Arogon an Saindang Pagtubod

Sia Naghiro na May Pakamansay

NARISA ni Abigail sa mata kan hoben na lalaki an pagkataranta. Takoton an lalaki​—⁠asin iyan natural sana. May maabot na grabeng peligro. Kan mismong oras na iyan, nagdadangadang na an mga 400 na parapakilaban, na determinadong gadanon an lambang lalaki sa harong ni Nabal na agom ni Abigail. Taano?

Iyan gabos nagpoon huli ki Nabal. Arog kan dati nang ginigibo nia, sia guminawe nin maringis asin mapang-insulto. Pero sa panahon na ini, napasala sia sa ininsulto nia​—⁠an namomotan na komandante nin sarong maimbod asin sinanay na marhay na grupo nin mga parapakilaban. Ngonyan, saro sa mga hoben na tawohan ni Nabal, tibaad sarong pastor, an nagduman ki Abigail, na naglalaom na makakaisip ini nin plano tanganing iligtas sinda. Alagad, ano an magigibo nin sarong babae tumang sa sarong hukbo?

“Pasilyak Nia Sindang Inanggotan”

Huli ki Nabal, ngonyan orog kisa kasuarin man namugtak si Abigail sa masakit na situwasyon. An ininsulto nia mayong iba kundi si David. Ini an maimbod na lingkod ni Jehova na ninombrahan kan propetang si Samuel, na ihinayag si David bilang an pinili nin Dios na magigin kasalihid ni Saul bilang hade. (1 Samuel 16:​1, 2, 11-13) Huli sa pagdulag sa maimon asin paragadan na si Hadeng Saul, nag-istar si David sa kaawagan kaiba kan saiyang 600 na maimbod na parapakilaban.

Sia naanggot na gayo! Dapit sa nangyari, arog kaini an pagkasaysay ki Abigail kan hoben na lalaki na nasambitan sa enotan: “Pasilyak nia sindang inanggotan.” An maimot na si Nabal makosog an tingog na nagreklamo manongod sa saiyang mahalagang marhay na tinapay, tubig, asin karne. May pag-olog-olog na inapod nia si David na hamak asin ikinomparar sa sarong dulag na surugoon. An pagmansay ni Nabal tibaad kaagid kan pagmansay ni Saul, na naongis ki David. An pagmansay kan duwang lalaking iyan bakong arog kan ki Jehova. Namotan nin Dios si David asin minansay sia, bako bilang rebelyosong oripon, kundi bilang an magigin hade nin Israel.​—⁠1 Samuel 25:​10, 11, 14.

Sa sarong paagi, naheling na niato an enot na lakdang na ginibo ni Abigail tanganing itanos an grabeng sala na ini. Bakong arog kan saiyang agom na si Nabal, sia nagin andam na maghinanyog. An hoben na lingkod nagsabi dapit ki Nabal: “Sobra sia kadaing kamanungdanan na tawo tanganing kaolayon pa sia.”c (1 Samuel 25:17) Makamomondo, an halangkaw na pagheling ni Nabal sa saiyang sadiri an dahelan kun taano ta habo niang maghinanyog. An siring na pagkaarogante lakop na gayo sagkod sa panahon na ini. Alagad aram kan hoben na lalaki na laen si Abigail, na daing duda na iyo an dahelan kun taano ta idinolok nia ki Abigail an problemang ini.