Si Pablo Nagsurat sa mga Kongregasyon

AN BAGO pa sanang establisaron na Kristianong kongregasyon magkakaigwa nin mahalagang papel sa kaotoban kan katuyohan ni Jehova. Alagad an mga Kristiano kan enot na siglo tolos na napaatubang sa pagsalakay. Papagdadanayon daw ninda an saindang integridad sa Dios sa atubangan nin pagpersegir gikan sa luwas kan kongregasyon asin sa iba pang mas nakatagong mga peligro sa laog kaiyan? An Kristianong Griegong Kasuratan igwa nin 21 surat na nagtao nin kinakaipuhan na hatol asin pagparigon sa boot.

An 14 sa mga surat na iyan​—poon Roma sagkod Hebreo—​ginibo ni apostol Pablo. An mga surat na ini inginaran sa pinadarahan kaiyan​—baga man sarong indibiduwal o mga miembro nin partikular na kongregasyon. Estudyare an nagkapira sa mga tema na tinokar sa mga surat ni Pablo.

Konseho dapit sa moral asin gawe-gawe. An mga parapakisaro, parasambay, asin naggigibo nin iba pang grabeng kasalan “dai magmamana kan kahadean nin Dios.” (Galacia 5:19-21; 1 Corinto 6:9-11) An mga nagsasamba sa Dios dapat na nagkakasararo ano man an nasyonalidad ninda. (Roma 2:11; Efeso 4:1-6) Sinda maninigo na maogmang magsakripisyo sa pagtabang sa mga kapagtubod na nangangaipo. (2 Corinto 9:7) “Mamibi nin daing ontok,” an sabi ni Pablo. Tunay nanggad, an mga nagsasamba dinadagka na ipahayag ki Jehova paagi sa pamibi an nasa puso ninda. (1 Tesalonica 5:17; 2 Tesalonica 3:1; Filipos 4:6, 7) Tanganing dangogon nin Dios an mga pamibi, iyan dapat na ipahayag na may pagtubod.​—Hebreo 11:6.

Ano an makakatabang sa mga pamilya na magin mapanggana? Maninigong kamotan kan mga agom na lalaki an saindang agom siring sa sainda mismong hawak. An mga agom na babae maninigong magkaigwa nin hararom na paggalang sa saindang agom. Maninigong kuyogon kan mga aki an saindang mga magurang, huli ta ini nakakapaogma sa Dios. Kaipuhan nin mga magurang na mamomoton na giyahan asin sanayon an saindang mga aki, na ginagamit an diosnon na mga prinsipyo.​—Efeso 5:22–6:4; Colosas 3:18-21.

Itinaong liwanag dapit sa katuyohan nin Dios. An dakol na aspekto kan Ley ni Moises nagserbing proteksion asin giya sa mga Israelita sagkod na umabot si Cristo. (Galacia 3:24) Minsan siring, dai kaipuhan kan mga Kristiano na otobon an Ley na iyan tanganing sambahon an Dios. Kan sumurat si Pablo sa mga Hebreo​—mga Kristianong Judio—​sia nagtao nin orog na liwanag dapit sa kahulogan kan Ley asin kun paano an katuyohan nin Dios naotob ki Cristo. Ipinaliwanag ni Pablo na an manlaenlaen na areglo sa Ley na iyan igwa nin kahalagahan bilang hula. Halimbawa, an pag-atang nin mga hayop nagladawan sa kagadanan ni Jesus bilang atang, na matao nin tunay na kapatawadan sa mga kasalan. (Hebreo 10:1-4) Paagi sa kagadanan ni Jesus, kinanselar nin Dios an tipan nin Ley na iyan, huling iyan dai na kaipuhan.​—Colosas 2:13-17; Hebreo 8:13.

Instruksion dapit sa tamang pagkaorganisar kan kongregasyon. An mga lalaki na gustong magkaigwa nin mga paninimbagan sa kongregasyon dapat na igwa nin halangkaw na mga pamantayan sa moral asin nakakaabot sa espirituwal na mga kualipikasyon. (1 Timoteo 3:1-10, 12, 13; Tito 1:5-9) An mga nagsasamba ki Jehova Dios maninigo na regular na makipagtipon sa mga kapagtubod tanganing magparinigonan nin boot. (Hebreo 10:24, 25) An mga pagtiripon para sa pagsamba maninigo na nakakaparigon asin nakakapagtokdo.​—1 Corinto 14:26, 31.

Kan gibohon ni Pablo an ikaduwa sa saiyang duwang surat ki Timoteo, an apostol nagbalik na sa Roma; sia nakabilanggo asin naghahalat nin sentensia. Pira sanang tawo an makosog an boot na inatubang an peligro tanganing bisitahon sia. Aram ni Pablo na halipot na sana an panahon nia. “Nakipaglaban ako kan marahay na pakilaban,” an sabi nia. “Natapos ko na an paorumbasan, naotob ko na an pagtubod.” (2 Timoteo 4:7) Posibleng marhay na si Pablo ginadan bilang martir dai nahaloy pakatapos kaiyan. Alagad an mga surat kan apostol naggigiya sa tunay na mga nagsasamba sa Dios sagkod ngonyan.

​—Basado sa Roma; 1 Corinto; 2 Corinto; Galacia; Efeso; Filipos; Colosas; 1 Tesalonica; 2 Tesalonica; 1 Timoteo; 2 Timoteo; Tito; Filemon; Hebreo.