Ano an Bawtismo?
An simbag kan Bibliya
An bawtismo iyo an paglubog sa tubig.a Dakul na bawtismo an mababasa sa Bibliya. (Gibo 2:41) Saro diyan iyo an bawtismo ni Jesus, kun sain ilinubog siya sa Salog nin Jordan. (Mateo 3:13, 16) Pakalihis nin pirang taon, sarong Etiopeng lalaki an binawtismuhan sa “sarong lugar na may tubig” harani sa tinampong inaagihan niya.—Gibo 8:36-40.
Itinukdo ni Jesus na kaipuhan mabawtismuhan an saiyang mga parasunod. (Mateo 28:19, 20) Idinuon man iyan ni apostol Pedro.—1 Pedro 3:21.
Sa artikulong ini
Ano an sinasabi kan Bibliya manungod sa bawtismo sa umboy o pagpabunyag?
Ano an buot sabihon kan bawtismo sa ngaran kan Ama, kan Aki, asin kan banal na espiritu?
Ano an buot sabihon kan bawtismo?
An bawtismo sarong bagay na ginigibo nin saro para ipahiling sa mga tawo na pinagsulsulan na niya an saiyang mga kasalan asin nangangako siya sa Diyos na gigibuhon niya an Saiyang kabutan ano man an mangyari. Kaiba diyan an pamumuhay na pirming sinusunod an Diyos asin si Jesus. An mga tawong nagpabawtismo nagkakaigwa nin paglaom na mabuhay nin daing katapusan.
An paglubog sa tubig angay nanggad na simbolo para sa pagbabagong ginibo nin sarong tawo sa buhay niya. Taano? Ikinukumparar kan Bibliya an bawtismo sa paglubong. (Roma 6:4; Colosas 2:12) Paagi sa paglubog sa tubig, garo man sana an saro nagadan sa dati niyang paagi nin pamumuhay. Paghawas niya, pinupunan na niya an panibagong buhay bilang sarong dusay na Kristiyano.
Ano an sinasabi kan Bibliya manungod sa bawtismo sa umboy o pagpabunyag?
Mayong mababasa sa Bibliya na mga tataramon na “bunyag” o “pagpabunyag.”b Dai man kaiyan itinutukdo na an mga umboy dapat na bawtismuhan.
An pagbawtismo sa mga umboy bakong kauyon kan itinutukdo kan Kasuratan. Sinasabi kan Bibliya na kun gusto nin saro na magpabawtismo dapat na abuton niya an espesipikong mga kahagadan. Halimbawa, dapat na nasasabutan niya an panginot na mga katukduan kan Tataramon nin Diyos asin namumuhay kauyon kan mga iyan. Pinagsulsulan na niya an saiyang mga kasalan. Asin paagi sa pamibi, idinusay na niya an saiyang buhay sa Diyos. (Gibo 2:38, 41; 8:12) Dai magigibo nin sarong umboy an mga bagay na ini.
Ano an buot sabihon kan bawtismo sa ngaran kan Ama, kan Aki, asin kan banal na espiritu?
Pinagbutan ni Jesus an saiyang mga parasunod: “Gumibo kamo nin mga disipulo . . . , na binabawtismuhan sinda sa ngaran kan Ama asin kan Aki asin kan banal na espiritu, na tinutukduan sinda na utubon an gabos na bagay na ipinagbuot ko sa saindo.” (Mateo 28:19, 20) An “sa ngaran kan” nangangahulugan na minimidbid kan saro na babawtismuhan an awtoridad asin posisyon kan Ama asin kan Aki, saka an papel kan banal na espiritu nin Diyos. Para iilustrar: Sinabi ni apostol Pedro sa sarong lalaki na ipinangaki nang pilay: “Sa ngaran ni Jesu-Cristo na Nazareno, maglakaw ka!” (Gibo 3:6) Malinaw an buot sabihon kaiyan—minidbid ni Pedro an awtoridad ni Cristo asin sinabi niyang si Jesus an dahilan kan milagrosong pagpaumay na iyan.
“An Ama” nanunungod sa Diyos na Jehovac. Bilang an Kaglalang, an Paratao nin Buhay, asin an Diyos na Makakamhan sa Gabos, yaon ki Jehova an pinakahalangkaw na awtoridad.—Genesis 17:1; Kapahayagan 4:11.
“An Aki” iyo si Jesu-Cristo, na itinao an saiyang buhay para sa sato. (Roma 6:23) Dai kita magkakamit nin kaligtasan kun dai ta mimidbidon asin papahalagahan an mahalagang papel ni Jesus sa katuyuhan nin Diyos para sa katawuhan.—Juan 14:6; 20:31; Gibo 4:8-12.
“An banal na espiritu” iyo an aktibong puwersa nin Diyos, o an ginagamit niyang kapangyarihan.d Ginamit nin Diyos an saiyang banal na espiritu sa paglalang, sa pagtaong buhay, sa pagpaabot kan saiyang mensahe sa mga propeta asin iba pa, saka sa pagtao sa sainda nin kakayahan na gibuhon an saiyang kabutan. (Genesis 1:2; Job 33:4; Roma 15:18, 19) Ginamit man kan Diyos an banal na espiritu para pasabngan an mga kagsurat nin Bibliya na isurat an saiyang mga kaisipan.—2 Pedro 1:21.
Sarong kasalan daw an pagpabawtismo giraray?
Dakul na tawo an nagdedesisyon na magribay nin relihiyon. Pero paano kun binawtismuhan na sinda sa dati nindang relihiyon? Magkakasala daw sinda kun mapabawtismo sinda giraray? Sinasabi kan iba na iyo, posibleng dahil sa mababasa sa Efeso 4:5, na nagsasabi: “Sarong Kagurangnan, sarong pagtubod, sarong bawtismo.” Pero, an tekstong ini dai nangangahulugan na dai puwedeng bawtismuhan giraray an saro. Taano?
Konteksto. An konteksto kan Efeso 4:5 nagpapahiling na idinuduon ni apostol Pablo na an tunay na mga Kristiyano dapat na sararo sa saindang pagtubod saka paniniwala. (Efeso 4:1-3, 16) An siring na pagkasararo mangyayari lang kun sarong Kagurangnan sana an susundon ninda, si Jesu-Cristo; saro an pagtubod, o pakasabot sa kun ano an itinutukdo kan Bibliya, asin sinusunod an parehong maka-Kasuratan na kahagadan para sa bawtismo.
Dinagka ni apostol Pablo an ibang binawtismuhan na magpabawtismo giraray huling binawtismuhan sinda kaidto na mayo nin lubos na pakasabot sa Kristiyanong katukduan.—Gibo 19:1-5.
Tamang basehan sa bawtismo. Para akuon nin Diyos an bawtismo, dapat na nakabasar iyan sa tamang kaaraman manungod sa katotoohan sa Bibliya. (1 Timoteo 2:3, 4) Kun an sarong tawo binawtismuhan basado sa mga katukduan sa relihiyon na bakong kauyon kan Bibliya, dai iyan aakuon nin Diyos. (Juan 4:23, 24) Dawa ngani sinsero man siya, dai siya huminiro “uyon sa tamang kaaraman.” (Roma 10:2) Para uyunan nin Diyos, dapat na manudan niya an katotoohan sa Bibliya, isabuhay iyan, idusay an saiyang buhay sa Diyos, asin magpabawtismo giraray. Sa pagkakataon na iyan, bakong kasalan an pagpabawtismo niya giraray. An totoo, iyan an tamang gibuhon.
Iba pang bawtismo sa Bibliya
Mababasa sa Bibliya an iba pang mga bawtismo na igwa nin ibang kahulugan. Pag-isipan an pirang halimbawa.
Bawtismo na ginibo ni Juan Bautista.e An mga Judio asin an mga Judiong proselito binawtismuhan ni Juan bilang simbolo kan saindang pagsulsol sa mga kasalan na nagibo ninda sa irarom kan Katugunan na itinao nin Diyos sa mga Israelita paagi ki Moises. Inandam kan bawtismo ni Juan an mga tawo na midbidon asin akuon an Mesiyas, si Jesus na taga Nazaret.—Lucas 1:13-17; 3:2, 3; Gibo 19:4.
Bawtismo ni Jesus. Mayong kapareho an pagbawtismo ni Juan Bautista ki Jesus. Saro siyang perpektong tawo asin dai siya nagkasala. (1 Pedro 2:21, 22) Kaya dai kaiba an pagsulsol o “paghagad sa Diyos nin sarong malinig na konsiyensiya” sa saiyang bawtismo. (1 Pedro 3:21) Imbes, ipinapahiling kaidto na ipinepresentar niya an saiyang sadiri sa Diyos na gigibuhon niya an Saiyang kabutan bilang an ipinanugang Mesiyas, o Cristo. Kaiba digdi an pagtao niya kan saiyang buhay para sato.—Hebreo 10:7-10.
Bawtismo sa banal na espiritu. Parehong sinambit ni Juan Bautista asin ni Jesu-Cristo an manungod sa bawtismo sa banal na espiritu. (Mateo 3:11; Lucas 3:16; Gibo 1:1-5) An bawtismong idto bakong kapareho kan bawtismo sa ngaran kan banal na espiritu. (Mateo 28:19) Taano?
Pipira lang sa mga parasunod ni Jesus an binawtismuhan sa banal na espiritu. Sinda iyo an mga linahidan kan banal na espiritu dahil inapod sinda para maglingkod kaiba ni Cristo sa langit bilang kapwa niya mga hadi asin saserdote sa bilog na daga.f (1 Pedro 1:3, 4; Kapahayagan 5:9, 10) An papamahalaan ninda iyo an minilyon na mga parasunod ni Jesus na igwa nin paglaom na mabuhay nin daing katapusan sa Paraisong daga.—Mateo 5:5; Lucas 23:43.
Bawtismo ki Cristo Jesus asin sa saiyang kagadanan. An mga binawtismuhan sa banal na espiritu “binawtismuhan [man] ki Cristo Jesus.” (Roma 6:3) Kun siring, an bawtismong ini, aplikado sa linahidan na mga parasunod ni Jesus, na mamamahala kaiba niya sa langit. Paagi sa bawtismo ki Jesus, nagigin sindang kabtang kan saiyang linahidan na kongregasyon. Siya an Payo, asin sinda an hawak.—1 Corinto 12:12, 13, 27; Colosas 1:18.
An linahidan na mga Kristiyano ‘binawtismuhan man sa kagadanan ni Jesus.’ (Roma 6:3, 4) Bilang pag-arog ki Jesus, may pagsasakripisyo nindang sinusunod an Diyos asin aram nindang dai sinda mabubuhay nin daing katapusan digdi sa daga. Matatapos an simbolikong bawtismong ini pag nagadan na sinda asin nag-ako nin buhay na daing katapusan sa langit bilang espiritung mga linalang.—Roma 6:5; 1 Corinto 15:42-44.
Bawtismo sa kalayo. Sinabi ni Juan Bautista sa saiyang mga paradangog: “Babawtismuhan niya [ni Jesus] kamo sa banal na espiritu asin sa kalayo. Nasa kamot niya an palang pampapalid, asin lubos niyang lilinigan an saiyang ginikan saka titipunon sa kamalig an saiyang trigo, pero an apa susuluon niya sa kalayo na dai masisigbo.” (Mateo 3:11, 12) Mangnuhon na igwa nin pagkakaiba an bawtismo sa kalayo asin an bawtismo sa banal na espiritu. Ano an buot sabihon ni Juan kan ilustrasyon na ini?
An trigo nagrerepresentar sa mga madangog ki Jesus asin masunod sa saiya. Igwa sinda nin paglaom na bawtismuhan sa banal na espiritu. An apa nagrerepresentar sa mga dai madangog ki Jesus. Babawtismuhan sinda sa kalayo, na nagsisimbolisar sa daing katapusan na pagkalaglag.—Mateo 3:7-12; Lucas 3:16, 17
a An Griegong tataramon na trinadusir para sa tataramon na “bawtismo” nanunungod sa “pagbuntog, paglubog asin paghawas,” sigun sa Vine’s Complete Expository Dictionary of Old and New Testament Words.
b An “pagpabunyag” nanunungod sa sarong seremonyang ginigibo kan nagkapirang simbahan kun sain tinatawan nin pangaran an umboy asin “binabawtismuhan” paagi sa pagwirik o pagbubo nin tubig sa saindang payo.
c Jehova an personal na pangaran nin Diyos. (Salmo 83:18) Hilingon an artikulong “Siisay si Jehova?”
d Hilingon an artikulong “Ano an Banal na Espiritu?”
e Hilingon an artikulong “Sino si Juan Bautista?”
f Hilingon an artikulong “Siisay an mga Mapalangit?”
g Ginagamit man kan Bibliya an tataramon na “bawtismo” para iladawan an nagkapirang seremonyal na paglilinig, arog nin paglubog sa tubig kan mga gamit. (Marcos 7:4; Hebreo 9:10) Pero naiiba ini sa paglubog sa tubig na ginibo ni Jesus asin kan saiyang mga parasunod.