An Korteng V na Posisyon kan Cabbage White Butterfly

Tanganing makalayog, kaipuhan nin kulibangbang (butterfly) an init kan saldang para painiton an saindang mga kalamnan sa paglayog. Pero sa madagom na mga aldaw, naiinot na maglayog an cabbage white butterfly kisa sa ibang mga kulibangbang. Paano ninda nagigibo iyan?

Pag-isipan: Bago maglayog, an dakul na klase nin kulibangbang nagbabalad sa saldang na magsalang nakasara an pakpak o nakabiklad iyan na marhay. Pero, an cabbage white butterfly ibinubuka an saindang pakpak sa posisyon na korteng V. Ipinapahiling sa pagsiyasat na tanganing magamit an init kan saldang sa pinakalubos na paagi, kaipuhan kan kulibangbang na ibuka an mga pakpak kaiyan nin mga 17 degrees. Paagi sa posisyon na ini, an init kan saldang direktang napapaduman sa mga kalamnan sa paglayog na nasa thorax, kaya napapainit an mga iyan para makalayog.

Pinag-adalan kan mga parasiyasat hali sa University of Exeter sa England, kun baga makakagibo sinda nin mas epektibong mga solar panel paagi sa pag-arog sa korteng V na posisyon kan kulibangbang. Nadiskubre ninda na naglangkaw nin haros 50 porsiyento an enerhiyang naprodusir.

Narisa man kan mga parasiyasat na reflective na marhay an ibabaw kan pakpak kan kulibangbang. Inarog kan mga parasiyasat an korteng V na posisyon asin an pagigin reflective kan pakpak kaiyan kaya nakagibo sinda nin mas magian asin mas episiyenteng mga solar panel. Huli sa mga resultang ini, si Professor Richard ffrench-Constant, na miyembro kan research team, inapod an cabbage white butterfly na “eksperto sa pagtipon nin enerhiya kan saldang.”

Ano sa hiling mo? Resulta daw nin ebolusyon an korteng V na posisyon kan pakpak kan cabbage white butterfly? O may nagdisenyo daw kaiyan?