Salmo 46:10—‘Magtuninong Kamo, Asin Midbidon Nindo na Ako Iyo an Diyos’

“Magpasakop kamo asin midbidon nindo na ako an Diyos. Papamurawayon ako sa tahaw kan mga nasyon; papamurawayon ako sa daga.”—Salmo 46:10, Bagong Kinaban na Traduksiyon.

‘Magtuninong kamo, asin midbidon nindo na ako iyo an Diyos: pinakahalangkaw sa tahaw nin mga nasyon, pinakahalangkaw sa bilog na kinaban.’—Salmo 46:10, An Marahay na Bareta Biblia.

Kahulugan kan Salmo 46:10

Gusto nin Diyos na magsamba saiya an gabos asin midbidon an saiyang deretso na mamahala sa bilog na daga. Daing kapantay nanggad an saiyang kapangyarihan asin awtoridad, asin dapat na midbidon iyan kan siisay man na gustong mabuhay nin daing katapusan.—Kapahayagan 4:11.

“Magpasakop kamo asin midbidon nindo na ako an Diyos.” Sa nagkapirang traduksiyon kan Bibliya, an inot na parte kan mga tataramon na ini itrinadusir na ‘magtuninong kamo.’ Huli kaiyan, nagkaigwa nin salang pakasabot diyan an mga tawo asin hinuna ninda na sarong pagbuot iyan na igalang o magsilensiyo sa simbahan. Pero, an pananaram sa Hebreo na itrinadusir na “magpasakop kamo asin midbidon nindo na ako an Diyos,” sarong sadol hali sa Diyos na Jehovaa para sa gabos na tawo kan mga nasyon, na sinasabihan sinda na pumundo na sa pagtumang sa saiya asin midbidon siya na siya sana an maninigong sambahon.

Arog man kaiyan an sadol na mahihiling sa Salmo 2. Diyan, nangangako an Diyos na mahiro siya laban sa mga nagtutumang sa saiya. Pero, an mga nakakamidbid sa awtoridad nin Diyos nagsasarig sa saiya para sa paggiya, kusog, asin kadunungan. An mga “nagpapaili sa Saiya” nakakamati nin kaugmahan asin katiwasayan, lalo na sa masakit na mga panahon.—Salmo 2:9-12.

“Papamurawayon ako sa tahaw kan mga nasyon; papamurawayon ako sa daga.” Kaidto, napamuraway an Diyos na Jehova kan ginamit niya an saiyang pambihirang kusog tanganing protektaran an saiyang banwaan. (Exodo 15:1-3) Sa maabot na panahon, mas urog pa siyang papamurawayon pag an gabos na tawo sa daga magpasakop na sa saiyang awtoridad asin magsamba sa saiya.—Salmo 86:9, 10; Isaias 2:11.

Konteksto kan Salmo 46:10

Uyon sa sarong reperensiya, an Salmo 46 “sarong kanta na ipinapahayag an kapangyarihan nin Diyos, an makusog na parasurog kan saiyang banwaan.” Pag kinakanta kan banwaan nin Diyos an Salmo 46, ipinapahayag ninda an saindang pagtitiwala na kaya sindang protektaran asin tabangan ni Jehova. (Salmo 46:1, 2) An mga tataramon diyan nagpapagirumdom sa sainda na pirmi nindang kaibanan si Jehova.—Salmo 46:7, 11.

Tanganing pakusugon an saindang pagtitiwala sa kapangyarihan ni Jehova na protektaran sinda, dinagka sinda kan salmo na hurop-hurupon an kahanga-hangang mga bagay na ginibo ni Jehova. (Salmo 46:8) Idinuon kaiyan an kakayahan niya na tapuson an mga giyera. (Salmo 46:9) Garo man sana tinapos ni Jehova an giyera kan panahon kan Bibliya paagi sa pagprotektar sa saiyang banwaan laban sa mga kaiwal na nasyon kaini. Pero, nangangako an Bibliya na sa dai na mahahaloy urog pa diyan an gigibuhon nin Diyos pag tinapos na niya an mga giyera sa bilog na kinaban.—Isaias 2:4.

Tinatabangan pa man daw giraray ni Jehova an saiyang mga parasamba ngunyan? Iyo. Sa katunayan, pinakusog nanggad ni apostol Pablo an mga Kristiyano na magsarig sa Saiya para sa tabang. (Hebreo 13:6) An Salmo 46 nagpapakusog kan satong pagtitiwala sa kapangyarihan nin Diyos na protektaran kita. Nagtatabang iyan sa sato na mansayon an Diyos bilang an “satong pailihan asin kakusugan.”—Salmo 46:1.

Hilingon an halipot na videong ini para mahiling an sumaryo kan libro nin Salmo.