Talinhaga 16:3—“Idusay Mo sa KAGURANGNAN an Gabos Mong Gibo”

“Ipagkatiwala mo ki Jehova an ano man na ginigibo mo, asin magigin mapanggana an saimong mga plano.”—Talinhaga 16:3, Bagong Kinaban na Traduksiyon.

“Idusay mo sa KAGURANGNAN an gabos mong gibo, asin maootob an saimong mga plano.”—Talinhaga 16:3, An Marahay na Bareta Biblia (Bikol Popular Version).

Kahulugan kan Talinhaga 16:3

Sinisigurado kan talinhagang ini na magigin mapanggana an mga plano kan mga nagsasamba sa tunay na Diyos kun nagsasarig saka nagsusunod sinda sa paggiya niya.

“Ipagkatiwala mo ki Jehova an ano man na ginigibo mo.” Bago maggibo nin mga desisyon, an mga nagsasamba ki Jehovaa mapakumbabang minadulok saiya para hagadon an paggiya niya. (Santiago 1:5) Taano? Huling sa parati, dai kontrolado kan mga tawo an mga nangyayari sa buhay ninda. (Eclesiastes 9:11; Santiago 4:13-15) Saro pa, tibaad kulang an saindang kaaraman para maisagibo an mga plano ninda. Huli kaiyan, dakul an may kadunungan na ipinagkakatiwala sa Diyos an saindang mga plano. Ginigibo ninda iyan paagi sa pagpamibi sa saiya para sa paggiya saka sa paghiro kauyon kan saiyang kabutan na mababasa sa saiyang Tataramon, an Bibliya.—Talinhaga 3:5, 6; 2 Timoteo 3:16, 17.

An mga tataramon na “idusay mo sa KAGURANGNANb an gabos mong gibo” literal na nangangahulugan na “ipaligid mo sa KAGURANGNAN an mga ginigibo mo.” Uyon sa sarong reperensiya, ilinaladawan kan ekspresyon na ini an “sarong tawo na ipinapasa an saiyang pasan sa saro na mas makusog saiya asin mas kayang pasanon iyan.” Makakasigurado nanggad an mga mapakumbabang nagsasarig sa Diyos na tatabangan asin aatamanon niya sinda.—Salmo 37:5; 55:22.

An ekspresyon na “ano man na ginigibo mo” dai nangangahulugan na uuyunan o bebendisyunan nin Diyos an lambang plano kan mga tawo. Tanganing mag-ako sinda kan bendisyon ni Jehova, an mga plano ninda dapat na kauyon kan mga pamantayan saka kabutan niya. (Salmo 127:1; 1 Juan 5:14) Dai binebendisyunan nin Diyos an mga masinuway. Sa katunayan, “inuulang niya an mga plano kan mga maraot.” (Salmo 146:9) Pero, binebendisyunan niya an mga nagpapasakop saiya, na sinusunod an mga pamantayan niya na yaon sa Bibliya.—Salmo 37:23.

“Asin magigin mapanggana an saimong mga plano.” Sa ibang traduksiyon kan Bibliya, an ekspresyon na “magigin mapanggana” itrinadusir na ‘papapusugon.’ Sa Hebreong Kasuratan, o sa inaapod kan kadaklan na Lumang Tipan, an tataramon na itrinadusir sa Bicol na ‘papapusugon’ nagpapahayag kan ideyang pagbugtak nin pundasyon, asin sa parati nanunungod iyan sa pagigin marigon kan mga gibo nin Diyos. (Talinhaga 3:19; Jeremias 10:12) Siguradong marigon na papapusugon ni Jehova an mga plano kan mga naggigibo nin tama sa paghiling niya, na tinatabangan sinda na magkaigwa nin mas tiwasay, may seguridad, saka maugmang buhay.—Salmo 20:4; Talinhaga 12:3.

Konteksto kan Talinhaga 16:3

Si Hading Solomon an nagsurat kan talinhagang ini saka kan dakul sa mga laog kan libro nin Mga Talinhaga. Nakagibo siya nin rinibong mga talinhaga huli sa kadunungan na itinao sa saiya nin Diyos.—1 Hadi 4:29, 32; 10:23, 24.

Pinunan ni Solomon an kapitulo 16 paagi sa pag-umaw niya sa kadunungan nin Diyos saka sa pagduon kun gurano ikinakaungis nin Diyos an mga mapalangkaw. (Talinhaga 16:1-5) Ipinapahiling kan kapitulong ini an sarong mahalagang mensahe na pauruutro tang mababasa sa libro nin Mga Talinhaga: Magigin madunong saka mapanggana sana an mga tawo kun mapakumbaba sinda, na tinutugutan an Diyos na giyahan an saindang mga lakad. (Talinhaga 16:3, 6-8, 18-23) An panginot na katotoohan na iyan mababasa man sa iba pang parte kan Bibliya.—Salmo 1:1-3; Isaias 26:3; Jeremias 17:7, 8; 1 Juan 3:22.

Hilingon an halipot na videong ini para mahiling an sumaryo kan libro nin Mga Talinhaga.