Kamo daw May Diskresion?
SA PAGNOMBRA nin mga hokom sa Israel, si Moises nagmaigot na makakua “nin mga lalaking madonong asin may diskresion patin may kabatidan.” (Deuteronomio 1:13) An kabatidan, na kadungan nin edad, bako an solamenteng pinagbasaran. An kadonongan asin diskresion mahalaga man.
An tawong may diskresion nagpapaheling nin marahay na paghusgar sa pagtaram asin gawe-gawe. Oyon sa Webster’s Ninth New Collegiate Dictionary, an may diskresion na tawo “may kakayahan [man] na ingatan an may kadonongan na pagsilensio.” Iyo, igwa nin “panahon na magtaram,” patin igwa nin “panahon na dai maggirong,” asin an may diskresion na tawo nasasabotan an pagkakalaen na ini. (Eclesiastes 3:7) Sa parate, may marahay na rason na magsilensio, huli ta an Biblia nagsasabi: “Sa kadakolan nin tataramon dai nawawaran nin paglapas, alagad an nagpopogol kan saiyang mga ngabil naghihirong may diskresion.”—Talinhaga 10:19.
Iniingatan nin mga Kristiano na magin may diskresion sa saindang pagtratar sa lambang saro. An saro na iyo an pinakaparate o pinakamapuersang magtaram bako man pirmeng iyo an pinakaimportante o an pinakakaipuhan nanggad. Girumdomon, si Moises “makapangyarihan sa saiyang mga tataramon,” alagad dai nia kayang pangenotan nin epektibo an nasyon nin Israel sagkod na nakultibar nia an pasensia, kahoyoan, asin pagpopogol sa sadiri. (Gibo 7:22) Kun siring, an mga pinaniwalaan nin autoridad sa iba nangorognang kaipuhan na magmaigot na magin hababa an boot asin magpaheling nin mapagpahunod na aktitud.—Talinhaga 11:2.
An mga pinaniwalaan ni Jesu-Cristo kan “gabos niang rogaring” ilinaladawan sa Tataramon nin Dios bilang “fiel asin may diskresion.” (Mateo 24:45-47) Dai ninda ineenotan si Jehova sa paaging may kapalangkawan nin boot sa pusokpusokan na kapritso; o nagpapahuri sinda kun malinaw na an instruksion nin Dios manongod sa sarong bagay. Aram ninda kun noarin an panahon na magtaram asin kun noarin an panahon na maghalat nin silensio sa dugang pang klaripikasyon. Marahay na arogon kan gabos na Kristiano bako sanang an saindang pagtubod kundi patunayan man ninda na sinda may diskresion, arog kan grupong oripon.—Hebreo 13:7.