An Punto-de-Vista kan Biblia

Ano an Orihinal na Kasalan?

ANO an orihinal na kasalan? “Sekso,” an isisimbag nin dakol. Sinda naniniwala na an ipinangangalad na bunga sa tatamnan nin Eden simbolo nin seksuwal na relasyon asin na si Adan asin Eva nagkasala paagi sa pagdodorog.

An ideyang iyan bakong bago. Sono sa historyador na si Elaine Pagels, “an paghihingako na an kasalan ni Adan asin Eva iyo an pagdodorog” “uso sa Kristianong mga paratokdo [kan ikaduwang siglo] na arog ni Tatian na taga-Siria, na nagtokdo na an bunga kan kahoy nin pakamidbid nagtatao nin karnal na pakamidbid.” Siring man, para sa Ama kan Iglesya nin Kakristianohan na si Agustin kan ikalimang siglo C.E., an kasalan nagpoon sa seksuwal na horot ni Adan. An totoo, an Psychology Today nagsabi na “an kasalan ni Adan karnal na pakamidbid.”

An iba naninindogan na an kahoy nin pakamidbid kan marahay asin maraot nagrepresentar mismo sa kaaraman. An Encyclopædia Britannica nagsasabi na an “pakamidbid sa marahay asin maraot” “sarong tipikong kapahayagan nin gabos na kaaraman.” Iyan mangangahulogan na boot nin Dios na si Adan asin Eva magin ignorante asin na sinda nagrebelde tumang sa saiya paagi sa paghihingoang dugangan an saindang kaaraman.

An duwang interpretasyon na ini tunay na naglaladawan nin sarong daing katanosan asin kapritsosong Kaglalang. Taano ta lalalangon nia an tawo na may seksuwal asin intelektuwal na mga pangangaipo dangan dai sia tawan nin paagi na mapanigoan an mga kamawotan na iyan na dai napapadusahan nin kagadanan? Siisay an madadagkang mamoot asin maglingkod sa siring na Dios?

Sekso daw an Orihinal na Kasalan?

An dakol dai nakaaaram na an mga interpretasyon na ini pareho biyong kinokontra an konteksto kan tala sa Genesis. Pag-olayan nguna niato an ideya na an pangangalad nin Dios sa Eden sa katotoohan tumang sa seksuwal na relasyon. An pagboot na pinag-oolayan nasusurat sa Genesis 2:16, 17: “Hale sa gabos na kahoy sa tatamnan puwede kang magkakan sagkod na ika mabasog. Alagad kun dapit sa kahoy nin pakamidbid kan marahay asin maraot dai ka magkakan kaiyan, huli ta sa aldaw na kumakan ka kaiyan ika siertong magagadan.”

Iyan daw sa katotoohan disamuladong pagpanongod sa sekso? Bueno, arog kan nasusurat sa Genesis 1:27, 28, pinagbotan nin Dios an lalaki asin an babae na “pangagbunga asin pangagdakol kamo asin panoa nindo an daga.” Paano makukuyog ni Adan asin Eva an pagboot na iyan na dai nagdodorog? Talaga daw na ipamumugtak niato na pinagbotan sinda nin Dios dangan sinentensiahan sindang magadan huli sa paghihingoang kuyogon iyan?

Apuwera kaiyan, an tala sa Genesis nagpapaheling na si Adan asin Eva nagkasala nin separado, bakong dungan. Liniliwanag kan kapitulo 3, bersikulo 6, na si Eva enot na sinugotan na kumakan kan bunga asin na “dangan tinawan man nia an saiyang agom kan sia nasa kaibanan nia asin nagpoon man siang kumakan kaiyan.” Kaya an pagkakan sa ipinangangalad na bunga dai angay asin harayong simbolo nin pagdodorog.

Kaaraman daw Idto?

Ano man an paghihingako na an ipinangangalad na bunga simbolo nin gabos na kaaraman? An totoo, kapwa si Adan asin Eva may dakol nang kaaraman bago ninda linapas an pagboot sa Genesis 2:16, 17. An saindang Kaglalang, si Jehova mismo, direktang kalabot sa pagtotokdo sa sainda. Halimbawa, dinara nia sa lalaki an gabos na hayop asin gamgam tanganing ngaranan nia iyan. (Genesis 2:19, 20) Daing duwa-duwa na kaipuhan na maingat na pag-adalan ni Adan an lambang saro tanganing matawan iyan nin angay na ngaran. Ini marahayon na edukasyon sa zoolohiya! Si Eva, minsan ngani huring linalang, bako man na ignorante. Kan hapoton kan halas, ipinaheling nia na sia tinokdoan sa pagboot nin Dios. Aram nia an pagkakalaen nin tama asin sala, asin aram ngani nia an mga resulta nin salang gawe.—Genesis 3:2, 3.

An mga interpretasyon sa orihinal na kasalan na magsalang sekso o kaaraman arog sana kaiyan—interpretasyon nin tawo, mayo na nin iba. An kaluyahan kaiyan ipinaririsa kan hapot kan maimbod na tawong si Jose: “Bakong sa Dios an mga pagpalinaw?” (Genesis 40:8) An Biblia mas pasil na masabotan kun dai niato ipinipirit dian an mga ideya nin tawo kundi, imbes, pinababayaan iyan na magtao nin sadiring interpretasyon. Kun siring, ano an orihinal na kasalan? Bueno, an tala kan Genesis nagtatao sato kan gabos na dahelan na tumubod na an kahoy nin pakamidbid sa marahay asin maraot aktuwal na kahoy. Sinasabi sato kun saen idto sa tatamnan, asin iyan nasasambitan may relasyon sa ibang kahoy. An bunga kaidto tunay, asin si Adan asin Eva aktuwal na nagkakan sa bunga.

Idto daw Pagmasumbikal?

Sa pagkakan kan bungang idto, ano an ginigibo ninda? An New Catholic Encyclopedia medyo nag-aalangan pang nagsusuherir: “Idto puwedeng daing iba kundi hayag na paglaban sa Dios, maabhaw na pagsayuma na kumuyog sa Saiya.” Bako daw na iyan an malinaw na sinasabi kan Genesis? Pinatutunayan an puntong iyan kan Roma 5:19: “Huli sa pagmasumbikal nin sarong tawo dakol an ginibong makasalan.” (The New Jerusalem Bible) An orihinal na kasalan sarong akto nin pagmasumbikal.

Minsan ngani an kasalan na pagmasumbikal garo baga simple sana, horophoropa an dakulang mga resulta kaiyan. Arog kaini an pagkasabi nin sarong nota sa ibaba sa The New Jerusalem Bible: “Idto [an pakamidbid sa marahay asin maraot] iyo an kapangyarihan na magdesisyon para sa sadiri kun ano an marahay asin kun ano an maraot asin gumawe oyon dian, paghagad nin kompletong moral na independensia . . . An enot na kasalan pag-atake sa soberaniya nin Dios.” Iyo, an “kahoy nin pakamidbid sa marahay asin maraot” nagsimbolo sa diretso nin Dios na magbugtak kan mga pamantayan para sa tawo kun ano an inooyonan o kun ano an kinokondenar. Sa pagsayumang kumuyog sa pagboot nin Dios, ibinubugtak nin tawo sa pagduda an mismong diretso nin Dios na maghade sa saiya. Makatanosan na sinimbag ni Jehova an angat paagi sa pagtogot sa tawo na pamahalaan an sadiri. Dai daw kamo maoyon na kapahapahamak an mga resulta?—Deuteronomio 32:5; Eclesiastes 8:9.

Iyan an dahelan na an tema kan Biblia, an Kahadean nin Dios, nagtatao nin dakulang paglaom. Paagi sa Kahadean na iyan, si Jehova nanunuga na tapuson sa dai na mahahaloy an mapan-aping paghade nin tawo asin salidahan iyan kan Saiyang paghade—gobyerno na ibabalik an daganon na paraiso—bagay na iwinara ni Adan asin Eva.—Salmo 37:29; Daniel 2:44.

[Ritrato sa pahina 12]

Nakomitir daw ni Adan asin Eva an orihinal na kasalan paagi sa pagdodorog?

[Credit Line]

Gustave Doré