Taano ta Nagagadan Kita?
“Toninong ngonyan sa gabos na bolod, sa itaas nin mga kahoy haros mayong huyop-huyop; torog an mga gamgam sa kakahoyan: halat ka; dai na mahahaloy arog kan mga ini mapahingalo ka.”—JOHANN WOLFGANG VON GOETHE, POETA NA ALEMAN.
1, 2. (a) An mga tawo linalang na igwa nin anong kamawotan? (b) Anong klase an buhay kan enot na mag-agom na tawo?
LINALANG nin Dios an tawo na may paghimuyamot na mabuhay sagkod lamang. Sa katunayan, sinasabi kan Biblia na binugtakan nia nin “sentido nin panahon na daing sagkod sa saindang puso.” (Eclesiastes 3:11, Beck) Alagad bako sanang kamawotan na mabuhay sagkod lamang an itinao nin Dios sa mga tawo. Tinawan man nia sinda kan oportunidad na magibo iyan.
2 An enot niatong mga magurang, si Adan asin Eva, linalang na sangkap, na mayong kakundian sa isip o hawak. (Deuteronomio 32:4) Imahinara—mayo nin pabalikbalik na mga kolog, mayo nin nangingiring mga pagkatakot o kahaditan! Apuera kaini, ibinugtak sinda nin Dios sa sarong magayon na erokan na paraiso. Katuyohan nin Dios na an tawo mabuhay sagkod lamang asin na pag-abot nin panahon an daga mapapano kan saiyang sangkap na mga gikan. (Genesis 1:31; 2:15) Kun siring, taano ta nagagadan kita?
An Pakisuway Nagbubunga nin Kagadanan
3. Depende sa ano an buhay na daing sagkod para ki Adan asin Eva?
3 Si Adan pinagbotan nin Dios: “Hale sa gabos na kahoy sa tatamnan puede kang magkakan sagkod na ika mabasog. Alagad kun dapit sa kahoy kan pakamidbid sa marahay asin maraot dai ka magkakan dian, huli ta sa aldaw na kumakan ka dian ika siertong magagadan.” (Genesis 2:16, 17) Kaya kondisyonal an buhay na daing sagkod para ki Adan asin Eva; depende iyan sa saindang pagkuyog sa Dios.
4. Kan magkasala si Adan asin Eva, taano ta nawara sa sainda an esperansang mabuhay sagkod lamang sa Paraiso?
4 Minsan siring, makaturotriste ta si Adan asin Eva nakisuway sa ley nin Dios. (Genesis 3:1-6) Sa paggibo kaiyan, sinda nagin mga parakasala, huli ta “an kasalan katampalasanan.” (1 Juan 3:4) Bilang resulta, si Adan asin Eva mayo na kan esperansang mabuhay nin daing sagkod. Taano? Huli ta “an ibinabayad nin kasalan kagadanan.” (Roma 6:23) Sa siring, kan sinesentensiahan si Adan asin Eva, an Dios nagsabi: “Ika kabokabo asin sa kabokabo ka man mabalik.” Dangan pinahale an satong enot na mga magurang sa saindang erokan na Paraiso. Kan aldaw na sinda magkasala, pinonan ni Adan asin Eva an maluway alagad daing saltong proseso nin pagkagadan.—Genesis 3:19, 23, 24.
“An Kagadanan Nakalakop sa Gabos na Tawo”
5. Paano nakalakop an kagadanan sa enterong rasa nin tawo?
5 Si Adan asin Eva ngonyan hararom nang nakaukit an kasalan sa saindang genes. Huli kaini, dai na sinda makapaluluwas nin sangkap na aki, kun paanong an sarong moldeng bakong sangkap dai makapaluluwas nin sangkap na bagay. (Job 14:4) Sa katunayan, an lambang tawo na namumundag patunay na iwinara kan enot niatong mga magurang an sangkap na salud asin buhay na daing sagkod para sa sainda man sana asin sa saindang mga aki. An Kristianong apostol na si Pablo nagsurat: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”—Roma 5:12; ikomparar an Salmo 51:5.
6. Taano ta nagagadan kita?
6 Ngonyan dai aram nin mga sientista kun taano man nanggad ta naggugurang asin nagagadan an tawo. Minsan siring, an Biblia nagpapaliwanag na kita nagagadan huli ta kita namumundag na makasalan, na minana an kamugtakan na ini sa enot niatong mga magurang. Alagad ano an nangyayari sa sato kun kita magadan?