Pagkatakot sa Kagadanan—Paano Mo Iyan Mapapangganahan?
An simbag kan Bibliya
Normal lang na matakot kita sa kagadanan bilang kaiwal saka naggigibo kita nin rasonableng mga paagi para maingatan an buhay ta. (1 Corinto 15:26) Pero, an mga tawo na bakong rasonable an pagkatakot sa kagadanan dahil sa kaputikan o superstisyon nagigin “uripon kan saindang takot sa kagadanan sa bilog nindang buhay.” (Hebreo 2:15) Pag naaraman mo an katotoohan, mawawara an sobrang pagkatakot mo sa kagadanan—sarong pagkatakot na puwedeng makahali kan kakayahan mong ikaugma an buhay.—Juan 8:32.
An katotoohan manungod sa kagadanan
An mga gadan mayo nin pag-aram. (Salmo 146:4) Dai mo kaipuhan na matakot na papasakitan ka pag nagadan ka, ta ikinumparar kan Bibliya an kagadanan sa pagturog.—Salmo 13:3; Juan 11:11-14.
Dai kita kayang kulugan kan mga gadan. Dawa an madahas tang mga kaiwal na nagadan na “dai nang nagigibo pa.” (Talinhaga 21:16) Sinasabi kan Bibliya na an “saindang pagkaungis saka an saindang pagkauri napara na.”—Eclesiastes 9:6.
An kagadanan bako an katapusan kan satong pag-eksister. Paagi sa pagbuhay liwat, bubuhayon kan Diyos an mga tawong nagadan na.—Juan 5:28, 29; Gibo 24:15.
Nangangako an Diyos na maabot an panahon na “an kagadanan mawawara na.” (Kapahayagan 21:4) Sa panahon na iyan, sinasabi kan Bibliya: “Magigin pagsadiri kan mga matanos an daga, asin maistar sinda diyan nin daing sagkod,” na mayo nin ano man na pagkatakot na magagadan sinda.—Salmo 37:29.