Ezekiel
15 Nag-abot giraray sa sako an tataramon ni Jehova, na sinasabi: 2 “Aki nin tawo, ano an pagkakaiba kan kahoy kan puon nin ubas sa iba pang kahoy o sanga nin mga kahoy hali sa kakahuyan? 3 Puwede daw iyan gibuhon na ulayán* na magagamit sa pagtrabaho? O ginigibo daw iyan kan mga tawo na sabitan nin mga gamit? 4 Uya! Iinaapon iyan sa kalayo bilang panggatong, asin tinutumtom kan kalayo an mag-inibong na puro kaiyan asin nasusulo an tahaw na parte. Magagamit pa daw iyan ngunyan sa ano man na pagtrabaho? 5 Dawa kan bilog pa iyan, dai iyan magagamit sa ano man. Lalo na kan matumtom na iyan kan kalayo asin masulo na, dai na nanggad iyan nin pakinabang!”
6 “Kaya ini an sinabi kan Soberanong Kagurangnan na Jehova: ‘Arog kan kahoy kan puon nin ubas na nasa tahaw kan mga kahoy sa kakahuyan, na itinao ko bilang panggatong sa kalayo, arog man kaiyan an gigibuhon ko sa mga nakaistar sa Jerusalem.+ 7 Isinikwal ko sinda. Nakadulag sinda sa kalayo, pero tutumtumon sinda nin kalayo. Asin mamimidbid nanggad nindo na ako si Jehova pag isinikwal ko na sinda.’”+
8 “‘Asin gigibuhon kong tiwangwang an kadagaan+ dahil sa pagigi nindang bakong maimbod,’+ an sabi kan Soberanong Kagurangnan na Jehova.”