Nadidipisilan an iba na kamutan an Diyos. Sa sainda, an Diyos garo baga sarong misteryo, harayo, o daing hirak pa ngani. Ini an sinabi kan iba:

• “Namimibi ako sa Diyos na tabangan ako, pero pagmati ko harayuon man giraray siya, garo dai kayang abuton. Dai ko maimahinar na an Diyos sarong persona na may pagmati.”—Marco, Italia.

• “Gusto ko talagang maglingkod sa Diyos, pero garo harayuon siya. An hiling ko saiya maisog na Diyos, na mayong ibang ginibo kundi mangastigo. Dai ako nagtutubod na padangat niya kita.”—Rosa, Guatemala.

• “Kan aki pa ako, nagtutubod ako na pigbabantayan kan Diyos an sala ta, tapos nangangastigo tulos pag nasala kita. Paghaloy-haloy, an hiling ko saiya mayo siyang pakilabot. Garo siya prime minister na namamahala sa mga nasasakupan niya—pero dai man talaga interesado sainda.”—Raymonde, Canada.

Para saimo, dipisil daw mamutan an Diyos? Haloy nang hapot iyan kan dakul na Kristiyano. Sa katunayan, kan Edad Medya (500-1500 C.E.), an kadaklan sa mga miyembro kan Kakristiyanuhan dai ngani namimibi sa Diyos na Makakamhan sa Gabos. Taano? Takuton sa saiya an mga tawo. Ini an sinabi kan historyador na si Will Durant: “Siisay na makasalan an mapurbar na mangadyi sa saro na makatakuton saka harayuon?”

Taano ta nasabi kan iba na “makatakuton saka harayuon” an Diyos? Ano talaga an itinutukdo kan Bibliya manungod sa saiya? Pag naaraman mo an katotoohan dapit sa Diyos, makakatabang daw iyan na mamutan mo siya?

AN PAGTUBOD KAN DAKUL

“Baranga pa kami kun baga puwede mi talagang sabihon na ‘may’ pangaran an Diyos, asin kun igwang pangaran, ano iyan.”—Propesor David Cunningham, Theological Studies.

AN KATOTOOHAN SA BIBLIYA

Sinabi nin Diyos: ‘Ako si Jehova. Iyo ini an sakuyang ngaran.’ (Isaias 42:8) Sa Hebreo, an Jehova sarong pangaran na nangangahulugan na “Pinangyayari Niyang Magin.”

Gusto ni Jehova na gamiton ta an pangaran niya. “Mag-apod kamo sa saiyang ngaran; ibalangibog nindo sa mga nasyon an saiyang mga gibo,” an sabi kan Bibliya. (BPV)a ‘Girumduma nindo na an saiyang ngaran dakulaon.’—Isaias 12:4.

Ginamit ni Jesus an pangaran nin Diyos. Sa pamibi, sinabi ni Jesus ki Jehova: ‘Ipinamidbid ko sainda [sa mga disipulo ni Jesus] an saimong ngaran, asin ipapamidbid ko iyan.’ Taano ta ipinamidbid ni Jesus sa saiyang mga disipulo an pangaran nin Diyos? Sinabi pa niya: ‘Tanganing an pagkamuot na iminuot mo [nin Diyos] sako mapasainda, asin ako sa sainda.’—Juan 17:26.

KUN TAANO TA MAHALAGA IYAN

“An tawong dai aram an pangaran kan Diyos dai talaga bistado an Diyos,” an isinurat kan teologong si Walter Lowrie, “saka dai niya mamumutan an Diyos kun an aram niya saro sana ining puwersa.”

Nagsisimba surusemana an sarong lalaki na an pangaran Victor, pero pagmati niya dai niya talaga midbid an Diyos. “Pagkatapos naaraman ko na Jehova an pangaran nin Diyos, asin garo baga pormal siyang ipinabisto sako kaidto,” an sabi niya. “Pagmati ko nabisto ko man giraray an Saro na kaidto ko pa nadadangog. Nagin siyang tunay na Persona sako saka naparani ako saiya.”

Si Jehova man nagigin harani sa mga tawong naggagamit kan pangaran niya. Para sa ‘mga naghuhurop-hurop kan saiyang ngaran,’ an Diyos nanunuga: ‘Papatawadon ko sinda siring kan tawo na nagpapatawad sa saiyang aki na naglilingkod sa saiya.’ (Malaquias 3:16, 17) Binebendisyunan man nin Diyos an mga nag-aapod sa pangaran niya. An Bibliya nagsasabi: ‘An siisay man na mag-apod sa ngaran ni Jehova makakaligtas.’—Joel 2:32.

AN PAGTUBOD KAN DAKUL

An Kristiyanong relihiyon “sa tulong mayor na grupo kaiyan na Romano Katoliko, Eastern Orthodox, saka Protestante nagtutubod sa sarong Diyos na may tulong Persona: Diyos Ama, Diyos Aki, asin Diyos Espiritu Santo. Base sa Kristiyanong teolohiya, dai man buot sabihon kaini na tulo an diyos kundi an tulong personang ini saro sana talaga.”—The New Encyclopædia Britannica.

AN KATOTOOHAN SA BIBLIYA

An Aki nin Diyos na si Jesus dai nuarin man nagsabi na kapantay niya an saiyang Ama o na siya iyo man an Ama. Imbes, sinabi niya: ‘Ako maduman sa Ama, huli ta an Ama urog sa sako.’ (Juan 14:28) Sinabi niya man sa saro sa mga parasunod niya: ‘Masakat ako sa sakong Ama asin saindong Ama, asin sakong Diyos asin saindong Diyos.’—Juan 20:17.

An espiritu santo, o banal na espiritu, bakong persona. An inot na mga Kristiyano ‘nagkaparano kan espiritu santo,’ asin sinabi ni Jehova: ‘Ibububo ko an sakong espiritu sa gabos na laman.’ (Guibo 2:1-4, 17) An banal na espiritu bakong parte nin sarong Trinidad. Iyan an aktibong puwersa nin Diyos.—Genesis 1:2, hilingon an nota sa ibaba kan An Marahay na Bareta Biblia.

KUN TAANO TA MAHALAGA IYAN

Ipinaliwanag kan Katolikong iskolar na si Karl Rahner asin Herbert Vorgrimler na an Trinidad “dai maaaraman kun mayo nin maghayag, saka maski may maghayag dai talaga maiintindihan nin biyo.” Mamumutan mo daw talaga an saro na imposibleng mabisto o maintindihan? Maliwanag na an doktrina nin Trinidad sarong ulang para mabisto saka mamutan an Diyos.

Iyan man an paghiling ni Marco, na nasambit sa nainot na artikulo. Sinabi niya: “Pagmati ko itinatago sako nin Diyos kun siisay talaga siya, kaya urog pa siyang nagin harayo, misteryoso, saka dipisil ranihan.” Pero, ‘an Diyos bakong Diyos nin karibarawan.’ (1 Corinto 14:33, NW) Dai niya itinatago sa sato kun siisay siya. Gusto niya na mabisto ta siya. Sinabi ni Jesus: “Kami nagsasaramba kaidtong naaaraman mi.”—Juan 4:22.

“Kan maaraman ko na an Diyos bakong parte nin sarong Trinidad,” an sabi ni Marco, “naparani na ako saiya.” Kun iisipon ta na si Jehova saro talagang Persona imbes na sarong misteryosong estranghero, mas madali ta siyang mamumutan. ‘An dai namumuot dai nakakamidbid sa Diyos,’ an sabi kan Bibliya, ‘huli ta an Diyos pagkamuot.’—1 Juan 4:8.

AN PAGTUBOD KAN DAKUL

“Pagkagadan, an kalag kan mga may mortal na kasalan nagbababa tulos sa impiyerno, kun sain sinasapo ninda an mga pasakit nin impiyerno, an ‘daing katapusan na kalayo.’” (Catechism of the Catholic Church) Sinasabi kan ibang lider nin relihiyon na an mga nasa impiyerno biyong suway sa Diyos.

AN KATOTOOHAN SA BIBLIYA

“An kalag na magkasala, iyan magagadan.” (Ezequiel 18:4) An gadan ‘mayo nin ano man na nanunudan’ o pakaaram. (Parahulit 9:5) Kun an kalag nagagadan saka mayo na nin aram, paano iyan maagi nin sakit sa “daing katapusan na kalayo” o sa daing katapusan na pagigin suway sa Diyos?

Sa Bibliya, an tataramon sa Hebreo saka sa Griego na sa parati tinatradusir na “impiyerno” nanunungod talaga sa pangkagabsan na lulubngan nin katawuhan. Halimbawa, kan mamatian ni Job an grabeng kulog huli sa hilang, siya namibi: ‘Marahay pang taguon mo ako sa lulubngan [“impiyerno,” Douay-Rheims Version].’ (Job 14:13) Gusto na ni Job na magpahingalo, bakong sa lugar nin pagpasakit o pagigin suway sa Diyos, kundi sa lulubngan.

KUN TAANO TA MAHALAGA IYAN

Kun an Diyos daing hirak, madidipisilan kitang mamutan siya o maparani saiya. “Akion pa ako, itinukdo na sako an doktrina nin nagkakalayong impiyerno,” an sabi ni Rocío, na nakaistar sa Mejico. “Takuton ako kaya dai ko maisip na may magayon na ugali an Diyos. An iniisip ko anggot siya saka mayong konsiderasyon.”

Huli sa malinaw na mga sinasabi kan Bibliya manungod sa mga paghukom nin Diyos asin sa kamugtakan kan mga gadan, nagbago an pananaw ni Rocío sa Diyos. “Magianon sa pagmati—garo nahali sako an sarong magabat na pasan,” an sabi niya. “Ngunyan, nagtutubod na ako na gusto nin Diyos an pinakamarahay sato, na namumutan niya kita, saka puwede ko siyang mamutan. Garo siya ama na nakakapot sa kamot kan saiyang mga aki na an gusto iyo an pinakamarahay para sainda.”—Isaias 41:13.

Dakul an naghihinguwa na magin relihiyoso huli sa takot sa nagkakalayong impiyerno, pero habo nin Diyos na paglingkudan mo siya ta natatakot ka sa saiya. Imbes, sinabi ni Jesus: ‘Kamutan mo an Kagurangnan mong Diyos.’ (Marcos 12:29, 30) Saro pa, pag aram ta na an Diyos dai minahiro nin bakong makatanusan ngunyan, makakapagtiwala kita sa mga gigibuhon niyang paghukom sa maabot. Arog kan amigo ni Job na si Elihu, makakapagsabi man kita: “Harayong mangyari na an tunay na Diyos humirong may karatan, asin na an Makakamhan sa Gabos humiro na bakong makatanusan.”—Job 34:10, NW.

Sarong aldaw kaidto sa Jerusalem, nagtukdo si Jesus manungod sa saiyang Ama na si Jehova saka ibinuyagyag niya an palsong mga lider nin relihiyon kan panahon niya. (Juan 8:12-30) Manunudan ta diyan kun paano niyato maaaraman kun baga tama an mga tinutubod ngunyan kan dakul na tawo manungod sa Diyos. Sinabi ni Jesus: ‘Kun magdanay kamo sa sakong mga tataramon, kamo mga tunay kong disipulo, asin maaaraman nindo an katotoohan, asin bubutasan kamo kan katotoohan.’—Juan 8:31, 32.

‘Magdanay kamo sa sakong mga tataramon.’ Itinatao digdi ni Jesus an pamantayan tanganing maaraman kun baga an mga katukduan nin relihiyon iyo “an katotoohan.” Pag may nadangog ka manungod sa Diyos, haputon an sadiri, ‘Kauyon daw ini kan sinabi ni Jesus saka kan iba pang parte kan Banal na Kasuratan?’ Arugon mo idtong mga nagdangog sa mga sinabi ni Pablo asin ‘nagsiyasat aroaldaw kan Kasuratan kun baga an mga bagay na ini [an mga nanunudan ninda] iyo man nanggad.’—Guibo 17:11.

Maingat na siniyasat ni Marco, Rosa, asin Raymonde, na nasambit sa inot na artikulo, an mga paniniwala ninda paagi sa pag-adal kan Bibliya sa tabang kan mga Saksi ni Jehova. Ano an nanudan ninda?

Marco: “Ginagamit kan nag-Bible study samo an Bibliya para simbagon an gabos na hapot mi kan sakong agom. Mas namutan mi si Jehova, saka nagin mas magayon an pag-ibanan ming mag-agom!”

Rosa: “Kan inot, huna ko an Bibliya saro sanang libro nin pilosopiya nin tawo na nagpupurbar na ipaliwanag an manungod sa Diyos. Pero, padiit-diit kong nakua an simbag kan Bibliya sa mga hapot ko. Ngunyan, totoo na sako si Jehova. Siya Saro na mapagkakatiwalaan ko.”

Raymonde: “Namibi ako sa Diyos na tabangan ako na mabisto siya. Dai nahaloy, nag-Bible study na kaming mag-agom. Nanudan mi man giraray an katotoohan manungod ki Jehova! Ugmahon kami ta naaraman mi kun anong klase siyang Diyos.”

Dai sana ibinubuyagyag kan Bibliya an salang mga katukduan manungod sa Diyos; ihinahayag man kaiyan an katotoohan manungod sa magagayon niyang karakteristiko. Iyan an ipinasabong na Tataramon niya, asin tinatabangan kita kaiyan na ‘maaraman an mga bagay na daing bayad na itinao sa sato nin Diyos.’ (1 Corinto 2:12) Taano ta dai mo mismo aramon an simbag kan Bibliya sa pamilyar pero importanteng mga hapot manungod sa Diyos, sa katuyuhan niya, asin sa satong puturo? Basahon an simbag sa pira sa mga hapot na ini sa “Bible Teachings > Bible Questions Answered” sa www.pr2711.com. Puwede ka man mag-request nin pag-adal sa Bibliya paagi sa Web site na iyan o sa sarong Saksi ni Jehova. Sigurado kami na kun gigibuhon mo iyan, maaaraman mo na bako palan talagang masakit kamutan an Diyos.