An Kuwarta Daw an Gamot kan Gabos na Karatan?

An simbag kan Bibliya

Bako. Mayong sinasabi an Bibliya na an kuwarta maraot o na an kuwarta an pinakadahilan kan gabos na maraot na bagay. An komun na ekspresyon na an “kwarta iyo an gamot kan gabos na karatan” bakong kumpleto asin makaribong na kotasyon hali sa Bibliya. An talagang sinasabi kan Bibliya iyo na “an pagkamoot sa kwarta iyo an gamot kan gabos na karatan.”a—1 Timoteo 6:10, An Marahay na Bareta Biblia, samo an italiko.

• Ano an sinasabi kan Bibliya manungod sa kuwarta?

• Taano ta pinapatanidan kita kan Bibliya manungod sa pagkamuot sa kuwarta?

• Paano kita makikinabang sa sadol kan Bibliya manungod sa kuwarta?

• Mga teksto sa Bibliya manungod sa kuwarta

Ano an sinasabi kan Bibliya manungod sa kuwarta?

Sinasabi kan Bibliya na an kuwarta, pag ginamit sa madunong na paagi, puwedeng magin kapaki-pakinabang asin puwede pa nganing magserbing “proteksiyon.” (Eclesiastes 7:12) Apuwera kaiyan, kinokomendaran kan Bibliya an mga nagpapahiling nin pagkabukas-palad sa iba, na tibaad kaiba diyan an pagtao nin regalong kuwarta.—Talinhaga 11:25.

Kasabay kaiyan, pinapatanidan kita kan Bibliya na dai ta ipokus an satong buhay sa kuwarta. Sinasabi kaiyan: “An saindo lugod na pamumuhay dai mahilingan nin pagkamuot sa kuwarta, mantang kontento na kamo sa mga bagay na igwa kamo.” (Hebreo 13:5) An leksiyon iyo na ibugtak an kuwarta sa tamang lugar sa saimong buhay asin dai magparamaigot na yumaman. Imbes, dapat na hinguwahon tang magin kontento sa mga bagay na talagang kaipuhan ta, arog kan kakanon, bado, asin istaran.—1 Timoteo 6:8.

Taano ta pinapatanidan kita kan Bibliya manungod sa pagkamuot sa kuwarta?

An mga tawong mahanab dai magkakamit nin buhay na daing katapusan. (Efeso 5:5) An sarong dahilan iyo na an kahanaban sarong klase nin idolatriya, o palsong pagsamba. (Colosas 3:5) An saro pang dahilan iyo na dahil sa paghihinguwa kan mga tawong mahanab na makua an minamawot ninda, sa parati dai sinda namumuhay kauyon kan marahay na mga prinsipyo. An mga “naghihidaling yumaman dai magdadanay na daing sála,” an sabi kan Talinhaga 28:20. Tibaad matentaran pa ngani sindang gumibo nin mga krimen, arog nin pamba-blackmail, pangingikil, pandadaya, pangingidnap, o paggadan.

Dawa kun an pagkamuot sa kuwarta dai magresulta sa maraot na paggawi, puwede iyan magkaigwa nin iba pang maraot na mga konsekwensiya. Sinasabi kan Bibliya na “an mga determinadong yumaman nahuhulog sa sugot saka sa siod asin sa dakul na daing saysay saka nakakadanyar na mga pagmawot.”—1 Timoteo 6:9.

Paano kita makikinabang sa sadol kan Bibliya manungod sa kuwarta?

Kun dai ta ikokompromiso alang-alang sa kuwarta an mga bagay na aram tang tama asin nakakapaugma sa Diyos, makakamati kita nin paggalang sa sadiri asin makakamtan ta an pag-uyon asin suporta nin Diyos. Para sa mga sinserong naghihinguwa na paugmahon an Diyos, nanunuga siya: “Dai taka nuarin man babayaan, asin dai taka nuarin man papabayaan.” (Hebreo 13:5, 6) Inaasigurar niya man sato na “an tawong maimbod magkakamit nin dakul na bendisyon.”—Talinhaga 28:20.