Zionist Daw an Mga Saksi ni Jehova?

Dai. Kristiyano an Mga Saksi ni Jehova asin nakabasar sa Bibliya an saindang mga paniniwala. Itinutukdo kan nagkapirang relihiyon na an pagbalik kan mga Judio sa Palestina konektado sa hula sa Kasuratan, pero bakong arog kaiyan an pagtubod kan Mga Saksi ni Jehova. Dai sinda nagtutubod na an pulitikal na pangyayaring ini espesipikong nakahula sa Bibliya. Sa katunayan, an Kasuratan dai nagsusuportar sa ano man na partikular na gobyerno nin tawo o ilinalangkaw an sarong etnikong grupo o nasyonalidad sa iba. An opisyal na magasin kan Mga Saksi ni Jehova na An Torrengbantayan malinaw na nagpahayag: “. . . dai nin Makakasuratan na basehan para sa pulitikal na Zionism.”

Ilinaladawan kan Encyclopædia Britannica an Zionism bilang sarong “nasyonalistikong mobimiyento kan mga Judio na may pasuhan na magkaigwa nin asin masuportaran an sarong estado nasyonal nin mga Judio sa Palestina.” An ginikanan kaini parehong relihiyoso asin pulitikal. An Mga Saksi ni Jehova dai itinutukdo an Zionism bilang sarong relihiyosong doktrina, asin biyo sindang neutral mapadapit sa pulitikal na Zionism.

Sarong relihiyosong organisasyon an Mga Saksi ni Jehova asin dai ini nagsusuportar sa ano man na pulitikal na areglo, kaiba na diyan an Zionism. Dakul na rekord an nagpapatunay na neutral an Mga Saksi ni Jehova pag-abot sa pulitika. Sa nagkapirang nasyon, mas pinili kan Mga Saksi ni Jehova na mag-agi nin grabeng persekusyon imbes na ikompromiso an saindang neutralidad. Kumbinsido kami na an langitnon na Kahadian nin Diyos sana an makakatao nin nagdadanay na katuninungan sa daga; mayong gobyerno o mobimiyento nin tawo an makakagibo kaini.

An pagkuyog sa mga ley kan sekular na mga gobyerno sarong panginot na prinsipyo na sinusunod kan Mga Saksi ni Jehova. Dai sinda nagrerebelde sa gobyerno o nakikiiba sa armadong pakikilaban.