Pagdepensa sa Katalingkasan sa Relihiyon sa Katutubong mga Komunidad

Sa ginatos na milyon na tawong nakaistar sa Latin America, minilyon sainda an igwa nin sadiring katutubong lengguwahe asin mga kaugalian. Dakul sa mga katutubong ini mga tugang ta sa espirituwal, na pinapahalagahan an saindang minanang kultura. Para matabangan an mga tawo na manudan an katotoohan sa Bibliya, nagta-translate saka nagdidistribwir sinda nin mga publikasyon kan Mga Saksi ni Jehova sa labing 130 katutubong lengguwahe kan Latin America.a Dawa arog kaiyan, nagkapira sa sainda an napaatubang sa pagkontra dahil pinili nindang paglingkudan si Jehova asin nagsayuma sindang magpartisipar sa bakong basado sa Bibliya na mga kaugalian na komun sa komunidad ninda. Paano ginamit an saindong donasyon para tabangan sinda?

Tinabangan na Makapuli

Sa Mexico, an mga tugang ta sa sarong komunidad nin mga Huichol sa kabukidan nin Jalisco State magalang na nagsayumang magpartisipar sa mga kaugalian sa relihiyon na dai kaya kan saindang konsiyensiyang sinanay sa Bibliya.b Pero ikinaanggot ini kan nagkapirang tawo sa komunidad. Kan Disyembre 4, 2017, inatake nin sarong bayolenteng sururog an sarong grupo nin mga Saksi asin an nagkapirang iba pa na kairiba ninda. An sururog puwersahan sindang pinahali sa komunidad, rinaot an saindang mga pagsadiri, asin pinatakot na gagadanon an siisay man na magpurbar na pumuli.

Inasikaso kan mga Saksi sa karaning mga banwa an panginot na mga pangangaipo kan satong mga tugang. Pero ano an puwedeng gibuhon para makapuli sinda? “Mayo kaming igong kuwarta para kumua nin abogado,” an sabi kan brother na si Agustin, “saka dai mi aram kun sain kami mahagad nin tabang-legal.”

Dahil inaatake an katalingkasan sa pagsamba kan satong mga tugang, uminaksiyon tulos an sangang opisina sa Central America. Inot, hinagad ninda sa lokal na mga opisyal na imbestigaran an mga krimen na iyan. Sunod, inaprubaran sinda kan Coordinators’ Committee kan Namamahalang Grupo kan Mga Saksi ni Jehova na makipagtabangan sa Legal Department sa world headquarters asin na magsangat nin kaso para sa satong mga tugang na Huichol. Kan huri, nakaabot an kaso sa Supreme Court of Justice of the Nation—an pinakahalangkaw na korte sa Mexico.

Sarong internasyonal na team nin mga abogado an nagpreparar nin klarong argumento. Ipinaliwanag ninda na kun paanong dapat na igalang kan iba an kultura kan katutubong mga komunidad, dapat man na igalang asin protektaran kan mismong komunidad an mga katalingkasan kan gabos nindang miyembro. Mayong pinapalain an mga deretso nin tawo.

Kan Hulyo 8, 2020, sararong nagdesisyon an Supreme Court of Justice apabor sa mga Saksi ni Jehova. Ipinagbuot ninda na an gabos na pinahali dapat na tugutan na makapuli sa komunidad ninda. Si Agustin, na sinambit kasubago, ipinahayag an pasasalamat niya asin kan iba pa: “Nagpapasalamat kaming marhay saka maugma sa ginibo para samo kan mga tugang. Kun dai ninda kami tinabangan, mayo kaming magigibo na ano man.”

“Dakulaon Para sa Pipira Sana”

Kasabay kaiyan, an satong mga tugang sa San Juan de Ilumán, sarong baryo sa Ecuador kun sain nakaistar an dakul na katutubo kan Otavalo Valley, napaatubang man sa kaparehong pagkontra. Kan 2014, pagkatapos na makakua sinda kan gabos na kinakaipuhan na permit, nagpuon na sindang magtugdok nin Kingdom Hall. Pero, sarong padi an nanginot sa labing 100 katawong sururog asin puwersahan nindang pinapundo an pagtugdok. Dangan ipinagbuot kan komunidad sa mga Saksi ni Jehova na ipundo an mga pagtiripon ninda para sa pagsamba.

Nagtabangan an legal department sa sangang opisina sa Ecuador asin sa world headquarters para idepensa an kongregasyon sa bayolasyon na ini sa saindang katalingkasan sa pagsamba. An bagay na iyan dinara kan satong mga tugang sa korte. Nagin dahilan iyan na ipundo na kan komunidad an pagkontra asin na tugutan nang idagos kan kongregasyon an saindang mga pagtiripon saka tapuson an pagtugdok kan saindang Kingdom Hall. Pero, para maprotektaran an deretso kan satong mga tugang sa maabot na panahon, hinagad kan satong mga representante sa mas halangkaw na mga korte na desisyunan an sarong pundamental na isyu: Dapat daw na igalang kan mga komunidad kan mga katutubo an internasyonal na mga deretso nin tawo?

Kan Hulyo 16, 2020, an kaso dinangog kan Constitutional Court of Ecuador, an pinakahalangkaw na korte kan nasyon. An kongregasyon irinepresentar kan mga tugang na abogado sa Ecuador. Apuwera kaiyan, apat na tugang niyato na eksperyensiyadong international lawyer an nagpartisipar sa korte. Huli sa mga restriksiyon dahil sa COVID-19, nagtaram sinda hali sa manlain-lain na nasyon paagi sa videoconference. Ini an inot na pagkakataon na tinugutan nin sarong korte an sarong team nin mga abogado na nagrerepresentar sa mga Saksi ni Jehova sa bilog na kinaban na magpresentar nin mga argumento sa arog kaining paagi.c An team nagsambit nin internasyonal na mga legal authority para kumpirmaron na an sarong katutubo dai dapat mawaran kan saiyang mga deretso bilang tawo dahil sana ta parte siya nin sarong katutubong komunidad.

Hinahalat-halat na kan satong mga tugang sa Otavalo Valley an desisyon kan Constitutional Court. Mantang naghahalat sinda, nagpapasalamat nanggad sinda sa tabang na itinao sainda. Si Cesar, na sarong elder sa Ilumán Quichua Congregation, nagsabi: “Si Jehova sana, paagi sa saiyang organisasyon, an magibo nin dakulaon para sa pipira sana.”

An mga abogado na kalabot sa pagdepensa gabos Saksi ni Jehova, asin maugma sinda na ihiras nin mayong bayad an saindang kaaraman sa legal na mga bagay. Dawa arog kaiyan, an pagsangat kan mga kasong iyan, pagpreparar para diyan, saka an pagpresentar sa korte kan mga argumento manungod diyan nangangaipo nin panahon asin kuwarta. An satong mga abogado saka an iba pang tugang naggamit nin labing 380 oras sa pagpreparar nin mga argumento-legal saka 240 pang oras sa pag-translate nin mga dokumento para sa hudisyal na pagdangog sa Mexico. Haros 40 abogado hali sa manlain-lain na parte kan kinaban an nagtao nin ginatos na oras para sa kaso sa Ecuador. Paano ta nataparan an mga gastos na konektado sa pagdepensa sa satong mga tugang? Paagi iyan sa mga donasyon na itinao nindo gamit an manlain-lain na pamamaagi na ipinapaliwanag sa donate.jw.org. Salamat sa saindong pagigin bukas-palad.