Igwa daw Kamo nin Pagtubod na Arog kan ki Elias?

AN SOSYEDAD nin tawo ngonyan pinaluluya an pagtubod. An mga intelektuwal pinagtutuya an pag-eksister nin Dios. An relihiyosong mga parasaginsagin pinag-oolog-olog an Dios. Asin an sekular na kinaban paorog nang paorog na minagawe na garo daing halaga an Dios. Baga man an mga gaweng ini nagpapatakot sa sarong tawo, o nagpapaluya sa saiyang boot, o inoolakitan sia nin pagkaindiperente, pareho man sana an resulta: Minaluya an saiyang pagtubod. Bakong makangangalas na inapod ni apostol Pablo an kakulangan nin pagtubod na “an kasalan na pasil sanang nakagagapos sa sato”!​—Hebreo 12:1.

Tibaad iyan an dahelan na ginibo ni Pablo an espesyal na paghihingoa na apodon an satong atension sa buhay nin mga lalaki asin babae na may marigon na pagtubod. (Hebreo, kapitulo 11) An siring na mga halimbawa puwedeng makapahiro sato asin makaparigon sa satong pagtubod. Halimbawa, pag-olayan niato si propeta Elias, na isinisentro an atension sa kapinonan sana kan saiyang halawig asin masibot na karera bilang propeta. Nabuhay sia kaidtong paghade ni Hadeng Acab asin kan saiyang paganong agom, si Reyna Jezabel, kan panahon na, arog ngonyan, maluya an pagtubod sa tunay na Dios.

An Maraot na Sampulong-Tribong Kahadean

Pambihira an mag-agom na ini! Si Acab iyo an ikapitong hade sa sampulong-tribong Kahadean nin Israel. Minsan ngani maraot an anom niang sinundan, mas grabe si Acab. Bako sana na ipinagpadagos nia an maraot na pagsamba kan nasyon sa baka kundi inagom nia an prinsesang tagaibang daga na si Jezabel, sa siring ilinaog an pagsamba sa falsong dios na si Baal na mas makosog kisa naheling kan nasyon kasuarin man.​—1 Hade 16:​30-33.

Si Jezabel lagom sa Baalismo poon sa pagkaomboy. An saiyang ama, si Etbaal, saserdote ni Astoret (agom ni Baal), ginadan an iba tanganing makatukaw sa trono nin Sidon, an kahadean na nasa amihanan nin Israel. Inimpluwensiahan ni Jezabel an saiyang agom na maluya an moral na tindogon an Baalismo sa Israel. Dai nahaloy, igwa na nin 450 propeta kan falsong dios na iyan asin 400 na propeta kan diosang si Asera sa daga, na gabos nagkakakan sa lamesa kan hade. Makababalde nanggad an saindang pagsamba sa mata kan tunay na Dios, si Jehova! Mga simbolo kan ikinabuhay nin lalaki, mga rituwal sa pag-aki, mga patotot sa templo (kapwa lalaki asin babae), pati an pag-atang nin mga aki​—ini an nagpapamidbid na mga kabtang kan makababaldeng relihiyon na ini. May pag-oyon ni Acab, iyan naglakop na daing kaolangan sa bilog na kahadean.

Minilyon na Israelita an nakalingaw ki Jehova, an Kaglalang sa daga asin sa siklo nin tubig kaiyan. Para sa sainda si Baal an nagbebendisyon sa daga nin mga oran pakalihis kan alang na panahon. Taon-taon sinda naglalaom sa ‘Nakasakay sa mga Panganoron,’ an dios daang ini nin pagkamainaki asin tig-oranan, na tapuson an pagkaalang. Taon-taon, nag-abot an mga oran. Taon-taon, si Baal an inoomaw.

Iprinoklamar ni Elias an Dai Pag-oran

Tibaad sa katapusan nin haloy, daing oran na tig-initan​—kaidtong an mga tawo naglalaom nang itao ni Baal an nakabubuhay na mga oran—​na tuminunga si Elias.a Tuminunga sia sa rekord kan Biblia nin bigla na sana na garo dagoldol. Kakadikit an sinasabi sato manongod sa saiyang pinaghalean, mayo manongod sa saiyang mga magurang. Pero bakong arog nin dagoldol, si Elias daing darang oran. Ipinaisi nia ki Acab: “Mantang nabubuhay si Jehova na Dios nin Israel na sa saiyang atubangan ako nagtitindog, dai magkakaigwa nin ambon ni oran sa mga taon na ini, kun bakong sa sakuyang tataramon!”​—1 Hade 17:1.

Imahinara an tawong ini, na sulot an sa-probinsianong gubing na balukag. Sia tagaduman sa mga bolod nin Galaad, na posibleng nagdakula sa tahaw nin mapakumbabang mga pastor nin mga aripompon. Uminatubang sia sa makapangyarihan na hadeng si Acab, tibaad duman mismo sa saiyang mahiwas na palasyo, na may bantog na harong na gibo sa marfil, maluho asin palaen na mga dekorasyon asin darakulaon na idolo. Duman, sa maribok na nakukutaan na siudad nin Samaria, na haros nalingawan na an pagsamba ki Jehova, sinabihan nia si Acab na an saiyang dios, an Baal na ini, daing kapangyarihan, dai nag-eeksister. Sa taon na ini asin sa maabot pang mga taon, sabi ni Elias, dai magkakaigwa nin oran ni ambon!

Saen nia kinua an siring na pagtubod? Dai daw sia natakot, na nagtitindog sa atubangan kan arogante, apostatang hadeng ini? Seguro. Pakalihis nin labing sangribong taon, sinierto sato kan tugang ni Jesus sa ina na si Santiago na si Elias “sarong tawo na may mga pakamate na arog sato.” (Santiago 5:17) Alagad mangnoha an mga tataramon ni Elias: “Mantang nabubuhay si Jehova na Dios nin Israel na sa saiyang atubangan ako nagtitindog.” Ginirumdom ni Elias na bilang lingkod ni Jehova, sia nagtitindog sa atubangan nin trono na mas halangkaw na gayo ki kan ki Acab​—an trono kan Soberanong Kagurangnan sa uniberso! Sia representante, sugo, kan tronong iyan. Huli kaini, ano an ikatatakot nia ki Acab, maluyang hadeng tawo na mayo na kan bendisyon ni Jehova?

Bakong aksidente na si Jehova tunay na marhay para ki Elias. Segurado na pinag-adalan kan propeta an rekord kan mga ginibo nin Dios sa Saiyang banwaan. Pinatanidan ni Jehova an mga Judio na padudusahan nia sinda nin mga daing pag-oran asin gutom kun sinda masamba sa falsong mga dios. (Deuteronomio 11:​16, 17) Nagsasarig na perming inootob ni Jehova an saiyang tataramon, si Elias “namibi na dai umoran.”​—Santiago 5:17.

Ipinahahayag an Pagtubod Paagi sa Pagkuyog sa Paggiya

Pero, mientras tanto, si Elias ibinugtak sa grabeng peligro kan saiyang proklamasyon. Panahon nang kaipuhan na gamiton an saro pang kabtang kan saiyang pagtubod. Tanganing magdanay na buhay, kaipuhan siang magmaimbod sa pagkuyog sa mga instruksion ni Jehova: “Maghale ka digdi, asin pasirangan ka asin magtago ka sa sapa nin Kerit na nasa sirangan kan Jordan. Asin mangyayari na ika mainom sa sapa, asin pagbobotan ko an mga uwak na tawan ka nin kakanon duman.”​—1 Hade 17:​3, 4.

Tolos na nagkuyog si Elias. Kun boot niang maligtas sa dai pag-oran asin gutom sa saiyang nasyon, kaipuhan siang magsarig sa ano man na probisyon ni Jehova sa saiya. Ini bakong pasil. Idto nangahulogan na sia magtatago, na nabubuhay nin solo-solo sa laog nin mga bulan. Idto nangahulogan nin pagkakan nin karne asin tinapay na dinara sa saiya nin mga uwak​—mga gamgam na nagkakakan nin nalalapang laman na ibinibilang na maramog sa Pagboot ni Moises—​asin pagsarig ki Jehova na an karneng iyan bakong nalalapang laman kundi karneng pinadugo nin tama sono sa pagboot. Harayoon sa posibilidad an halawig na milagrong ini para sa nagkapirang komentarista sa Biblia kaya isinusuherir ninda na an orihinal na termino digdi nangangahulogan nin “Arabe” asin bakong “uwak.” Alagad ta pinakamarahay an mga uwak. Mayo nin maghohona na an menus, maramog na mga gamgam na ini na minalayog pasiring sa kapatagan dara an mga kapidasong pagkakan sa katotoohan pinakakakan si Elias, na hinahanap ni Acab asin Jezabel sa gabos na kahadean sa palibot!​—1 Hade 18:​3, 4, 10.

Mantang nagpapadagos na daing oran, posible na ikinahadit ni Elias an saiyang inoman sa sapa nin Kerit. An kadaklan na sapa sa Israel namamara sa mga panahon nin dai pag-oran, asin “pakalihis nin pirang aldaw,” ini namara man. Maiimahinar daw nindo an saboot ni Elias mantang nagigin turo na sana an tubig asin an mga sapa minasadit aroaldaw? Segurado na inisip nia kun ano an mangyayari kun mayo na nin tubig. Pero, si Elias maimbod na nagdanay duman. Kaidto sanang mara na an sapa na itinao saiya ni Jehova an sumunod na instruksion. Paduman ka sa Sarepta, sinabihan an propeta. Duman makakukua sia nin pagkakan sa harong nin sarong balo.​—1 Hade 17:​7-9.

Sarepta! An banwaan na iyan sakop kan siudad nin Sidon, na pinaghalean ni Jezabel asin duman naghahade an saiyang ama! Magigin ligtas daw iyan? tibaad inisip ni Elias. Pero “sia tuminindog asin nagduman.”​—1 Hade 17:10.

Si Jehova Nagtatagama nin Ikabubuhay Asin Buhay

Dai nahaloy binalosan an saiyang pagkuyog. Nanompongan nia an balo siring sa ihinula, asin nakua nia sa balo an pagtubod na mayo nanggad sa saiyang mga kahimanwa. An dukhang balong ini may igo na sanang harina asin lana para sa ultimong pagkakan nia asin kan saiyang aki. Pero, minsan sa saiyang makuring pangangaipo, nagusto siang igibo nguna nin tinapay si Elias, na nagsasarig sa saiyang panuga na susustentohan ni Jehova an saiyang lalagan nin lana asin an saiyang lalagan nin harina sagkod na may pangangaipo. Bakong makangangalas na ipinagirumdom ni Jesu-Cristo an maimbod na halimbawang ini kan balo kan dinidenunsiar an daing pagtubod na mga Israelita kan saiyang aldaw!​—1 Hade 17:​13-16; Lucas 4:​25, 26.

Alagad sa ibong kan milagrong ini, dai mahahaloy mapapaatubang sa makuring pagbalo an pagtubod kan balo asin ni Elias. Biglang nagadan an saiyang aki. Nagmomondo nin makuri, daing ibang maisip an balo kundi na an makamomondong pangyayaring ini may koneksion ki Elias, an “lalaki kan tunay na Dios.” Inisip nia kun baga pinadudusahan sia huli sa nakaaging kasalan. Alagad ta kinua ni Elias an saiyang daing buhay na aki sa saiyang pagkakakugos asin dinara ini sa kuwarto sa itaas. Aram nia na kaya ni Jehova na itao an labi sa ikabubuhay sana. Si Jehova iyo an burabod nin buhay mismo! Kaya si Elias namibi nin odok asin paorootro na bumuwelta logod an buhay kan aki.

Si Elias bakong an enot na nagkaigwa nin siring na pagtubod sa pagkabuhay liwat, pero sa rekord kan Biblia, sia an enot na ginamit sa pagbuhay liwat. An aki “nabuhay”! Seguradong nakaoogmang helingon an kagayagayahan kan ina kan darahon sa saiya ni Elias an saiyang aki paagi sa simpleng mga tataramon na: “Helinga! Buhay an saimong aking lalaki.” Siertong napapaluha, sia nagsabi: “Ngonyan, talagang aram ko na na ika lalaki nin Dios asin na an tataramon ni Jehova sa saimong ngoso totoo.”​—1 Hade 17:​17-24.

“An Sakuyang Dios si Jehova”

Nakapahihiro nanggad, asin angay nanggad, na an ngaran ni Elias nangangahulogan “An Sakuyang Dios si Jehova”! Sa panahon nin daing oran asin gutom, tinawan sia nin kakanon asin inomon ni Jehova; sa panahon nin moral na karibarawan, tinawan sia ni Jehova nin madonong na paggiya; sa panahon nin kagadanan, ginamit sia ni Jehova na ibalik an buhay. Asin minalataw na sa kada pangyayari hinagad ki Elias na gibohon an saiyang pagtubod sa saiyang Dios​—sa pagsarig sa Saiya na magtagama, sa pagkuyog sa Saiyang mga paggiya, sa pagsarig Saiya na pakangbanalon an Saiyang ngaran—​binalosan sia nin mas dakol pang dahelan na tumubod ki Jehova. Ini nagigin totoo mantang sia padagos na nag-ako nin masakit asin makatatakot pa nganing mga asignasyon hale sa saiyang Dios, si Jehova; an totoo, an pira sa pinakapambihira niang mga milagro nasa enotan pa.​—Helingon an 1 Hade, kapitulo 18.

Arog man kaiyan para sa mga lingkod ni Jehova ngonyan. Tibaad dai kita pakakanon sa milagrosong paagi o gamiton sa pagbuhay liwat; bako ining panahon para sa siring na mga milagro. Minsan siring, si Jehova mismo dai nagliwat ni kadikit poon kan aldaw ni Elias.​—1 Corinto 13:8; Santiago 1:17.

Tibaad kita man mag-ako nin masakit na mga asignasyon, nin depisil asin makatatakot na mga teritoryo na dadarahan kan satong mensahe na itinao nin Dios. Tibaad napapaatubang kita sa paglamag. Tibaad magutom pa ngani kita. Alagad sa maimbod na mga indibiduwal asin sa saiyang organisasyon sa kabilogan, paorootrong pinatunayan ni Jehova na sia sagkod ngonyan naggigiya asin nagpoprotehir sa saiyang mga lingkod. Sagkod ngonyan tinatawan nia sinda kan kapangyarihan na otobon an ano man na ipinagigibo nia sa sainda. Asin sagkod ngonyan tinatabangan nia sindang matagalan an mga pagbalo na tibaad umabot sa sainda sa maribok na kinaban na ini.​—Salmo 55:22.

[Nota sa Ibaba]

[Ritrato sa pahina 18]

Kamo daw, arog ni Elias, may pagtubod na aatamanon ni Jehova an mga pangangaipo kan saiyang mga lingkod?