SA KADA asignasyon sa paadalan yaon an oportunidad na umoswag. Magmaigot kamo sa maatom na paagi, asin an saindong pag-oswag luway-luway na mahahayag sa saindo sagkod sa iba. (1 Tim. 4:15) Tatabangan kamo kan paadalan na mas lubos na mapatalubo an saindong mga abilidad.

Ninenerbios daw kamo sa pag-isip-isip na mataram kamo sa atubangan kan kongregasyon? Normal ini, dawa pa kamo haloy-haloy nang nagpalista sa paadalan. Minsan siring, may nagkapirang bagay na makatatabang na mainaan an saindong kahaditan. Sa harong, ugaleon na parateng magbasa nin makosog. Sa mga pagtiripon kan kongregasyon, parateng magkomento, asin kun kamo sarong parahayag, regular na magpartisipar sa paglilingkod sa langtad. Matao ini sa saindo nin eksperyensia sa pagtaram sa atubangan nin iba. Saro pa, andamon nin amay pang marhay an mga asignasyon nindo sa estudyante, asin praktison na ipahayag iyan nin makosog. Girumdoma na magtataram kamo sa atubangan nin maboot na mga magdadangog. Bago magpahayag, mamibi ki Jehova. Maogma siang nagtatao nin banal na espiritu sa mga lingkod nia na naghahagad sa saiya.—Luc. 11:13; Fil. 4:6, 7.

Magin rasonable sa saindong mga inaasahan. Nagkakaipo nin panahon an pagkaigwa nin eksperyensia bilang nagpapahayag asin an pagigin epektibong paratokdo. (Miq. 6:8) Kun bago pa sana kamong lumaog sa paadalan, dai asahan na makatao tolos nin polidong pag-atubang. Imbes, hingoahon na mapaoswag an saro-saro sanang puntong tatawan nin konseho sa pagtaram. Adalan an kabtang sa librong ini na nagtotokar kaiyan. Kun puede, gibohon an praktis na isinusuherir dian. Matao ini sa saindo nin eksperyensia mapadapit sa mga bagay na konektado sa puntong tatawan nin konseho bago nindo gibohon an saindong asignasyon sa kongregasyon. Maabot an pag-oswag.

Kun Paano Aandamon an Asignasyon sa Pagbasa

An kalabot sa pag-andam para sa pampublikong pagbasa bako sanang pakasabi kan mga termino sa asignadong materyales. Hingoahon nindong magkaigwa nin malinaw na pakasabot sa kahulogan kan materyales. Pagkaresibi tolos nindo kan saindong asignasyon, basahon iyan na nasa isip an obhetong iyan. Hingoahon na masabotan an punto kan kada sentence asin an ideyang ipinaliliwanag sa kada parapo tangani na ikapaabot nindo nin eksakto asin may tamang pagsaboot an mga ideya. Kun puede, helingon an diksionaryo para sa tamang pronunsiasyon nin mga terminong bakong pamilyar. Aramon na marhay an materyales. Tibaad kaipuhan na tabangan nin mga magurang an saindang mga aki na magibo ini.

Naasignaran na daw kamong basahon an sarong kabtang kan Biblia o tibaad an mga parapo kan sarong artikulo sa An Torrengbantayan? Kun may mga audiocassette kaiyan sa saindong lenguahe, puedeng makatabang na marhay na maghinanyog sa pagbasa asin obserbaran an mga bagay na arog kan pronunsiasyon, estilo nin pagtaram, pagdodoon, asin modulasyon. Dangan hingoahon na iiba an mga kualidad na ini sa saindo mismong pagbasa.

Pagpoon nindong gibohon an saindong asignasyon, seguradohon na maingat na adalan an leksion na nagtotokar kan kualidad sa pagtaram na iinasignar sa saindo. Kun puede, repasohon iyan pakapagpraktis nindong basahon nin makosog an iinasignar na materyales nin nagkapirang beses. Hingoahon na iaplikar sa pinakalubos na mapupuede an nasusurat na hatol na iyan.

An pagpatood na ini makatatabang na marhay sa saindo sa saindong ministeryo. Mantang kamo nasa paglilingkod sa langtad, kadakol kan oportunidad nindo na basahan an iba. Mantang an Tataramon nin Dios may puersang bagohon an buhay nin mga tawo, importante na basahon nindo iyan nin toltol. (Heb. 4:12) Dai asahan na magin eksperto sa gabos na aspekto nin epektibong pagbasa sa saro o duwang asignasyon. Sa sarong Kristianong magurang sa kongregasyon na dakol nang taon an eksperyensia, nagsurat si apostol Pablo: “Padagos kang magmaigot sa pampublikong pagbasa.”—1 Tim. 4:13.

Kun May Tema Asin Eksena

Kun makaako kamo nin asignasyon sa paadalan na may kalabot na eksena, ano an maninigo nindong gibohon?

Tolong prinsipal na bagay an kaipuhan na konsideraron: (1) an temang iinasignar sa saindo, (2) an saindong eksena asin an kakaolayon nindo, asin (3) an puntong tatawan nin konseho na iinasignar na paoswagon nindo.

Kaipuhan na kumua kamo nin materyales sa temang iinasignar sa saindo. Alagad bago kamo maparayo dian, seryosong isip-isipon an saindong eksena saka an kakaolayon nindo, ta an mga bagay na ini magkakaigwa nin labot sa klase nin materyales na tatrataron nindo asin sa paagi nin pag-atubang nindo kaiyan. Anong eksena an gagamiton nindo? Ano idedemonstrar nindo kun paano iaatubang an maogmang bareta sa saro na kamidbid nindo? O ipaheheling daw nindo kun ano an posibleng mangyari kun nakakaolay an saro sa kaenot-enote? Mas matua daw sa saindo an tawo o mas hoben? Ano daw an aktitud nia mapadapit sa tema na plano nindong ipakipag-olay? Gurano an tibaad dati na niang aram manongod dian? Anong obheto an linalaoman nindong magibo bilang resulta kan saindong pag-oolay? An simbag sa mga hapot na iyan matao nin importanteng mga giya na magagamit.

Saen kamo makakakua nin materyales sa temang iinasignar? Sa pahina 33 sagkod 38 kan librong ini, tinotokar an “Kun Paano an Pagsiyasat.” Basahon iyan, dangan gamiton an mga kasangkapan sa pagsiyasat na nasa saindo. Sa kadaklan madali kamong makakakua nin materyales na sobra sa magagamit nindo. Basahon an igo tanganing maaraman kun ano an potensial na yaon. Minsan siring, mantang ginigibo nindo iyan isaisip an eksenang gagamiton nindo para sa saindong pag-atubang saka an kakaolayon nindo. Markahan an mga punto na angay na gamiton.

Bago nindo organisaron an saindong pag-atubang asin pilion na nin pangultimo an mga detalye, tawan nin panahon an pagbasa kan pagtokar sa puntong tatawan nin konseho na iinasignar sa saindo. An pag-aplikar kan konsehong iyan saro sa prinsipal na mga dahelan kan saindong asignasyon.

Paagi sa pagtratar kan saindong materyales sa oras na itinao, magkakaigwa kamo kan satispaksion na itao an saindong konklusyon, ta may itataong senyal kun tapos na an itinaong oras. Minsan siring, sa satong ministeryo sa langtad dai pirmeng kinokonsiderar an oras. Kaya sa saindong pag-andam, konsideraron kun guranong panahon an yaon, alagad papagdanayon na mahalaga an epektibong pagtotokdo.

Komento Manongod sa mga Eksena. Eksaminon an mga suhestion sa pahina 82, asin pumili nin saro na magigin praktikal sa saindong ministeryo asin matogot sa saindo na magamit sa realistikong paagi an iinasignar na materyales. Kun nahaloyhaloy na kamo sa paadalan, ibilang ini na sarong oportunidad na maghingoa asin pataluboon an dagdag na mga abilidad para sa saindong ministeryo.

Kun iasignar kan paraataman sa Teokratikong Paadalan sa Pagmiministro an eksena, akoon an angat na iyan. An kadaklan na eksena pagpatotoo. Kun dai pa kamo noarin man nakapagpatotoo sa mga kamugtakan na sinabi, kumua nin mga ideya paagi sa pakikipag-olay sa mga parahayag na nakagibo na kaiyan. Kun posible, pagmaigotan na ipakipag-olay an iinasignar na tema sa saindo sa eksenang kaagid kan gagamiton nindo sa paadalan. Matabang ini sa saindo na magibo an sarong importanteng obheto kan pagpatood sa saindo.

Kun Iyan Itatao sa Pormang Pahayag

Kun kamo lalaki, tibaad iasignar kamong tumao nin halipot na pahayag sa kongregasyon. Sa pag-andam kan mga pahayag na ini, an pundamental na mga punto na kaipuhan na konsideraron kaagid kan nalilista na para sa mga asignasyon sa estudyante sa pormang demonstrasyon. An prinsipal na kalaenan iyo an mga magdadangog asin an paagi nin pag-atubang.

Sa pankagabsan marahay na andamon an saindong materyales tangani na makinabang dian an gabos na nagdadangog. An kadaklan na presente dati nang aram an pundamental na mga katotoohan sa Biblia. Tibaad aram na nindang marhay an tema na ikinaasignar na ipahayag nindo. Konsideraron an dati na nindang aram manongod sa tema nindo. Hingoahon na may mapakinabangan sinda sa saindong pag-atubang. Ihapot sa sadiri: ‘Paano ko magagamit an sakong tema na mapararom an apresasyon ko asin kan mga nagdadangog sa sako ki Jehova bilang persona? Ano an yaon sa materyales na matabang sa samo na mamansayan an kabotan nin Dios? Paano makatatabang sa samo an materyales na ini na makagibo nin tamang mga desisyon sa tahaw nin kinaban na dominado nin mga kamawotan sa laman?’ (Efe. 2:3) An nakakokontentong simbag sa mga hapot na iyan nagkakaipo nin pagsiyasat. Kun ginagamit an Biblia, hingoahon na dai sana magbasa nin mga teksto. Mangatanosan sa mga tekstong ginagamit nindo, asin ipaheling kun paano an mga ini nagtatao nin basehan sa pagkonklusyon. (Gibo 17:2, 3) Dai pakadakolon an materyales na tatrataron. Iatubang an saindong materyales sa paagi na iyan pasil na girumdomon.

Maninigo na kaiba man sa pag-andam an pagtao nin atension sa saindong pagpahayag. Dai nindo pagbawasan an halaga kaini. Praktison na itao nin makosog an saindong pahayag. An paghihingoa nindo sa pag-adal asin pag-aplikar kan konseho sa manlaenlaen na kualidad sa pagtaram dakula an ikakokontribwir sa saindong pag-oswag. Baga man kamo bago pa sanang nagpapahayag o eksperyensiado na, mag-andam na marhay tangani na kamo makapagpahayag na may kombiksion asin pagsaboot na angay sa saindong materyales. Mantang inootob nindo an kada asignasyon sa paadalan, isaisip an obheto na gamiton an tao nin Dios na talento nindo sa pagtaram sa pagtaong onra ki Jehova.—Sal. 150:6.

AN PROGRAMA kan Teokratikong Paadalan sa Pagmiministro ginibo tanganing makinabang an bilog na kongregasyon. May iinaatubang man na mahalagang impormasyon sa ibang pagtiripon kan kongregasyon saka sa mga asamblea asin kombension. Kun naasignaran kamo nin kabtang sa saro kan mga programang ini, tinawan kamo nin magabat na paninimbagan. Sinadol ni apostol Pablo an Kristianong paraataman na si Timoteo na pirmeng atenderan an saiyang pagtotokdo. (1 Tim. 4:16) An mga yaon sa Kristianong pagtiripon nagtagama nin mahalagang oras—asin an nagkapira naggibo nin dakulang paghihingoa—tanganing makaatender asin matokdoan sa mga bagay na manongod sa saindang relasyon sa Dios. An siring na pagtotokdo dakulaon nanggad na pribilehio! Paano daw nindo iyan magigibo nin toltol?

Tampok na mga Kabtang kan Binasa sa Biblia

An kabtang na ini kan paadalan basado sa babasahon sa Biblia na asignado sa semanang iyan. An pagdodoon maninigo na sa kun paano kita apektado ngonyan kan materyales. Arog kan sinasabi sa Nehemias 8:8, binasa ni Esdras asin kan kairiba nia sa publiko an Tataramon nin Dios, na ipinaliliwanag iyan, ‘tinatawan iyan nin kahulogan,’ asin ipinasasabot iyan. An pagtao nindo kan tampok na mga kabtang kan Biblia nagtatao sa saindo kan oportunidad na gibohon man iyan.

Paano nindo aandamon an siring na asignasyon? Kun puede, mga saro o labi pang semana basahon na an asignadong kabtang kan Biblia. Dangan isip-isipon an saindong kongregasyon asin an mga pangangaipo kaiyan. Ipamibi iyan. Ano daw na hatol, anong mga halimbawa, anong mga prinsipyo sa kabtang na ini kan Tataramon nin Dios an nakapagpapanigo sa mga pangangaipong iyan?

Kaipuhan an pagsiyasat. Igwa daw kamo kan indise sa An Torrengbantayan kada katapusan kan taon? Kun igwa, gamiton iyan na marhay. Paagi sa pagsiyasat sa napublikar manongod sa mga bersikulong napili nindo na idoon, puede kamong makakua nin nakapagpapaliwanag na materyales sa likod, eksplikasyon kan kaotoban nin mga hula, pag-analisar sa ihinahayag nin nagkapirang teksto manongod ki Jehova, o pagtokar sa mga prinsipyo. Dai pakadakolon an punto. Magkonsentrar sa pira sanang piling bersikulo. Mas marahay na pira sanang bersikulo an trataron asin gibohon iyan nin toltol.

An asignasyon sa saindo tibaad maghagad man na imbitaran an mga nagdadangog na magkomento sa kun paano sinda nakinabang sa binasa sa Biblia kan semanang iyan. Ano an nanompongan ninda na pakikinabangan ninda sa saindang personal asin pampamilyang pag-adal o sa saindang ministeryo o pamumuhay? Anong mga kualidad ni Jehova an nahayag sa saiyang pagtratar sa mga tawo asin nasyon? Ano an nanodan kan mga nagdadangog na nakapakosog sa saindang pagtubod asin nakapatalubo sa apresasyon ki Jehova? Dai maghaloy sa mga detalye. Idoon an kahulogan asin praktikal na halaga nin piniling mga punto.

Pahayag na Nagtotokdo

Ini basado sa napublikar na materyales, arog baga nin sarong artikulo sa An Torrengbantayan o Awake! o tibaad sarong kabtang nin libro. Sa kadaklan sobra an materyales para sa itinaong oras. Paano nindo gigibohon an asignasyon? Bilang sarong paratokdo, bako sanang bilang saro na nagtatratar nin materyales. An paraataman dapat na “kualipikadong magtokdo.”—1 Tim. 3:2.

Ponan an saindong pag-andam paagi sa pag-adal sa asignadong materyales. Basahon an mga teksto. Maghorophorop. Hingoahon na gibohon iyan haloy pa bago an petsa kan saindong pahayag. Girumdomon na an mga tugang ineenkaminar na basahon antes pa an napublikar na materyales na pagbabasaran kan pahayag. An asignasyon nindo bako sanang repasohon iyan o kondensaron iyan kundi itokdo kun paano iyan iaaplikar. Gumamit nin angay na mga kabtang kan materyales sa paagi na talagang pakikinabangan kan kongregasyon.

Kun paanong an kada aki may sadiring personalidad, an kada kongregasyon igwa man nin napapalaen na mga ugale. An magurang na epektibo an pagtotokdo dai sana sinasarosaro sa aki nia an moral na mga presepto. Nakikipangatanosan sia sa aki. Kinokonsiderar nia an personalidad kan aki asin an mga problemang inaatubang kan aki. Sa kaagid na paagi, an mga paratokdo sa kongregasyon naghihingoa na tawan nin atension an mga pangangaipo kan grupo na kaolay ninda. Minsan siring, lilikayan nin sarong may pagmansay na paratokdo an paggamit nin mga halimbawa na puedeng ikapasupog nin saro sa mga nagdadangog. Saiyang sasabihon an mga pakinabang na nakakamtan na bilang resulta kan paglakaw sa dalan ni Jehova asin tatawan nin pagdodoon an hatol hale sa Kasuratan na matabang sa kongregasyon na maresolberan an mga problemang inaatubang ninda.

An marahay na pagtotokdo nakapahihiro sa puso kan mga nagdadangog. An kaipuhan digdi bako sanang pagtaram nin mga detalye kundi pagpatalubo man nin apresasyon sa irinerepresentar kan mga ini. Kaipuhan kaiyan an tunay na pagmakolog sa mga tinotokdoan. Maninigo na midbid nin espirituwal na mga pastor an aripompon. Kun isasaisip ninda sa mamomoton na paagi an mga problemang inaatubang nin manlaenlaen na indibiduwal, sinda makapagpapahayag nin nakaparirigon sa boot, na nagpapaheling nin pakasabot, pakikidamay, asin empatiya.

Arog kan aram nin epektibong mga paratokdo, an pahayag dapat na may malinaw na obheto. Maninigong iatubang an materyales sa paagi na an mayor na mga punto malataw asin magigirumdoman. Maninigo na an mga nagdadangog may ikapuling praktikal na mga punto na makaaapektar sa saindang buhay.

Pagtiripon sa Paglilingkod

Kun kamo nagpapahayag basado sa sarong artikulo sa An Satong Ministeryo sa Kahadean, tibaad medyo laen man an angat. Maheheling nindo digdi na sa parate hinahagad sa saindo na lubos na ipaabot sa mga nagdadangog an yaon dian, bakong pumili kan pinakaangay. Tabangan an mga nagdadangog na mangatanosan sa mga teksto na iyong pinakabasehan kan ano man na hatol na itinao. (Tito 1:9) Limitado an oras, na sa kadaklan dai nagtotogot sa dugang pang materyales.

Sa ibong na lado, tibaad ipaatubang sa saindo an materyales na mayo nin artikulo sa An Satong Ministeryo sa Kahadean. Tibaad nasambitan an sarong artikulo sa An Torrengbantayan, o tibaad pira sanang halipot na pasabot an asignasyon. Nasa saindo na bilang paratokdo an pagkonsiderar sa mga pangangaipo kan kongregasyon may koneksion sa asignadong materyales. Tibaad kaipuhan kamong gumamit nin halipot, deretso sa puntong ilustrasyon o magsaysay nin angay na eksperyensia. Girumdoma na an asignasyon nindo bako sanang magpahayag sa tema kundi ipahayag iyan sa paagi na matabangan an kongregasyon na mahaman an gibohon na itinatao kan Tataramon nin Dios asin magin magayagaya sa paggibo kaiyan.—Gibo 20:20, 21.

Mantang inaandam nindo an saindong asignasyon, isip-isipon an kamugtakan kan mga miembro kan kongregasyon. Omawon sinda sa dati na nindang ginigibo. Paano daw madudugangan an pagkaepektibo ninda asin an kagayagayahan ninda sa ministeryo kan saindang pag-aplikar kan mga suhestion na itinao sa asignadong materyales?

Naghahagad daw nin demonstrasyon o interbio an asignasyon nindo? Kun iyo, iyan maninigong planohon haloy pang marhay. Tibaad nakatetentar na hagadon na sana sa iba na iyong mag-areglo kaiyan, alagad iyan dai pirmeng nagkakaigwa kan pinakamarahay na resulta. Sagkod sa mapupuede, ensayohon an demonstrasyon o interbio bago an aldaw kan pagtiripon. Seguradohon na an parteng ini kan saindong kabtang magibo sa paagi na talagang nakadadagdag sa itinataong pagtotokdo.