribok nin mga giyera asin mga bareta manungod sa mga giyera. . . . An nasyon makikilaban sa nasyon asin an kahadian makikilaban sa kahadian.”—Mateo 24:6, 7.

Basahon an artikulong “Ano an Tanda kan “Huring mga Aldaw,” o kan ‘Katapusan kan Panahon’?” para maaraman kun paanong an mga giyera ngunyan kautuban kan propesiya sa Bibliya.

Sarong giyera na matapos sa gabos na giyera

Ihinuhula kan Bibliya an katapusan kan mga giyera nin tawo. Paano iyan mangyayari? Bako paagi sa paghihinguwa nin tawo, kundi paagi kan Armagedon, an “giyera kan dakulang aldaw kan Diyos na Makakamhan sa Gabos.” (Kapahayagan 16:14, 16) An giyerang ini magpapagin posible na mautob nin Diyos an saiyang panuga na makamtan kan katawuhan an nagdadanay na katuninungan.—Salmo 37:10, 11, 29.

Para makanuod pa manungod sa giyera nin Diyos na matapos sa gabos na giyera, basahon an artikulong “Ano an Ralaban nin Armagedon?”