LEKSIYON 26
Taano ta May mga Maraot na Nangyayari Asin Kasakitan?
“Taano ta nangyari ini?” Iyan an parating ihinahapot nin mga tawo pag may nangyaring trahedya. Maray na lang ta may malinaw na simbag an Bibliya sa hapot na iyan!
1. Ano an ginibo ni Satanas kaya nagkaigwa nin maraot na mga nangyayari sa kinaban?
Nagrebelde sa Diyos si Satanas na Diyablo. Gusto ni Satanas na mamahala sa iba, kaya inimpluwensiyahan niya an inot na tawong si Adan asin Eva tanganing magrebelde man sa Diyos. Ginibo niya ini paagi sa pagputik o pagsabi nin bakong totoo ki Eva. (Genesis 3:1-5) Pinapaniwala niya si Eva na may marahay na bagay na ipinag-iimot si Jehova sa saiya. Gusto niyang paluwason na magigin mas maugma an mga tawo kun dai sinda masunod sa Diyos. Sinabi ni Satanas an inot na kaputikan paagi sa pagsabi ki Eva na dai ini magagadan. Kaya inaapod kan Bibliya si Satanas na “putikon asin iyo an ama kan kaputikan.”—Juan 8:44.
2. Ano an ginibo ni Adan saka ni Eva?
Bukas-palad na marhay si Jehova ki Adan saka ki Eva. Sinabi niya sa sainda na puwede nindang kakanon an ano man na bunga kan kahoy sa hardin nin Eden apuwera sa saro. (Genesis 2:15-17) Pero nagdesisyon man giraray sinda na magkakan kan bunga kan kahoy na iyan. “Kuminua [si Eva] asin kuminakan kan bunga kaiyan.” Dangan, “kuminakan man [si Adan] kaiyan.” (Genesis 3:6) Pareho nindang sinuway an Diyos. Perpekto si Adan saka si Eva kaya natural sainda na gibuhon kun ano an tama. Pero tuyong sinuway ninda an Diyos. Kaya nagkasala sinda asin nagrebelde sa pamamahala niya. Dahil sa desisyon nindang iyan, grabeng pagsakit an sinapo ninda.—Genesis 3:16-19.
3. Paano kita naapektaran sa ginibo ni Adan saka ni Eva?
Kan magkasala si Adan saka si Eva, bako na sindang perpekto, asin naipasa ninda an pagkabakong perpektong iyan sa gabos na gikan ninda. Mapadapit ki Adan, sinasabi kan Bibliya: “Paagi sa sarong tawo an kasalan luminaog sa kinaban asin an kagadanan luminaog paagi sa kasalan, asin sa siring an kagadanan luminakop sa gabos na tawo.”—Roma 5:12.
Manlain-lain an dahilan kaya nagsasakit kita. Nagsasakit kita kun minsan dahil sa salang mga desisyon na ginibo ta. Kun minsan man nagsasakit kita huli sa salang desisyon kan ibang tawo o huling nagkataon na yaon kita sa salang lugar.—Basahon an Eclesiastes 9:11.
ARAMON PA
Aramon kun taano ta bakong Diyos an dahilan kan maraot na mga nangyayari asin kan kasakitan sa kinaban ngunyan asin kun ano an namamatian niya sa pagsakit ta.
4. An responsable sa satong pagsakit
Dakul na tawo an naniniwala na an Diyos an nagkokontrol sa kinaban. Totoo daw iyan? I-play an VIDEO.
Basahon an Santiago 1:13 asin 1 Juan 5:19, dangan pag-ulayan an hapot na ini:
An Diyos daw an responsable sa pagsakit asin sa maraot na mga nangyayari?
5. An resulta kan pamamahala ni Satanas
Basahon an Genesis 3:1-6, dangan pag-ulayan an mga hapot na ini:
Anong kaputikan an sinabi ni Satanas?—Hilingon an bersikulo 4 asin 5.
Paano pinaluwas ni Satanas na may ipinag-iimot si Jehova sa mga tawo?
Paano pinaluwas ni Satanas na dai kaipuhan kan mga tawo si Jehova bilang Tagapamahala para magin maugma?
Basahon an Eclesiastes 8:9, dangan pag-ulayan an hapot na ini:
Sa panahon na bako si Jehova an Tagapamahala kan kinaban, ano an nangyayari?
Perpekto si Adan saka si Eva asin nag-iistar sinda kaidto sa Paraiso. Pero dinangog ninda si Satanas asin nagrebelde ki Jehova
Huli sa nangyaring rebelyon, naglakop sa kinaban an kasalan, pagsakit, asin kagadanan
Hahalion ni Jehova an kasalan, pagsakit, asin kagadanan. Magigin perpekto giraray an mga tawo asin maistar sa Paraiso
6. Nagmamalasakit sa sato si Jehova
Mayo daw nin pakiaram an Diyos sa satong pagsakit? Pag-isipan an isinurat ni Hading David asin ni apostol Pedro. Basahon an Salmo 31:7 asin 1 Pedro 5:7, dangan pag-ulayan an hapot na ini:
Ano an namamati mo na nahihiling ni Jehova an satong pagsakit asin na nagmamalasakit siya sa sato?
7. Hahalion nin Diyos an gabos na pagsakit nin tawo
Basahon an Isaias 65:17 asin Kapahayagan 21:3, 4, dangan pag-ulayan an hapot na ini:
Taano ta nakakaugmang maaraman na hahalion ni Jehova an mga epekto kan gabos na maraot na bagay na naeeksperyensiyahan kan mga tawo?
Aram mo daw?
Kan sinabi ni Satanas an inot na kaputikan, pigpakaraot niya si Jehova. Rinaot niya an reputasyon ni Jehova bilang makatanusan asin mamumuton na Tagapamahala. Pag hinali na ni Jehova an pagsakit kan mga tawo sa madali nang panahon, ibibindikar niya an saiyang sadiri. Sa ibang pagtaram, papatunayan niya na an saiyang pamamahala iyo an pinakamarahay. An pagbindikar sa pangaran ni Jehova iyo an pinakaimportante sa bilog na uniberso.—Mateo 6:9, 10.
MAY MGA NAGSASABI: “Kabutan ’yan nin Diyos kaya nagsasakit kita.”
Ano an sasabihon mo?
SUMARYO
Si Satanas na Diyablo, saka si Adan asin Eva, an panginot na responsable sa maraot na mga nangyayari sa kinaban. Nahihiling ni Jehova an satong pagsakit saka nagmamalasakit siyang marhay sa sato, asin madali na niyang halion iyan.
Rebyu
Anong kaputikan an sinabi ni Satanas na Diyablo ki Eva?
Ano an nagin epekto sa sato kan pagrebelde ni Adan asin Eva?
Taano ta masasabi niyato na nahihiling ni Jehova an satong pagsakit asin na nagmamalasakit siya sa sato?
HILINGON MAN
Aramon an kahulugan kan kasalan uyon sa Bibliya.
Basahon an iba pang detalye manungod sa isyu na ibinangon ni Satanas na Diyablo sa hardin nin Eden.
“Bakit Pinahihintulutan ng Diyos ang Pagdurusa?” (Ang Bantayan, Enero 1, 2014)
Aramon an nakakapakusog na mga simbag sa sarong masakit na hapot.
“Taano ta Nangyari an Holocaust? Taano ta Dai Iyan Pinugulan nin Diyos?” (Artikulo sa jw.org/bcl)
Hilingon kun paano naaraman nin sarong lalaki kun taano ta may mga nangyayaring maraot.