An Katotoohan Nakaliliwat sa Buhay

MAMONDO alagad totoo na an buhay kan kadakol na tawo ngonyan masakit, desesperado pa ngani. Posible daw na an siring na mga tawo makanompong nin kaogmahan? An nagkapira kriminal asin binibiktima an saindang kapwa. Puede pa daw sindang magin onestong mga miembro kan sosyedad? An simbag sa duwang hapot na ini iyo. An mga tawo puedeng magbago. An buhay puedeng bagohon. Ipinaheling ni apostol Pablo kun paano kan sia sumurat: “Maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.”​—Roma 12:2.

An pagkasambit sa “sangkap na kabotan nin Dios” tibaad magpagirumdom kan sinabi ni Jesus sa saiyang mga disipulo labing 20 taon bago isurat ni Pablo an mga tataramon sa enotan. Si Jesus nagsabi: “Mamimidbid nindo an katotoohan, asin bubutasan kamo kan katotoohan.” (Juan 8:32) Sa pagsabing “katotoohan,” an boot sabihon ni Jesus iyo an impormasyon na ipinasabong nin Dios​—nangorogna an impormasyon mapadapit sa kabotan nin Dios—​na prineserbar para sa sato sa Biblia. (Juan 17:17) Talaga daw na binubutasan kan katotoohan sa Biblia an mga tawo? Talaga daw na nagpapabago sa buhay an pamumuhay kaoyon sa kabotan nin Dios? Iyo nanggad. Estudyare an pirang halimbawa.

Katuyohan sa Buhay

Dai pa sana nahahaloy, si Moisés, sa Gibraltar, sarong tawong mamondoon. Sia nagsasabi: “Ako paraburat asin natotorog sa luwas. Desesperado ako. Barobanggi nakikiolay ako sa Dios na kaherakan ako asin dai ako pagtogotan na magtios nin saro na naman na aldaw. Naghihibi ako mantang ihinahapot ko sa Dios kun taano ta yaon ako sa kinaban na ini kun mayo man sana akong serbi, dai nin trabaho, mayo nin pamilya, asin mayo ni saro na matabang sa sako. Taano ta maninigo pa akong mabuhay?” Dangan, may nangyari.

Si Moisés nagpapadagos: “Aram ko na dinangog nin Dios an sakong pamibi kan makaolay ko si Roberto, saro sa Mga Saksi ni Jehova. Tinawan ako ni Roberto nin Biblia asin kopya kan pantabang sa pag-adal sa Biblia na Ano an Kahagadan sa Sato nin Dios?a Aroaldaw na pinag-adalan ming magkaibahan an Biblia sa bangko na tinotorogan ko kun banggi. Pakalihis nin sarong bulan iiniba ako ni Roberto sa sarong pagtiripon sa lokal na Kingdom Hall kan Mga Saksi ni Jehova. Dai nahaloy, biyo nang liniwat kan Biblia an sakong pananaw. Dai na ako natotorog sa luwas; ni nag-iinom o nagsisigarilyo. Nagbago an sakong buhay, asin maogma na ako. Naglalaom akong mabautismohan sa dai mahaloy asin maglingkod ki Jehova bilang saro sa saiyang mga Saksi.”

Kanigoan na pagbabago! Kun an mga tawo mayo nin paglaom, an rason parateng kadaihan nin kaaraman. Mayo sindang aram manongod sa Dios o sa saiyang makangangalas na mga katuyohan. Sa kaso ni Moisés, kan makua nia an kaaraman na iyan, nagtao iyan sa saiya kan kosog asin kapusoan na bakleon an saiyang buhay. An pamibi kan salmista sa Dios sinimbag sa kamugtakan ni Moisés: “Sugoan an saimong liwanag asin an saimong katotoohan. An mga ini logod gumiya sa sako. Darahon logod ako kan mga iyan sa saimong banal na bukid asin sa saimong tabernakulong grande.”​—Salmo 43:3.

Sa Belize, nakaaagid an eksperyensia ni Daniel. Si Daniel dai nagtotorog sa luwas​—prestihioso an saiyang trabaho. Alagad 20 taon na linabanan nia an pagkaadikto sa droga asin alkohol patin nagin inmoral an buhay. Minsan ngani pinadakula na Katoliko, si Daniel daing naheheling na kahulogan sa buhay, asin pinagdudahan nia an pag-eksister nin Dios. Dinumanan nia an laen-laen na iglesia na naghahanap nin tabang alagad ta nadiskobre nia na an kadaklan sa mga katood nia na nagsisimba asin minsan an nagkapira sa saiyang mga katood na klerigo nag-aabuso sa droga o alkohol. Mientras tanto, ididiborsio na sia kan saiyang agom.

Huli sa pagkadesesperar si Daniel naglaog sa sarong klinika sa rehabilitasyon. Pero, aram nia na pagluwas nia, dai mahaloy balik na naman sia sa droga kun dai sia mag-ako nin tabang. Alagad anong klaseng tabang? Kan Mayo 1996, duwang aldaw pagkaluwas nia sa rehabilitasyon, dinolok ni Daniel an saro sa Mga Saksi ni Jehova asin sinorpresa nia ini kan pakiolay na, “Tabi man na adalan nindo ako sa Biblia.” Iinareglo kan Saksi na adalan si Daniel sa Biblia duwang beses kada semana, asin dai nahaloy pinonan ni Daniel na ioyon an saiyang buhay sa kabotan nin Dios asin sinalidahan nia an saiyang dating mga katood nin Kristianong mga katood na dai nag-aabuso sa droga o alkohol asin naglilikay sa inmoralidad. Sa siring nadiskobre ni Daniel na totoo an sinasabi kan Biblia: “Sia na naglalakaw na kaiba nin mga madonong magigin madonong, alagad sia na nakiiiba sa mga mangmang maraot an aabotan.” (Talinhaga 13:20) Dai nahaloy, sia nagsabi: “Ini an kaenot-enote sa buhay ko na naaraman ko kun ano an boot sabihon kan pagkaigwa nin malinig na konsensia.” Nabago man an buhay ni Daniel.

Sa Puerto Rico, saro pang lalaki an nakaeksperyensia nin risang marhay na pagbabago. Bilanggo sia asin an pagheling sa saiya peligroso siang marhay, huli ta nagkapira na an ginadan nia. Kaya daw siang bagohon kan katotoohan sa Biblia? Iyo. An saro sa mga Saksi ni Jehova natawan sia nin pirang kopya kan magasin na Torrengbantayan asin Awake!, asin tolos-tolos siang naghagad pa. Naponan siang adalan sa Biblia, asin mantang an katotoohan sa Biblia nagpopoon na magkaepekto sa saiyang puso, an mga pagbabago nia naheheling kan gabos. An saro sa enot na mga ebidensia kan saiyang pagbabago nangyari kan lipotan nia an saiyang halabang buhok asin ahiton an saiyang gurunos na barabas.

An Biblia nagsasabi na an Dios nagpapatawad sa mga nagkasala na tunay na nagsosolsol asin liniliwat an saindang estilo nin buhay. Si Pablo nagsurat: “Dai kamo nakaaaram na an mga bakong matanos dai magmamana kan kahadean nin Dios? . . . Alagad ta arog kaiyan kaidto an nagkapira sa saindo. Alagad kamo nahugasan na.” (1 Corinto 6:​9, 11) Daing duwa-duwa, an mga tataramon na ini nakaranga sa lalaking ini, arog man kan mga tataramon sa Gibo 24:​15: “Magkakaigwa nin pagkabuhay liwat kapwa an mga matanos asin an mga bakong matanos.” Sia nagsabi: “Gusto kong yaon ako duman sa pagbuhay kan mga gadan tanganing makahagad ako nin tawad sa mga ginadan ko.”

Sarong Bagong Pamilya

Sarong aldaw si Luis, sarong bilog na panahon na paraebanghelyo kan Mga Saksi ni Jehova sa Argentina, ipinamidbid sa sarong soltero na nagkaigwa nin mamondong eksperyensia. Huling inabandonar kan saiyang mga magurang pagkamundag, sia nagdakula sa laen-laen na institusyon. Kan sia mga 20 anyos na, naaraman nia kun haen an saiyang ina asin nagdesisyon siang mag-istar sa kaibahan nia. Sia mahigos na nagtrabaho, nagdamot nin dakol na kuarta, asin nagduman sa siudad na iniistaran kan saiyang ina. Tinogotan sia kan saiyang ina na mag-istar sa kaibahan nia sagkod na naubos an saiyang kuarta dangan pinahale sia. Gusto na niang maghugot huli sa pagsikwal na ini.

Minsan siring, ikinahiras ni Luis sa solterong ini an katotoohan sa Biblia. Kaiba sa katotoohan na iyan an garantiya: “Kun bayaan ako kan sakong ama asin kan sakong ina, si Jehova mismo an maampon sa sako.” (Salmo 27:10) Nadiskobre kan soltero na igwa sia nin langitnon na Ama na nungkang aabandonaron sia. Maogma sia ngonyan na magin kabilang sa sarong pamilya, an pamilya ni Jehova.

An saro pang lalaki sa nasyon man sanang iyan nagsabi sa saro sa Mga Saksi ni Jehova na nagustohan nia an magasin na Torrengbantayan. Taano? Huli ta isinalbar kaiyan an saindang relasyon mag-agom. Minalataw na sarong aldaw an lalaking ini, mantang sia pahale na sa trabaho, nakaheling sa basurahan nin sarong magasin na Torrengbantayan na may titulong “Diborsio” na nakasurat sa darakulang letra. Huling problemado an saindang relasyon mag-agom asin pinonan na ninda mag-agom an prosedimiento para sa legal na separasyon, pinurot nia an magasin asin pinonan na basahon iyan. Ipinuli nia iyan asin binasa iyan kaiba an saiyang agom. Hiningoa kan mag-agom na iaplikar an hatol na basado sa Biblia na yaon sa magasin. (Efeso 5:21–​6:4) Dai nahaloy, nagrahay an saindang relasyon. Pinondo ninda an prosedimiento para sa separasyon asin nag-aadal na ngonyan sa Biblia bilang nagkakasarong mag-agom.

Sa Uruguay, an saro pang lalaki na an ngaran Luis bakong maogma. Pagkaadikto sa droga, espiritismo, pagsamba sa idolo, pag-abuso sa alkohol​—nagkapira ini sa mga bagay na nagparibok sa saiyang buhay. Sa katapustapusi, si Luis, na biyo nang desganado, nagin ateista. An sarong katood tinawan sia kan librong Life​—How Did It Get Here? By Evolution or by Creation?b Nagresulta ini sa halipot na pakikiiba sa Mga Saksi ni Jehova, alagad dai nahaloy buminalik na naman si Luis sa alkohol asin droga. Kan, sa oras nin labi-labing kamondoan, nagtutukaw sia sa may kalot na pano nin basura, sia namibi, na ipinapaabot an saiyang pamibi sa “ama ni Jesu-Cristo,” huling dai nia segurado kun ano an ngaran kan Dios.

Hinagad nia sa Dios na ipaheling sa saiya kun igwa nin ano man na rason sa saiyang pagigin nasa kinaban. “Kan suminunod na aldaw mismo,” an pagbareta ni Luis, “an sarong kamidbid tinawan ako nin sarong libro na dai na nia magagamit. An titulo kaiyan? Revelation​—Its Grand Climax At Hand!”c An libro nakatabang sa saiya na masimbag an saiyang hapot. Namibi giraray si Luis na logod tabangan siang manompongan an relihion na mapaheling sa saiya kun paano paglilingkodan an Dios. Abaang pagkasorpresa! May nagtimbre, asin an nakatindog sa luwas duwa sa Mga Saksi ni Jehova. Si Luis tolos-tolos na nagpoon na makipag-adal sa sainda sa Biblia. Marikas an saiyang pag-oswag asin ngonyan nakamamateng binendisyonan na magin bautisadong Saksi. Malinig na an saiyang pamumuhay asin tinatabangan man nia an iba na makanompong nin katuyohan para sa saindang buhay. Para sa saiya, nagkatotoo an mga tataramon sa Salmo 65:​2: “O Paradangog nin pamibi, sa saimo an mga tawo nin gabos na laman madorolok.”

Sa Pilipinas, si Allan dating aktibistang estudyante. Kabilang sia sa sarong organisasyon na an katuyohan “ibagsak an gobyerno tanganing an masurunod na henerasyon magkamit nin pagkapantaypantay.” Pero sarong aldaw nakaolay sia kan Mga Saksi ni Jehova asin nanodan nia sa Biblia an katuyohan nin Dios para sa katawohan. Kaiba sa katuyohan na iyan an ipinasabong na panuga: “Dai na mahahaloy, asin ta an maraot mawawara na . . . Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” (Salmo 37:​10, 11) Si Allan nagsabi: “Dai nahaloy nadiskobre ko na an ipinakikilaban kan samong mobimiento kaidto pa ihinula sa Biblia. An gabos ming pinakamamawot itatao sa pagsakop kan Kahadean nin Dios.” Sinusuportaran na ngonyan ni Allan an Kahadean nin Dios asin tinatabangan an iba na tumubod sa katotoohan sa Biblia.

Iyo, nababago an buhay kun kinukuyog kan mga tawo an katotoohan sa Tataramon nin Dios, an Biblia. Tunay nanggad, maabot an panahon na an bilog na nakaligtas na katawohan ikinaoyon na an saindang buhay sa kabotan nin Dios. Kanigoan na pagbabago iyan! Dangan, maootob an hula: “Dai sinda magibo nin maraot o manraraot sa bilog na sakuyang banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”​—Isaias 11:9.

[Mga Nota sa Ibaba]