Sarong Ilawan na Magiya sa Saindo sa Dalan nin Buhay

“ARAM kong marhay, O Jehova, na bakong sadiri nin tawo an saiyang dalan. Mayo sa tawong naglalakaw an kakayahan na giyahan man lamang an saiyang lakad.” (Jeremias 10:23) Paagi sa mga tataramon na ini ipinaheling ni propeta Jeremias na an mga tawo dai mapangganang makalalakaw sa dalan nin buhay kun mayo nin tabang. Saen makukua an siring na tabang? Minasimbag an salmista sa saiyang pamibi ki Jehova Dios: “An saimong tataramon ilawan sa sakong bitis, asin liwanag sa sakong dalan.”​—Salmo 119:​105.

An mga minapoon na mag-adal kan Tataramon nin Dios, an Banal na Biblia, asin mag-aplikar kan sinasabi kaiyan magigin siring sa saro na nagpopoon na magbaklay sa amay na aga. Sa primero, dai siang naheheling na gayo huli ta madiklom pa. Alagad mantang nagpopoon nang sumirang an saldang, padakol nang padakol an naheheling nia. Sa katapustapusi, an saldang nasa kaitaasan na. Malinaw nang marhay na naheheling nia an gabos na bagay. An siring na ilustrasyon nagpapagirumdom kan sarong talinhaga sa Biblia: “An dalan kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.”​—Talinhaga 4:18.

Kumusta man an mga nagsasayuma sa paggiya nin Dios? An Biblia nagsasabi: “An dalan kan mga maraot siring sa kaduloman; dai ninda aram kun ano an saindang nasisingkogan.” (Talinhaga 4:19) Iyo, an mga maraot siring sa tawong nasisingkog sa diklom. Pati an saindang garo baga mga kapangganahan sa pinakamarahay na kamugtakan temporaryo sana, huli ta “mayo nin kadonongan, ni ano man na pakamansay, ni ano man na hatol tumang ki Jehova.”​—Talinhaga 21:30.

Kun siring, sunodon an paggiya kan Tataramon nin Dios, an Biblia. Kun ginigibo nindo iyan, manonompongan nindong totoo an mga tataramon sa Talinhaga 3:​5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia an saimong mga dana.”