An Punto-de-Vista kan Biblia

Pamimibi sa mga Karawat—Naghihinanyog daw an Dios?

PANO nin kaogmahan an palibot mantang an rinibong apisyonado minalaog sa estadyum, na isinusuriyaw an pagsuportar sa saindang paboritong grupo. An mga parakawat nakatatapos pa sana sa saindang mga ehersisyong pampainit, asin madali nang sumilbato para sa pagpopoon kan karawat. Sa sarong lado kan pagkakawatan, an mga parakawat nakaluhod, asin sa tahaw an kapitan, na namimibi: “Dios ko, bendisyonan mo tabi an samong grupo, itao mo samo an kapangganahan sa samong kalaban, asin ingatan mo kami na dai makologan. Amen.” Nabubungkag an pagluhod paagi sa makosog na suriyaw, an mga parakawat minaduman na sa saindang mga lugar, minasilbato, asin minapoon an organisadong baralyada nin Amerikanong putbol.

An pamimibi bilang indibiduwal asin bilang grupo bago, durante, asin pakatapos na makikabtang sa laen-laen na karawat nauso na. Pero naghihinanyog daw an Dios? O arog kan sinasabi nin iba, linalapastangan daw kaini an pamibi?

“Runoton an Saimong Kataed”

Sa bilog na kinaban, haros gabos na karawat may kadahasan—sa pinagkakawatan asin sa mga miron. An sarong dating propesyonal na parakawat nin putbol sa Estados Unidos nagsurat: “Masasabi na an pagburugbugan iyo an mismong katuyohan nin putbol, kun paanong garadanan asin pirilayan an katuyohan nin guerra.” Nagkomento pa sia: “An may pagdinaogan, organisadong pangongolog kaipuhan sa satong pamumuhay, asin an putbol saro sa mas madaling masabotan na salming . . . na nagpapaheling sato kun gurano kaogma asin kapakipakinabang na Runoton an Saimong Kataed.”

Runoton an saimong kataed? Sabi ni Jesus kamotan an saimong kataed. (Mateo 22:39) Imposibleng imahinaron na an Dios nin pagkamoot yaon asin binibendisyonan an saro sa mga karawat ngonyan, na may pagdodoon sa panggagana ano man an mangyari.—1 Juan 4:16.

Nagdadalan daw an Dios sa mga Kawat?

An sarong bagay na nakadadagka sa pamimibi sa karawat iyo an relihiyosong katokdoan na an Dios omnipresente, na an Dios, sa gabos na panahon, aktuwal na yaon sa gabos na nag-eeksister na lugar asin bagay. Halimbawa, sa librong God Goes to Football Games, an klerigo asin dating kapelyan nin sarong grupo nin mga parakawat na si L. H. Hollingsworth nagsasabi: “An gabos na pormal na paniniwala niato manongod sa Dios kaiba an ideya kan Saiyang onmi-presensia; an ideya, kun gusto nindo, na Sia yaon sa inaapod niatong sekular na eksperyensia . . . An boot sabihon, an Dios nagsisimba, asin an Dios nagdadalan sa karawat nin putbol.”

Minsan siring, an Biblia dai nagtotokdo na an Dios omnipresente. An Kristianong apostol na si Pablo nagsurat: “Si Cristo naglaog . . . sa langit mismo, tanganing tumindog sa atubang nin Dios para sa sato.” (Hebreo 9:24) May duwang mahahalagang punto na nasasabotan niato sa tabang kan tekstong ini: na an Dios espiritung persona asin na sia may establisadong erokan, an langit. (1 Hade 8:49; Juan 4:24) Kaya dai sia puwedeng mamugtak sa ibang lugar kadungan kaiyan.

Dinadangog nin Dios an Saiyang mga Katood

Bueno, kun an Dios dai nagdadalan sa mga karawat, dai daw sia kisuerra naghihinanyog sa mga pamibi? Tanganing an mga pamibi makaabot sa talinga kan Dios na ini sa langit, na sa saiya uminatubang si Jesus, an namimibi kaipuhan na may kaaraman, kaaraman sa mga katuyohan nin Dios, sa saiyang personalidad, sa saiyang mga kuwalidad, sa saiyang mga dalan, asin sa saiyang ngaran. (Santiago 4:3) Sa pagdodoon kan pangangaipo na mamidbid an Dios, si Jesus namibi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios.”—Juan 17:3.

Tanganing mamidbid an saro kaipuhan an komunikasyon. An Dios nakikikomunikar sa tawo paagi sa Biblia, asin an Biblia iyo an paagi na mamidbid niato an Dios kan langit. Sinasabi kaiyan sa sato an saiyang ngaran, si Jehova. (Salmo 83:18) Sinasabi man kan Biblia na namotan na gayo nin Dios an kinaban kaya isinugo nia an saiyang bugtong na Aki, si Jesus, digdi sa daga tanganing an tawo magkaoportunidad sa buhay na daing katapusan. (Juan 3:16) Mantang binabasa asin pinag-aadalan niato an Biblia, si Jehova nagigin tunay sa sato, asin napaparani kita sa saiya paagi ki Jesus. (Juan 6:44, 65; Santiago 4:8) Huli ta tunay si Jehova, puwede kitang magkaigwa nin dayupot na personal na relasyon sa saiya.

Pero, kalabot sa pakikikatood sa Dios an may simbagan na komunikasyon. Ini nagkakaipo nin pakikipag-olay ki Jehova paagi sa pamibi. Sinasabi kan Biblia na an Dios “Paradangog nin pamibi” asin na “sia bakong harayo sa lambang saro sa sato.” (Salmo 65:2; Gibo 17:27) Minsan siring, dai ini nangangahulogan na an Dios naghihinanyog sa gabos na pamibi. (Isaias 1:15-17) Kiisay na pamibi an boot nin Dios na dangogon?

An salmistang si David nagsabi: “An pakikidayupot ki Jehova para sa mga natatakot sa saiya.” (Salmo 25:14) Sa orihinal na Hebreo, an gamot kan “pakikidayupot” (sohd) nangangahulogan “higoton.” Kun siring, an bersikulong ini nagtatao kan ideya na pinalalaog sa harani ki Jehova o sa tipan nin pakikikatood sa saiya. Solamente an mga nagsasamba na nagpapaheling nin tamang paggalang an pinalalaog. Kaya, an dayupot niatong pakikikatood sa Dios nagpapangyari sato na matakot na maputol an relasyon na iyan huli sa paggibo nin ano man na ikaaanggot nia, arog baga kan pagtrato sa pamibi na anting-anting sa suwerte tanganing maseguro an kapangganahan sa karawat.

Si Jehova naghihinanyog sa mga pamibi nin mga may sadiosan na puso na naghihingoang makikatood sa saiya, asin sia daing pagpapalaen. Dai sia nagpapaorog o nagtatao nin orog na onra sa sarong nasyonal na grupo, rasa, o grupo nin mga parakawat, kisa iba. (Salmo 65:2; Gibo 10:34, 35) Kun an Dios talagang nagdadangog sa pamibi nin mga parakawat asin an duwang grupo pareho namibi sa saiya para sa kapangganahan, arin an bebendisyonan nia? O kun an sarong parakawat nakologan nin grabe sa sarong karawat, maninigo daw na basulon an Dios?

Kun siring, kaipuhan na tama an ipamibi niato. Arog kaini an paliwanag dian ni apostol Juan: “Minsan ano an satong hagadon sono sa saiyang kabotan, nadadangog nia kita.” (1 Juan 5:14) Si Jehova naghihinanyog sa mga pamibi na oyon sa saiyang kabotan. Kaipuhan na aramon niato an saiyang kabotan asin mga katuyohan tanganing an satong pamibi makaoyon kaini.

An kabotan asin mga katuyohan nin Dios saka an saiyang mamuraway na ngaran dai asosyado sa nagdidinaogan asin madahas na mga karawat ngonyan. An Dios dai nagpapalaen. Kaya, kun namimibi sa mga okasyon na ini, naghihinanyog daw an Dios? Dai nanggad!