LEKSIYON 14
Paano Makakapaugma sa Diyos an Satong Pagsamba?
Arog kan napag-ulayan ta sa Leksiyon 13, bako gabos na relihiyon nakakapaugma sa Diyos. Pero masasamba ta an satong Kaglalang sa paaging makakapaugma sa saiya. Anong “pagsamba [o, relihiyon]” an nakakapaugma saiya? (Santiago 1:27, nota sa ibaba) Aramon kun ano an itinutukdo kan Bibliya.
1. Sain dapat nakabase an satong pagsamba?
Dapat base sa Bibliya an satong pagsamba. Sinabi ni Jesus sa Diyos: “An saimong tataramon katotoohan.” (Juan 17:17) May mga relihiyon na binabaliwala an katotoohan na yaon sa ipinasabong na Tataramon nin Diyos, an Bibliya. Rinibayan ninda iyan kan pilosopiya nin mga tawo saka mga tradisyon. Anggot si Jehova sa mga ‘naggigibo nin palusot para dai gibuhon an tugon nin Diyos.’ (Basahon an Marcos 7:9.) Pero mapapaugma ta siya kun pirmi tang ibinabase sa Bibliya an satong pagsamba asin sinusunod an mga sinasabi kaiyan.
2. Paano ta dapat sambahon si Jehova?
Bilang satong Kaglalang, tama sana na ki Jehova ta lang itatao an satong eksklusibong debosyon. (Kapahayagan 4:11) Buot sabihon, dapat na mamutan ta siya asin siya sana an satong sasambahon na dai naggagamit nin ano man na imahen o rebulto.—Basahon an Isaias 42:8.
An satong pagsamba dapat na “banal asin akseptable” ki Jehova. (Roma 12:1) Buot sabihon, dapat tang sunudon an saiyang mga pamantayan sa moral. Halimbawa, pinapahalagahan asin sinusunod kan mga namumuot ki Jehova an saiyang mga pamantayan sa pag-agom. Saka dai sinda naggigibo nin mga bagay na nakakaraot, arog kan paggamit nin tabako, pagdroga, o pagburat.a
3. Taano ta dapat tang sambahon si Jehova kaiba kan mga kapareho ta an pagtubod?
Sa satong mga pagtiripon kada semana, may oportunidad kita na ‘umawon si Jehova sa kongregasyon.’ (Salmo 111:1, 2, nota sa ibaba) An satong pagkanta nin mga pag-umaw sa Diyos an saro sa mga paagi na ginigibo ta iyan. (Basahon an Salmo 104:33.) Hinahagad sa sato ni Jehova na mag-atender kita sa mga pagtiripon ta namumutan niya kita. Aram niya na makakatabang iyan sa sato tanganing magin maugma kita ngunyan asin sa maabot. Sa mga pagtiripon, pinapakusog kita kan iba asin pinapakusog ta man sinda.
ARAMON PA
Aramon kun taano ta habo ni Jehova na maggamit kita nin mga imahen sa pagsamba. Aramon man an importanteng mga paagi na magigibo ta para maumaw an Diyos.
4. Dai kita dapat maggamit nin mga imahen sa satong pagsamba
Taano ta nakakapaanggot sa Diyos an paggamit nin imahen sa pagsamba? I-play an VIDEO, dangan pag-ulayan an hapot na ini:
Ano an nangyari sa nagkapirang lingkod nin Diyos kan mga panahon kan Bibliya kan purbaran nindang sambahon siya gamit an rebulto?
May mga tawo na naggagamit nin mga imahen sa pagsamba sa Diyos ta pagmati ninda mas harani sinda sa Diyos pag igwa kaiyan. Pero makakatabang daw talaga iyan para maparani sinda sa Diyos? Basahon an Exodo 20:4-6 saka Salmo 106:35, 36, dangan pag-ulayan an mga hapot na ini:
Anong mga bagay o imahen an nahihiling mong ginagamit kan mga tawo sa saindang pagsamba?
Ano an namamatian ni Jehova sa paggamit nin mga imahen?
Sa hiling mo, tama daw na maggamit kita nin mga imahen sa pagsamba? Taano?
5. Kun si Jehova sana an sasambahon ta, makakabutas kita sa salang mga tukdo
Aramon kun paano kita makakabutas sa salang mga tukdo pag sinamba ta si Jehova sa tamang paagi. I-play an VIDEO.
Basahon an Salmo 91:14, dangan pag-ulayan an hapot na ini:
Ano an pangako ni Jehova kun ipapahiling tang namumutan ta siya paagi sa pagsamba sana sa saiya?
6. Sinasamba ta an Diyos sa mga pagtiripon sa kongregasyon
Inuumaw ta si Jehova asin pinapakusog an lambang saro paagi sa pagkanta saka pagkomento sa mga pagtiripon sa kongregasyon. Basahon an Salmo 22:22, dangan pag-ulayan an mga hapot na ini:
Nauugma ka daw na madangog an mga komento sa mga pagtiripon?
Gusto mo man daw na maghanda para makakomento?
7. Nauugma si Jehova pag sinasabi ta sa iba an mga nanunudan ta
Dakul nin paagi na masasabi ta sa iba an mga nanunudan tang katotoohan sa Bibliya. Basahon an Salmo 9:1 asin 34:1, dangan pag-ulayan an hapot na ini:
Arin sa mga nanudan mo sa Bibliya an gusto mo man na sabihon sa iba?
MAY MGA NAGSASABI: “Maski ano an relihiyon mo basta an mahalaga udok sa buot saka sinsero an pagsamba mo sa Diyos.”
Ano an masasabi mo?
SUMARYO
Napapaugma ta an satong Kaglalang pag siya sana an satong sinasamba, pag inuumaw ta siya sa mga pagtiripon sa kongregasyon, saka pag sinasabi ta sa iba an mga nanunudan ta.
Rebyu
Paano ta maaaraman an pagsambang inaako nin Diyos?
Taano ta si Jehova sana an dapat tang sambahon?
Taano ta dapat tang sambahon an Diyos kaiba kan mga gusto man na mapaugma siya?
HILINGON MAN
Sa istorya na “Bako Na Akong Oripon nin mga Idolo,” basahon kun paano napundo nin sarong babayi an pagsamba sa idolo.
“Binago kan Biblia an Saindang Buhay” (An Torrengbantayan, Hulyo-Setyembre 2011)
Aramon kun ano an makakatabang saimo tanganing makakomento ka sa mga pagtiripon sa kongregasyon.
“Umawon si Jehova sa Laog kan Kongregasyon” (An Torrengbantayan, Enero 2019)
Hilingon kun paano nakinabang an sarong hoben na lalaki sa mga pagtiripon kan kongregasyon dawa bakong madali para sa saiya na mag-atender.
An krus ikinokonektar kan dakul na tawo sa Kristiyanismo. Dapat daw na gamiton ta iyan sa satong pagsamba?
“Taano ta an mga Saksi ni Jehova Dai Naggagamit nin Krus sa Pagsamba?” (Artikulo sa jw.org/bcl)
a Pag-uulayan an mga temang iyan sa masunod na mga leksiyon.