An Dios daw Tunay Para sa Saindo?

KUN kamo nakaeeksperyensia nin nakapupurisaw na mga problema, kamo daw tolos na minadolok sa Dios sa pamibi? Kun iyo, namamatean daw nindo na nakikipag-olay kamo sa sarong tunay na persona?

Nagtataram manongod sa saiyang langitnon na Ama, si Jesu-Cristo nagsabi: “Sia na nagsugo sa sako tunay.” (Juan 7:28) Iyo, si Jehova Dios tunay, asin an pamimibi sa saiya garo pagrani sa sarong dayupot na marhay na tawong katood para sa tabang o konseho. Siempre, tanganing dangogon nin Dios, an satong mga pamibi dapat na makaabot sa Makakasuratan na mga kahagadan para sa inaakong pamibi. Halimbawa, dapat na kita mapakumbabang dumolok sa “Paradangog nin pamibi” paagi sa saiyang Aki, si Jesu-Cristo.​—Salmo 65:2; 138:6; 138:6; Juan 14:​6.

Tibaad isipon nin nagkapira na huling an Dios dai naheheling, sia bakong persona. Para sa sainda, an Dios tibaad garo abstrakto. Maski an nagkapirang Kristiano, na nakanood na manongod sa marahayon na mga kualidad nin Dios, tibaad masakitan kun beses na saboton kun gurano sia katunay. Naeksperyensiahan na daw nindo ini? Kun iyo, ano an makatatabang na gibohon si Jehova Dios na tunay para sa saindo?

Pag-adalan an Kasuratan

Regular daw nindong pinag-aadalan an Banal na Kasuratan? Mientras na mas parate asin sigido an saindong mga panahon nin pag-adal sa Biblia, si Jehova Dios magigin orog na tunay para sa saindo. Sa siring mapakokosog an saindong pagtubod, na garo man sana pinangyayari na saindong ‘maheling an Saro na dai naheheling.’ (Hebreo 11:​6, 27) Sa ibong na kampi, an bihira o poropondong pag-adal sa Biblia posibleng dai magkaigwa nin dakulang epekto sa saindong pagtubod.

Bilang ilustrasyon: Imahinara na ininstruksionan kamo kan doktor nindo na ihaplas an sarong panlahid nin duwang beses kada aldaw tanganing mawara an sarong dai nahahaleng libaka. Mawawara daw an saindong libaka kun ihahaplas nindo an panlahid nin saro o duwang beses sana sa sarong bulan? Imposible iyan. Kaagid kaiyan, an salmista tinatawan kita nin “reseta” para sa espirituwal na salud. Basahon an Tataramon nin Dios “sa maluya sanang tingog aldaw asin banggi.” (Salmo 1:​1, 2) Tanganing kamtan an progresibong pakinabang, kaipuhan na sunodon niato an “reseta”​—an aroaldaw na pag-estudyar kan Tataramon nin Dios sa tabang kan Kristianong mga publikasyon.​—Josue 1:8.

Gusto daw nindong gibohon an saindong mga panahon nin pag-adal na orog na nakapakokosog sa pagtubod? Uya an sarong suhestion: Pakabasa kan sarong kapitulo sa New World Translation of the Holy Scriptures o ibang Biblia na may mga cross-reference, pumili kamo nin sarong interesanteng bersikulo asin hanapon an itinotokdong sitadong mga teksto. Dudugangan kaini an kualidad kan saindong pag-adal, asin daing duwa-duwa na mahanga kamo sa panlaog na pagkaoroyon kan Biblia. Gigibohon man kaini an Autor kaiyan, si Jehova Dios, na magin orog na tunay para sa saindo.

An paggamit nin mga cross-reference gigibohon man kamong pamilyar sa mga hula kan Biblia asin sa mga kaotoban kaiyan. Tibaad pamilyar kamo sa pangenot na mga hula sa Biblia, arog kan hula manongod sa paglaglag kan mga Babilonyo sa Jerusalem. Pero, an Biblia igwa nin magkakakonektar na mga hula asin kaotoban kaiyan. An nagkapira kaini daing gayo aram.

Halimbawa, basahon nindo an hula manongod sa penalidad sa pagtogdok liwat kan Jerico dangan estudyaran nindo an kaotoban kaiyan. An Josue 6:26 nagsasabi: “Ipinasabi ni Josue an sarong sumpa kan panahon na idto, na sinasabi: ‘Sumpaon logod sa atubangan ni Jehova an tawo na tumindog asin itogdok an siudad na ini, an Jerico. Sa pagkaremate kan saiyang panganay ibugtak nia an pundasyon kaiyan, asin sa pagkaremate kan saiyang kangodhan patindogon nia an mga tata kaiyan.’” Naotob iyan pakalihis nin mga 500 na taon, huli ta satong mababasa sa 1 Hade 16:34: “Kaidtong . . . kaaldawan [ni Hadeng Acab] an Jerico itinogdok ni Hiel na taga Betel. Sa pagkaremate ni Abiram na saiyang panganay ibinugtak nia an pundasyon kaiyan, asin sa pagkaremate ni Segub na saiyang kangodhan tinindog nia an mga tata kaiyan, sono sa tataramon ni Jehova na saiyang itinaram paagi ki Josue na aki ni Nun.”a Solamente an tunay na Dios an makakapasabong kan siring na mga hula asin seguradohon na maootob iyan.

Mientras na binabasa an Biblia, tibaad gusto nindong makaaram manongod sa sarong punto. Halimbawa, tibaad iniisip nindo kun pirang taon an lagwat sa pag-oltanan nin sarong hula asin kan kaotoban kaiyan. Imbes na maghapot na sana, taano ta dai maghingoa na kamo mismo an maghanap kaiyan? Paagi sa paggamit nin mga tsart asin pantabang sa pag-adal sa Biblia, hanapon an simbag nin siring kahigos kan paghihingoa nindo na susogon an sarong mapa nin kayamanan. (Talinhaga 2:​4, 5) An pakakua kan simbag magkakaigwa nin hararom na epekto sa saindong pagtubod asin gigibohon si Jehova Dios na orog na tunay para sa saindo.

Mamibi nin Regular Asin Odok

Dai paglingawan an halaga nin pamibi asin pagtubod. Ginibo kan mga disipulo ni Jesus an direktang kahagadan na ini: “Tawe kami nin orog pang pagtubod.” (Lucas 17:5) Kun si Jehova garo baga dai nagigin tunay para sa saindo, taano ta dai ipamibi sa saiya an manongod sa saindong pangangaipo nin orog pang pagtubod? May kompiansang hagadon nindo sa saindong langitnon na Ama an saiyang tabang sa paggibo sa saiya mismo na tunay para sa saindo.

Kun may problemang nagpaparibok sa saindong isip, tumao nin kinakaipuhan na panahon na magpahayag sa saindong langitnon na Katood sa odok sa pusong paagi. Kan padangadang na an kagadanan ni Jesus, sia namibi nin odok sa boot. Minsan ngani kinondenar nia an relihiosong kaugalean na pamimibi nin halawig tanganing maheling kan publiko, sia bilog na banggi na namibi sa pribado bago pilion an saiyang 12 apostol. (Marcos 12:​38-​40; Lucas 6:​12-​16) May manonodan man kita ki Ana, na nagin ina ni propeta Samuel. Naghihimuyamot na magkaaki nin lalaki, ‘sia namibi nin halawig sa atubangan ni Jehova.’​—1 Samuel 1:​12.

Ano an pundamental na leksion sa gabos na ini? Kun linalaoman nindong simbagon an saindong mga pamibi, dapat kamong mamibi nin maigot, odok sa boot, daing ontok​—asin, siempre, kaoyon sa kabotan nin Dios. (Lucas 22:44; Roma 12:12; 1 Tesalonica 5:​17; 1 Juan 5:​13-​15) An paggibo kaini makatatabang na gibohon an Dios na tunay para sa saindo.

Masdan an mga Linalang

An personalidad nin sarong pintor puedeng mahayag paagi sa saiyang mga ipininta. Kaagid kaiyan, an “dai naheheling na mga kualidad” ni Jehova, an Kagdisenyo asin Kaglalang kan uniberso, malinaw na naheheling sa mga linalang. (Roma 1:​20) Kun maingat niatong pinagmamasdan an mga gibo ni Jehova, orog niatong nasasabotan an saiyang personalidad, asin sa siring sia nagigin orog na tunay para sa sato.

Kun an pagmamasdan nindo bako sanang an panluwas kan mga bagay na linalang nin Dios, tibaad maghanga kamong marhay sa pagigin tunay kan saiyang mga kualidad. Halimbawa, an impormasyon manongod sa kakayahan kan mga gamgam na magnabigar tibaad orog pang magpakosog kan saindong pag-apresyar sa kadonongan ni Jehova. Sa pagbasa manongod sa uniberso, manonodan nindo na an Milky Way, na mga 100,000 na light-year an distansia kan mag-ibong-ibong na poro, saro sana sa binilyon na galaksia sa bilog na espasyo. Dai daw kaiyan itinatadom sa isip nindo an katunayan kan kadonongan kan Kaglalang?

Sierto nanggad, tunay an kadonongan ni Jehova! Alagad ano an kahulogan kaiyan para sa saindo? Bueno, seguradong dai sia nariribaraw sa mga problemang dinadara sa saiya sa pamibi kan siisay man sa sato. Iyo, maski an kadikit na kaaraman dapit sa mga linalang puedeng gibohon si Jehova na orog na tunay para sa saindo.

Lumakaw sa Kaibanan ni Jehova

Puede daw nindong maeksperyensiahan nin personal kun gurano katunay si Jehova? Iyo, kun arog kamo kan fiel na patriarkang si Noe. Pirme siang nagkuyog ki Jehova, kaya ngani masasabi: “Si Noe naglakaw sa kaibanan kan tunay na Dios.” (Genesis 6:9) Si Noe namuhay na garo baga nasa mismong kataed nia si Jehova. An Dios puedeng magin siring kaiyan katunay para sa saindo.

Kun kamo naglalakaw sa kaibanan nin Dios, kamo nagtitiwala sa mga panuga sa Kasuratan asin minahiro kaoyon kaiyan. Halimbawa, kamo nagtutubod sa mga tataramon ni Jesus: “Padagos na hanapon nguna an kahadean asin an . . . katanosan [nin Dios], asin ini gabos na ibang bagay [materyal na mga pangangaipo] idadagdag na sana sa saindo.” (Mateo 6:​25-33) Totoo, tibaad dai pirmeng itao ni Jehova an kaipuhan nindo sa paaging linalaoman nindo. Pero, kun kamo namimibi dangan nakaeeksperyensia kan tabang nin Dios, sia magigin tunay para sa saindo kapareho nin siisay man na nasa kataed nindo.

An siring na dayupot na relasyon ki Jehova nagtatalubo mantang an saro nagpapadagos sa paglakaw sa kaibanan nin Dios. Estudyare si Manuela, sarong Saksi na Kastila an lenguahe, na nagtagal nin kadakol na pagbalo. Sia nagsasabi: “Kun ako purisaw o nangangaipo, iinaaplikar ko an prinsipyo na yaon sa Talinhaga 18:10. Minadolok ako ki Jehova para sa tabang. Sia pirmeng ‘makosog na torre’ para sa sako.” Masasabi ini ni Manuela pakatapos kan 36 na taon nin pagsarig ki Jehova asin pakaeksperyensia kan saiyang pagsuportar.

Kamo daw nagpopoon pa sanang gibohon si Jehova na saindong kompiansa? Dai kamo madesganar kun an saindong relasyon sa saiya dai pa nagigin arog kan gusto nindo. Mamuhay kada aldaw bilang saro na naglalakaw sa kaibanan nin Dios. Mantang pinatatalubo nindo an pamumuhay na may pagigin fiel, makakamtan nindo an mas dayupot na relasyon ki Jehova.​—Salmo 25:14; Talinhaga 3:​26, 32.

An saro pang paagi na makalakaw sa kaibanan nin Dios iyo an pagtao nin lubos na atension sa paglilingkod sa saiya. Kun kamo nakikikabtang sa paghuhulit kan Kahadean, kamo katabang ni Jehova. (1 Corinto 3:9) An pakaaram kaini nakatatabang na magibo an Dios na tunay na marhay para sa saindo.

An salmista nagsasadol: “Idolot mo ki Jehova an saimong dalan, asin manarig ka sa saiya, asin sia mismo mahiro.” (Salmo 37:5) Nungkang lingawan na itao sa Dios an ano man na kagabatan o kahaditan nindo. Pirmeng magsarig sa saiya para sa tabang asin giya. Kun kamo mapagngayongayong nagsasarig ki Jehova Dios asin pirmeng lubos na nagtitiwala sa saiya, makamamate kamong tiwasay huli ta aram nindo na sia mahiro para sa saindo. Kompiado daw kamo kun irinarani nindo ki Jehova an saindong personal na mga problema? Magigin kompiado kamo​—kun an Dios tunay para sa saindo.

[Nota sa Ibaba]

[Retrato sa pahina 21]

Gibohon na nakapakokosog sa pagtubod an saindong mga panahon nin pag-adal

[Retrato sa pahina 22]

Tumao nin panahon para sa regular, odok sa boot na pamimibi

[Mga retrato sa pahina 23]

Masdan nindo kun paano an mga kualidad ni Jehova nahahayag sa mga linalang

[Pasasalamat para sa pinagkuanan]

Hummingbird: U.S. Fish and Wildlife Service, Washington, D.C./Dean Biggins; mga bitoon: Retrato: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands