“Paagi sa Liwanag na Gikan sa Saimo Nakaheheling Kami nin Liwanag”
AN LIWANAG sarong bagay na sa parate ipinapasipara sana sagkod na mawaran nin koryente asin biglang nagkaigwa nin kadikloman sa satong pagtaraed. Marahay sana ta an satong langitnon na “planta nin elektrisidad”—an saldang—biyong masasarigan. Asin sa tabang kan liwanag hale sa saldang, kita nakakaheling, nakakakakan, nakakahangos, asin nabubuhay.
Mantang an liwanag mahalagang marhay sa buhay, dai kita maninigo na magngalas na mabasa sa Genesis na an liwanag luminataw sa enot na aldaw nin paglalang. “Nagsabi an Dios: ‘Magkaigwa nin liwanag.’ Dangan nagkaigwa nin liwanag.” (Genesis 1:3) An reberenteng mga lalaki arog ni Hadeng David pirmeng minimidbid si Jehova bilang an gikanan nin buhay asin liwanag. “Yaon sa saimo an gikanan nin buhay,” an isinurat ni David. “Paagi sa liwanag na gikan sa saimo nakaheheling kami nin liwanag.”—Salmo 36:9.
An mga tataramon ni David minaaplikar sa literal sagkod sa piguratibong paagi. An Encyclopædia Britannica nagsasabi: “Tunay nanggad na an liwanag an responsable sa pakaheling.” Dangan idinudugang kaiyan: “Mas dakol na impormasyon an nakakaabot sa hotok nin tawo paagi sa mga mata kisa paagi sa arin man na organo sa sentido.” Mantang an kadaklan kan satong nanonodan minadepende sa balaog na pakaheling—na nangangaipo nin liwanag tanganing magpunsionar nin tama—an liwanag ginagamit man sa Kasuratan sa piguratibong paagi.
Sa siring, sinabihan ni Jesus an saiyang mga disipulo: “Ako iyo an ilaw kan kinaban. An minasunod sako dai nanggad maglalakaw sa kadikloman, kundi magkakaigwa kan ilaw nin buhay.” (Juan 8:12) An piguratibong ilaw na nasambitan ni Jesus iyo an mensahe nin katotoohan na saiyang ihinuhulit, na puedeng paliwanagon an isip asin puso kan mga naghihinanyog sa saiya. Pakalihis nin mga taon nin espirituwal na kadikloman, sa katapustapusi puede nang masabotan kan mga disipulo ni Jesus an katuyohan nin Dios para sa katawohan asin an paglaom sa Kahadean. Ini totoo nanggad na “ilaw nin buhay,” huli ta an kaaraman na iyan puedeng gumiya sa buhay na daing sagkod. “Ini nangangahulogan nin buhay na daing katapusan,” an sabi ni Jesus sa pamibi sa saiyang langitnon na Ama, “an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Nungka logod niatong ipasipara sana an espirituwal na liwanag na ini!