Ginamit Daw nin Diyos an Ebolusyon Para Magkaigwa nin Manlain-lain na Klase nin Buhay?

An simbag kan Bibliya

Dai. Malinaw na sinasabi kan Bibliya na linalang nin Diyos an mga tawo saka an ‘manlain-lain na klase‘ nin mga hayop asin mga tinanom.a (Genesis 1:12, 21, 25, 27, An Banal na Biblia (Paulines); Kapahayagan 4:11) Sinasabi kaiyan na an mga tawo hali ki Adan saka ki Eva, an satong inot na mga magurang. (Genesis 3:20; 4:1) Dai sinusuportaran kan Bibliya an teoriya na ginamit nin Diyos an ebolusyon para magkaigwa nin manlain-lain na klase nin buhay, na inaapod man na theistic evolution. Pero dai kontra an Bibliya sa sinasabi kan siyensiya na may mga pagkakaiba-iba o variation sa sarong klase nin buhay.b

• Ginamit daw nin Diyos an ebolusyon?

• Kauyon daw kan Bibliya an ebolusyon?

• Masasabi daw na ebolusyon an kakayahan kan mga tinanom saka mga hayop na mag-adapt sa palibot para mabuhay?

Ginamit daw nin Diyos an ebolusyon?

Mahiwas an kahulugan kan terminong theistic evolution. Uyon sa Encyclopædia Britannica, an terminong iyan nagsusuportar sa ideya na “natural selection an saro sa ginamit nin Diyos para magkaigwa nin manlain-lain na buhay.”

Kaiba man sa ideya kan theistic evolution an minasunod:

• An gabos na buhay na organismo, hali sa saro sanang organismo, na nabuhay kaidtong haluyon nang panahon.

• An sarong klase nin buhay puwedeng mag-evolve asin magin sarong panibagong klase nin buhay. An ideyang iyan inaapod kun minsan na macroevolution.

• Ano man an nangyari, siguradong an Diyos an responsable sa mga prosesong ini.

Kauyon daw kan Bibliya an ebolusyon?

Pinapaluwas kan theistic evolution na bakong siyento porsiyentong tama an pagkasaysay kan Bibliya sa Genesis manungod sa paglalang. Pero, an pagsambit ni Jesus sa pagkasaysay kan Genesis nagpapahiling na totoo an pagkasaysay na iyan. (Genesis 1:26, 27; 2:18-24; Mateo 19:4-6) Sinasabi kan Bibliya na bago si Jesus magdigdi sa daga, yaon siya sa langit kaiba nin Diyos, asin na nagtabang siya sa paglalang kan “gabos na bagay.” (Juan 1:3) Kaya an ideya na ginamit nin Diyos an ebolusyon para magkaigwa nin manlain-lain na klase nin buhay bakong kauyon kan katukduan kan Bibliya.

Masasabi daw na ebolusyon an kakayahan kan mga tinanom saka mga hayop na mag-adapt sa palibot para mabuhay?

Dai espesipikong sinabi kan Bibliya kun gurano kadakul na variation an puwedeng magluwas sa sarong klase nin buhay. Dai man kaiyan kinokontra an katunayan na an manlain-lain na klase nin hayop asin tinanom na linalang nin Diyos puwedeng magkaigwa nin mga pagbabago huli sa pagpapalahi o pag-adapt sa kapalibutan. Maski ngani iniisip kan iba na ebolusyon an arog kaiyan na pagbabago, an totoo, dai man talaga nagkaigwa nin panibagong klase nin buhay.