Parareho Daw an Gabos na Relihiyon? Gabos Daw Iyan Pasiring sa Diyos?

An simbag kan Bibliya

Bako. Bakong parareho an gabos na relihiyon. Mababasa sa Bibliya an dakul na halimbawa nin mga relihiyon na dai nakakapaugma sa Diyos. Nababanga ini sa duwang kategoriya.

Kategoriya 1: Pagsamba sa bakong tunay na mga diyos

Sa Bibliya, an pagsamba sa bakong tunay na mga diyos inaapod na “imahinasyon sana,” “mayong kamanungdanan,” asin ‘daing serbi.’ (Jeremias 10:3-5; 16:19, 20) Pinagbutan kan Diyos na Jehovaa an suanoy na nasyon nin Israel: “Dai ka magkaigwa nin ibang mga diyos apuwera sa sako.” (Exodo 20:3, 23; 23:24) Kan an mga Israelita magsamba sa ibang mga diyos, “naanggot na marhay si Jehova.”—Bilang 25:3; Levitico 20:2; Hukom 2:13, 14.

Arog pa man giraray kaiyan an sabuot nin Diyos sa pagsamba sa “inaapod na mga diyos” na iyan. (1 Corinto 8:5, 6; Galacia 4:8) Ipinagbuot niya sa mga gustong sumamba saiya na dai na makiiba sa mga nagsasagibo nin palsong relihiyon: “Magruluwas kamo sa tahaw ninda, asin isuway nindo an saindong sadiri.” (2 Corinto 6:14-17) Kun an gabos na relihiyon parareho asin pasiring sa Diyos, taano ta itinao pa nin Diyos an pagbuot na iyan?

Kategoriya 2: Pagsamba sa tunay na Diyos sa salang paagi

May mga pagkakataon na nagsamba an mga Israelita sa Diyos paagi sa mga paniniwala asin mga kaugalian na hali sa pagsamba sa bakong tunay na mga diyos, pero dai inuyunan ni Jehova an pagpurbar nindang iyan na salakan an tunay na relihiyon nin palso. (Exodo 32:8; Deuteronomio 12:2-4) Kinondenar ni Jesus an mga lider nin relihiyon kan panahon niya huli sa paagi ninda nin pagsamba sa Diyos; kun hihilingon garo relihiyoso sinda, pero mapagsagin-sagin nindang “pigbabaliwala . . . an mas matimbang na mga bagay kan Katugunan, na iyo an hustisya asin pagkahirak saka kaimbudan.”—Mateo 23:23.

Arog man kaiyan ngunyan, an relihiyon sana na nakabase sa katotoohan an minagiya sa mga tawo pasiring sa Diyos. An katotoohan na ini mahihiling sa Bibliya. (Juan 4:24; 17:17; 2 Timoteo 3:16, 17) An mga relihiyon na nagtutukdo nin kontra sa Bibliya, sa katunayan, irinarayo an mga tawo sa Diyos. Dakul na katukduan na iniisip kan mga tawo na hali sa Bibliya—arog kan Trinidad, imortalidad kan kalag, asin daing sagkod na pagpasakit—hali palan sa mga nagsasamba sa bakong tunay na mga diyos. An pagsamba na nagpapalakop nin arog kaiyan na mga katukduan “daing kamanungdanan,” o daing serbi, huling riniribayan kaiyan nin mga tradisyon nin relihiyon an mga kahagadan nin Diyos.—Marcos 7:7, 8.

Ikinakabaldi nin Diyos an pagsagin-sagin nin mga relihiyon. (Tito 1:16) Para matabangan an mga tawo na mas maparani sa Diyos, an sarong relihiyon dapat na igwa nin epekto sa buhay nin mga tawo sa aroaldaw asin bako sanang puro ritwal o pormalidad. Halimbawa, sinasabi kan Bibliya: “Kun iniisip nin siisay man na tawo na relihiyoso siya pero dai niya maingat na pigkokontrol an saiyang dila, dinadaya niya an sadiri niyang puso, asin sayang sana an saiyang pagsamba. An relihiyon na malinig saka daing digta sa paghiling kan satuyang Diyos asin Ama iyo ini: an pag-ataman sa mga ilo saka babaying balo na nagsasakit, asin an pagpadanay sa sadiri na daing digta kan kinaban.” (Santiago 1:26, 27; mga nota sa ibaba) Sa King James Version, ginamit an mga tataramon na “dalisay na relihiyon” para sa malinig asin bakong mapagsagin-sagin na pagsambang ini.